唐吉訶德 (芭蕾舞劇)
(由唐吉訶德芭蕾舞劇跳轉過嚟)
《唐吉訶德》（粵拼：tong4 gat1 ho1 dak1；英文：Don Quixote；西班牙文：Don Quijote）係一齣四幕芭蕾舞劇，由法國裔俄羅斯大芭蕾舞蹈員及編舞師莫里斯·珀蒂帕（Marius Petipa）編寫，捷克裔大作曲家路德維希·明古斯（Ludwig Minkus）作曲，首次喺 1869 年 12 月 26 號公演於莫斯科。而打後珀蒂帕同明古斯為馬林斯基芭蕾舞團（Mariinsky Ballet）將齣劇改過版，成五幕，而呢個版本喺 1871 年 11 月 21 號上演於聖彼得堡[1]。
時至今日，唐吉訶德經已係世上其中一齣最常俾人返炒嘅芭蕾舞劇[1]。
較早版本[編輯]
將呢本塞萬提斯入舞，珀蒂帕同明古斯並非第一人。1740年維也納編舞家凡士希維定（Franz Hilverding）就按原著角色安排編排過。該版本1786年於巴黎被現代芭蕾舞之父諾維讓（Jean-Georges Noverrein）重新編排過。
但原著主角嘅安排，缺乏一對男女主角互動，從而難以安排雙人舞，係將小說《唐吉訶德》改編為芭蕾舞劇嘅一大難題。呢個難題喺1801年，俾巴黎歌劇院嘅芭蕾舞總監米隆成功解決。米隆選粹小說嘅第二部中嘅兩個章節改編而成，將主角則變成咗酒庄老闆女兒潔特妮（Kitri，原著中嘅 Quiteria）及同村嘅窮飛髮師傅巴西里奧（Basilio）呢對情人。[2]
大要[編輯]
睇埋：唐吉訶德
原版流程[編輯]
唐吉訶德芭蕾舞劇個故仔建基於同名嘅西班牙文小說，原版個流程如下[3][4]：
- 序幕講主角唐吉訶德醉心於幻想自己係個騎士，並且決定騎住隻馬，以流浪騎士嘅身份去冒險，想像自己會撞到佢心目中嘅完美女神豆善妮雅（Dulcinea）；
- 第一幕場景一個西班牙小鎮，平民少女潔特妮（Kitri）同身為飛髮師傅嘅巴西里奧（Basilio）相愛，但潔特妮阿爸羅倫佐（Lorenzo）想潔特妮嫁俾個（潔特妮唔鍾意嘅）貴族男人加瑪錢（Gamache），於是潔特妮離家出走，當時個小鎮有班後生仔喺度騷擾本地嘅係生女，班後生女嘅屋企人同嗰班後生仔衝撞；喺混亂當中，唐吉訶德以為潔特妮就係豆善妮雅，同時潔特妮同巴西里奧終於決定私奔，而唐吉訶德見到潔特妮同巴西里奧相愛，覺得妒忌，跟住受羅倫佐委託，幫手去拉潔特妮同巴西里奧返嚟；
- 第二幕講唐吉訶德追，去到條小村落嗰度，撞到班羅姆人，引起混亂，打後佢係個風車隔離受咗傷，喺森林入面撞到班仙子，仲去到一個古怪花園入面，見到豆善妮雅（有版本話唐吉訶德發緊夢）；
- 第三幕講唐吉訶德、加瑪錢、同羅倫佐終於追上潔特妮同巴西里奧，巴西里奧攞把劍自插，以死囈羅倫佐俾佢同潔特妮結婚，但加瑪錢唔理佢，唐吉訶德就要求同佢單挑（理由係加瑪錢拒絕一個垂死者嘅最後願望），加瑪錢走佬，然後羅倫佐無可奈何噉應承俾兩個人結婚－呢個時候巴西里奧攞返把劍出嚟，原來佢衹係扮自插；
- 第四幕就講潔特妮同巴西里奧結得成婚，有情人終成眷屬。
編舞特點[編輯]
喺編舞上，唐吉訶德芭蕾舞劇有以下特徵[4]：
- 場表演首先實會有好幾段由潔特妮同巴西里奧一齊跳嘅雙人舞，多數亦會有由唐吉訶德做嘅變奏舞；
- 第一幕中段，通常會有段由一大班配角男女舞蹈員跳嘅舞－扮演個小鎮嘅居民；
- 第四幕講有情人終成眷屬，會有一班配角跳歡樂嘅舞；
- 喺第二幕豆善妮雅出場嗰段，會有一班女舞蹈員扮演仙子配合佢跳舞，然後會有唐吉訶德同豆善妮雅做嘅雙人舞；
- 羅倫佐同加瑪錢通常會由年紀大啲（體力冇噉好）嘅男舞蹈員飾演，亦都因為噉比較少會跳變奏舞。
圖庫[編輯]
-
潔特妮變奏舞 -
巴西里奧變奏舞 -
潔特妮同巴西里奧雙人舞 -
2012 年一場潔特妮同巴西里奧雙人舞 -
2013 年一場唐吉訶德同豆善妮雅雙人舞；佢哋周圍有班女舞蹈員扮演仙子。
睇埋[編輯]
攷[編輯]
- ↑ 1.0 1.1 Letellier, Robert Ignatius (2008). The Ballets of Ludwig Minkus. Cambridge Scholars Publishing.
- ↑ Levene, L.: Minkus: Don Quixote，刊登係Decca 唱片公司《堂吉訶德》DVD（2006年馬林斯基劇院現場版）小冊子 第8頁
- ↑ Wiley, Roland John (2009). A Century of Russian Ballet. Dance Books Ltd.
- ↑ 4.0 4.1 Flynn, S. J. (1984). The presence of Don Quixote in music.
拎[編輯]
