啟德郵輪碼頭公園

啟德郵輪碼頭公園 Kai Tak Cruise Terminal Park
基本資料
類型	公共公園
位置	香港九龍啟德啟德郵輪碼頭頂層
座標	22.305920°N 114.213559°E / 22.305920; 114.213559
面積	2.3公頃
開放	2013年9月21號 (2013-09-21)
營運者	康樂及文化事務署
狀態	開放緊
地圖

植物花園入面嘅水園有唔少荷花

升旗廣場

去啟德郵輪碼頭嘅閒座區

啟德郵輪碼頭公園（英文：Kai Tak Cruise Terminal Park）喺香港九龍九龍城啟德承豐道33號啟德郵輪碼頭嘅頂層，係香港其中一座規模最龐大嘅空中花園。佢嘅佔地大約23,000平方米，而佢嘅綠化面積係大約16,700平方米。個公園喺2013年嘅年中起好，到9月21至22號初步向公眾開放，再到10月18號正式開放，由康文署負責管理。

設計

啟德郵輪碼頭公園個標榜用「山、城、水」做設計嘅概念，所以種滿樹木。有聲稱個公園利用螺旋形同縱橫交錯嘅人行通道，嚟造一個好有趣味嘅行人體驗。喺近住觀塘嘅「山段」部分，有植物花園嚟展示多季節性嘅植物；喺個公園中間嘅「城區」就有露天舞臺嘅中央草坪，適合唔同活動嘅廣場。植物花園入面嘅「水園」有展示荷花；又有地形奇趣嘅兒童綠洲同埋嬉水廣場；而面向維多利亞港嗰面就係觀景平台，畀遊客能夠飽覽維多利亞港嘅景致。

設施

啟德郵輪碼頭公園嘅兩邊有好多個觀景平台；中央部份擺咗植物花園、中央草坪、公園廣場、嬉水廣場同園景花園。個公園嘅盡頭係升旗廣場同埋相關嘅設施，而附近亦都有飲水機同洗手間。

• 
  相聚廣場
• 
  嬉水廣場
• 
  中央草坪
• 
  觀景平台草坪
• 
  升旗廣場每日會喺下晝6點搞降旗儀式，右邊係橢圓形嘅雷達罩。

開放時間

個公園由朝早7點一路開到夜晚11點。

交通

交通路線列表
巴士 九龍新界巴士 5R （冇資料） 20A （冇資料） 22 （冇資料） 22M （冇資料） 專線小巴 九龍專線小巴 86 （冇資料）

批評

啟德郵輪碼頭公園面向維多利亞港嘅部份範圍屬於花圃，被批評為阻礙遊人倚欄攝影或者觀賞海景，此外，植物生長一度未如理想。

植物生長未如理想

有關部門設計啟德郵輪碼頭公園嘅時候，標榜園入面周圍都種咗四季植物，而植物亦都跟住顏色同簇嚟分配，去加強個季節性嘅效果。但係喺啟德郵輪碼頭公園開放之後，啲植物嘅生長情況一直都唔係好理想，而綠化嘅植物同泥都達唔到最低標準，令到有部份嘅參觀者批評啲植物種得太過疏落。康樂及文化事務署喺答傳媒嘅時候，承認喺驗收啟德碼頭公園嘅植物嘅時候，有部分嘅植物生長情況並唔理想，已經要求承建商盡快換咗佢，又話大部分嘅植物已經符合到要求。康文署喺2013年9月18號搞掂咗公園嘅驗收工作同埋綠化工程之後，一直同建築署同埋承建商有聯繫，確保承建商會做返佢哋護養植物嘅責任。康文署嘅場地職員亦都成日會喺呢度巡察，密切咁留意啲植物嘅生長情況。

花圃設計阻礙景觀

啟德郵輪碼頭公園兩邊有唔少位都畀花圃佔據咗，其中面向住維多利亞港嘅範圍全部都係花圃，阻礙到遊客倚欄影相或者睇海景。康樂及文化事務署解釋，因為啟德郵輪碼頭前面嘅區域有部分係郵輪泊位嘅禁區，所以為咗防止有遊客爬高跟住出意外噠低，或者有嘢跌咗落禁區，先至喺呢個位度加花圃嚟確保遊客嘅安全，認為有關嘅安排唔影響到遊客欣賞海景。

事件

• 2024年2月14號，啟德郵輪碼頭公園對開海面有人墮海，男事主送咗去聯合醫院搶救，跟住到挨晚5點半左右宣佈死亡。