跳去內容

喇沙書院

改拎
出自維基百科，自由嘅百科全書
喇沙書院
校訓 克己復禮（Fides Et Opera）
創校年份 1932年
校監 譚瑪士修士（Rev. Bro. Thomas Lavin）
校長 Mr. Leung Ho Yin, Steve
學生人數 約 1,800 人，每級250幾人
老師人數 約 80 人
宗教 天主教
所屬團體 喇沙會
教學語言 英語
地址 香港九龍喇沙利道18號
電話 (852) 23387171
傳真 (852) 23362586
電郵地址 info@lasalle.edu.hk
網址 http://www.lasalle.edu.hk
75週年時間囊

喇沙書院（La Salle College）係香港男子天主教中學，由喇沙會修士於1932年創立，位於九龍城區。

歷史

[編輯]

成立同初期發展

[編輯]

1917年，聖若瑟書院嘅修士喺漆咸道設立咗一間小學。當時，九龍發展迅速，對學位嘅需求急增。聖若瑟書院嘅校長艾瑪·撒隆修士（Brother Aimar Sauron）認為需要喺九龍起一座新校舍作為聖若瑟書院九龍分校。1920年代末，佢喺界限街買咗一塊地，作為發展新學校之用。

1930年11月5號，港督貝璐爵士（Sir William Peel）為新校舍奠基。1931年12月3號，校園嘅設施已經可以容納八班，共303名學生。當時學校由聖若瑟書院嘅五位修士同漆咸道學校嘅四位輔助教師共同管理。

學校於1932年1月6號正式開幕，由七位修士共同管理。艾瑪修士成為首任校長。幾天後，40名學生開始喺校舍西翼寄宿。當時有14班，共540名學生。大概三分之一嘅學生有歐洲（特別係葡萄牙）血統。[未記出處或冇根據]

其後七年，學校喺艾瑪修士嘅主理下蓬勃發展。學生喺大學入學試取得優秀嘅成績。幾個實驗室、四個網球場同一座標準足球場相繼落成，並喺校園內豎立一座聖約翰·喇沙嘅塑像（保留至今）。學生人數於1935年增至805人，去到1939年更達1060人。

第二次世界大戰期間

[編輯]

1939年，第二次世界大戰爆發，嚴重噉影響到學校嘅運作。香港政府徵用咗校舍作為軍事監獄，後來改為醫院。為咗繼續教學，修士喺條街對面建立臨時教室。到咗下晝，修士就到醫院提供協助。

1941年聖誕節，香港淪陷。日軍接管咗校舍，驅逐修士，校舍就變成倉庫。當時香港食物短缺，日軍政府鼓勵市民離開香港，一啲修士因此喺戰時避居越南。學校創辦人兼首任校長艾瑪修士1945年死喺越南。

1946年，戰事結束之後，卡西安修士（Brother Cassian Brigant, OBE）開始籌劃重開學校，並好快錄取咗600多位學生。香港軍政府喺1947年再次徵用校舍，成立第33綜合醫院。喺柏德烈·唐納修士（Brother Patrick Toner）領導下，學校搬咗去何文田巴富街嘅臨時校舍。雖然當時學校遇到唔少困難，但校內活動並無受到嚴重嘅影響。

為咗紀念艾瑪修士同卡西安修士對學校作出嘅傑出貢獻，學校於2006年開幕嘅兩座新翼，分別以兩位修士嘅名來命名。

戰後發展

[編輯]

1956年，斐力修士（Brother Felix Sheehan）接任校長。1959年8月1號，佢從軍政府方面取回校舍。此後，學生人數持續增長，學校分成中學同小學兩部分。1957年，喇沙小學成立，由彭亨利修士（Brother Henry Pang）擔任校長。

1964年，喇沙書院喺界限街校舍裏面開夜校。1969年，夜校部獨立，搬咗去何文田，改用新校名陳瑞祺（喇沙）書院。

1970年代中期，校長拉斐爾修士（Brother Raphael）同其他修士商量後，認為舊校舍已經唔能夠滿足教學需要。由於全面翻新耗費龐大，因此班修士決定拆咗舊有嘅校舍，重建一座設施現代化嘅新校舍。為咗籌集重建資金，校方將一部分土地賣咗畀幾間地產發展商，起咗包括碧華花園在內嘅一啲私人住宅，因此新校園嘅佔地比以往減少。[未記出處或冇根據]重建其間，教學活動繼續進行。1982年，喇沙書院金禧紀念。同年2月19號，新校舍由港督麥理浩主持開幕。

新校舍樓高七層，可容納超過1800名學生。校舍作四方城設計，分東南西北四座，中間有花園同籃球場。花園裡面放置咗一座本來豎立喺舊校舍門口嘅火炬型石雕。所有房間都設有中央冷氣，並安裝咗雙層玻璃窗，以減低往來鄰近啟德機場嘅飛機所發出嘅噪音。除咗課室之外，新校舍提供咗大量進行學術同課外活動所需嘅設施，包括物理、化學、生物、綜合科學實驗室各兩個、一大一細嘅演講廳兩個同其他多用途活動室。此外，呢次重建擴充咗唔少運動場地：包括一個全天候400米田徑場（六線），一個標準人造草地足球場，一個奧林匹克標準50米室外游泳池，一個網球場，一個排球場，兩個室外籃球場，一個健身室，一個壁球場，並有一個體育館，可以用作籃球場同六個羽毛球場。佢嘅看台長廊重可以用作乒乓球室及考場。呢啲設施主要由 Rev. Brother Alphonsus Chee 及譚瑪士修士（Rev. Brother Thomas Lavin）主導發展。

近年發展

[編輯]
校舍新翼外觀

為咗加強家長同老師之間嘅溝通，家長教師會（Parent-Teacher Association）於1995年1月成立。家教會舉辦好多活動，例如閱讀會，中一新生適應週、春茗、（內地同外地）教育機構參觀交流、舊生分享演講等，構成學校生活極重要嘅一部分。呢啲活動都好受學生歡迎，當中唔少更係以學生作為中堅分子，協辦籌劃嘅。好多家長都係喇沙書院嘅舊生，佢哋隨著呢啲活動同學生接觸頻繁，對於推廣學校嘅傳統文化，建立對學校嘅歸屬感，起咗好大嘅作用。

1996年9月，學校嘅田徑場同足球場急需重新鋪設。喇沙基金會喺家長教師會嘅協助下，共籌得超過五百萬港元，並得到香港賽馬會捐助同等嘅金額。重鋪計劃於1998年10月完成，設施改名為喇沙書院·香港賽馬會田徑及足球場。

1998年12月，學校主辦咗第三屆亞太區喇沙會教育會議，接待約130個與會者。呢次會議決定成立香港喇沙會辦公室，以譚瑪士修士為召集人，聯繫喇沙會喺香港成立嘅各個機構同埋佢嘅成員。2004年12月，超過150名喇沙會修士同學生來到香港參加第七屆亞太區喇沙青年會議，由校長譚瑪士修士主持，主題係「共同以信仰帶出服務」。

2004年夏天，學校開始進行校舍改善工程，兩座新翼於2005年落成，以學校兩位前修士校長艾瑪同卡西安命名。呢次工程為學校增加咗32間課室，包括一個大型電腦室同一個多媒體學習中心。

校內組織

[編輯]

喇沙書院舊生會（LSCOBA）由世界各地嘅喇沙書院舊生所組成。舊生來自社會各個階層，係支持學校嘅重大力量。多年來，舊生會多次為學校籌集經費，用嚟改善校園環境，並以喇沙書院為中心，搭建咗一個寬闊嘅人才網絡。透過佢哋同學生嘅不斷交流，提高學生嘅個人質素。至2005年為止，舊生會會員人數達到5236人。

喇沙書院學生會（LSCSA）由學校嘅所有學生所組成，係香港少數享有高度自治權嘅校內學生組織。學生會嘅選舉制度喺本港較罕見：以內閣為單位，由二年級或以上嘅學生以一人一票嘅方式選出。呢個制度同普遍學生會由老師挑選，或者由學生選出個別內閣成員唔同，肯定咗學生會嘅自主同認受性，同時確保內閣成員施政理念嘅一致性。

學生會由六個部門組成：

  • Class Representative Board, CRB（班代表部，負責代表學生會同學生溝通，同校內各班代表舉行每週會議，照顧學生福利同籌辦聖誕舞會）
  • Clubs Coordinating Board, CCB（會社統籌部，負責監察校內各個學會同籌辦大部分學生會嘅大型活動）
  • Discipline Board, DB（紀律部，負責協助訓導主任維持學生紀律）
  • Publications Board, PB（印務部，負責出版校報 The Lasallian）
  • The Secretariat, SEC（秘書處，負責製作學生會各項活動嘅宣傳品、佈置場地，同時設計學生會產品例如領帶夾、T-shirt、風褸、文件夾、電話繩同七十五週年月曆等）
  • Finance Committee（負責制訂年度預算同處理學生會嘅各項收入同支出）

學生會每年都會舉辦各項活動，當中包括天才表演（Talent Quest）、喇沙學生論壇（Lasallian Forum）、聖誕聯歡日（Christmas Gathering）、聖誕舞會（Christmas Ball）同喇沙節（Lasallian Festival）等。

另外，一些學生廣為使用嘅設施，都設有自治組織，如圖書館部、資訊科技部等，負責維護設施同為學生提供協助。唔少自治組織有好高嘅決策權，教師只擔任顧問角色。

學生會同自治組織嘅成員都喺領帶上佩有特定嘅徽章。

由於學校嘅設施遠多過香港一般標準中學，香港政府並無為保養呢啲設施提供額外資助。為咗維修及更新呢啲設施，校方經常要籌集大量資金。有見及此，法蘭西斯修士（Brother Francis O'Rourke）同舊生於1992年成立喇沙基金會，協助校方處理有關資助設施保養嘅問題。

首位非修士校長

[編輯]

一直以來，學校嘅校長都由喇沙會修士擔任。喺香港修改咗相關嘅教育法例之後，中學校長必須喺60歲卸任[未記出處或冇根據]。然而，近年喇沙會嘅修士多數被派去發展中地區協助當地嘅教學工作，導致已發展地區，例如香港，缺少適合擔任校長嘅年輕修士[未記出處或冇根據]。2004年，年屆退休之齡嘅譚瑪士修士卸任後，校長一職由學校舊生劉煒堅博士出任。學生同舊生對校方安排非神職人員擔任校長反應不一。

劉煒堅博士於2006年6月27號喺學校網站上，宣佈因私人理由辭去校長一職，由2006年8月31號起生效。校長一職由當時其中一位副校長王仁傑先生署任。王仁傑先生於2007年3月16號正式被委任為校長。

校長一職於2010年9月1號起由賀敬修士（Brother Steve Hogan）擔任。賀敬修士喺2016年8月31號奉喇沙會命令返澳洲，由副校長唐煥星接任校長。

成就

[編輯]

喇沙書院被視為香港嘅傳統名校，一向喺學業同課外活動上有優秀嘅成績。

學業成績

[編輯]

1993年，喇沙書院出產咗全港第一個文科十優生。南華早報以 "Arts Student Makes History" 為題報導。

2001年，四名喇沙書院嘅學生喺同一屆香港中學會考中攞到十優嘅佳績。2003年，喇沙書院嘅學生喺會考共攞到501個優（「A」），創下自香港舉辦首屆會考以來嘅紀錄（每間中學一般可以喺每年嘅會考攞到大概二十個優，而名校就有大概二百個）[未記出處或冇根據]。2005年會考，三名喇沙書院學生攞到十優成績，另有六名學生攞到九優或八優佳績。全校共有二十八位同學有資格參與優先錄取計劃。其中兩班理科班嘅學生共攞到超過330個優，平均每個學生有四優成績，成為學界紀錄[未記出處或冇根據]。

課外活動

[編輯]

喇沙書院都曾經喺校際文化同運動比賽中奪得無數獎項，其中嬴過聯校中文辯論比賽八次，香港電腦奧林匹克競賽學校大獎冠軍五次，都係學界嘅紀錄。喇沙書院嘅學生都踴躍參加演說、戲劇、音樂等文化演出同比賽。

運動方面，喇沙書院於1993-1994、2003-2004及2004-2005年曾包辦甲、乙、丙三個年齡組別嘅九龍區校際羽毛球比賽冠軍，即大滿貫。喺田徑（1950-1951年獲大滿貫、1985-1989年連續五年總冠軍）、羽毛球、籃球、越野跑、劍擊(2010年獲港九區校際劍擊比賽團體賽大滿貫)、足球（1947-1949年、1972-1973年、1987-1989年獲九龍區大滿貫、1982-1990年連續九年總冠軍）、曲棍球、壁球、壘球、游泳、乒乓球、網球、排球（1985-1986年獲九龍區大滿貫）等體育項目嘅校際競賽中，喇沙書院都奪得或者曾經奪得總冠軍。其中，乒乓球校隊於2001年起至今都係總冠軍。

奧米加玫瑰碗同埋後繼嘅中銀香港紫荊盃係頒畀喺香港及九龍區參同特定體育項目整體成績最好嘅中學嘅獎項。喇沙書院曾奪得上述獎項共25次（1974-1991年，1993-1994年，1999-2006年），係學界體壇保持嘅最高紀錄。

為慶祝創校70週年，1932個學生、舊生、家長同老師於2002年2月3號喺喇沙書院田徑場上「大環抱」，打破最多人同一時間互攬腰間嘅紀錄，被列入《健力士世界紀錄大全》——「環抱一家親」。[1] [2] 但個紀錄於2004年4月23號俾加拿大一間學校打破。

喇沙書院喺香港數學競賽都攞到唔錯嘅成績，佢哋曾經攞過12次冠軍同4次亞軍，都係學界紀錄。

傳統

[編輯]

喇沙書院非常重視自己嘅傳統，呢啲傳統隨著學校嘅歷史、宗教等因素、歷任校長同舊生嘅言行積累。學生同舊生嘅成就為學校帶來光榮，加上唔少舊生曾經返書院任教，都為發揚傳統創造咗良好嘅條件。

舊生領帶

[編輯]

中六學生可以打一條繡滿校徽圖案嘅領帶，呢條領帶被稱「舊生呔」，同一般紅丶紫斜線相間嘅校服領帶唔同。

紅紫相間校呔

[編輯]

原本斜線相間嘅喇沙校呔喺1960年代設計。但由於製造商整錯咗，令到校呔中嘅紫色逐漸變淡，變成紅白相間呔。

由於LSCOBA堅持要保留喇沙傳統，就喺2009-10年度轉番做紅紫相間校呔。不過好多學生都極力反對呢個政策（尤其係中一生，覺得俾人標籤）並喺Facebook建立群組「強烈反對喇沙更改校呔設計」。而09-10年度嘅SA President-Johnny Chang亦都訪問Form 1仔，向校方提出改番做紅白相間校呔，但都係無以為繼。

打氣支持

[編輯]

喺大型嘅校際運動比賽中，特別係每年三月喺灣仔舉行嘅校際田徑總決賽，某些年級嘅學生唔駛上堂，改為去灣仔組成龐大嘅支持團隊。學生由學生會內閣成員率領叫喊口號，又大唱校歌同其他鼓勵歌曲，揮動校旗，以鼓舞田徑隊嘅士氣。好多學生同舊生都耳熟能詳嘅口號包括「La Salle Spirit: never say die」同「Be calm and do your best; that's all La Salle requests」。

學生會又會設計各式各樣嘅橫額、傳單同貼紙，周圍展示同分派。

祈禱

[編輯]

學生保留祈禱嘅傳統。每個上課日，學生都要祈禱三次，分別喺上堂之前、小息之後同午飯之後。禱告由班主任或信奉天主教嘅同學（通常係值日生）帶領，頌唸天主經或聖母經等經文，並加上喇沙會學生特有嘅一段：

領：Saint John Baptist de La Salle, （聖若翰喇沙，）
答：Pray for us; （為我等祈；）
領：Live Jesus in our hearts, （耶穌活在我們心中，）
答：Forever! （直到永遠。）

呢間嘅學生同舊生全部差唔多都啽得出呢兩頌兩答。[3]

歷任校長

[編輯]
  • Rev. Bro. Aimar Sauron, FSC (1932-1945)
  • Rev. Bro. Cassian Brigant, OBE, FSC (1945-1947)
  • Rev. Bro. Patrick Toner, FSC (1947-1956)
  • Rev. Bro. Felix Sheehan, FSC (1956-1966)
  • Rev. Bro. Casimir Husarik, FSC (1966-1971)
  • Rev. Bro. Raphael Egan, FSC (1971-1984)
  • Rev. Bro. Alphonsus Chee, FSC (1984-1990)
  • Rev. Bro. Francis O'Rourke, FSC (1990-1998)
  • Rev. Bro. Patrick Tierney, FSC (1998-2000)
  • Rev. Bro. Thomas Lavin, FSC (2000-2004)
  • Dr Paul Lau Wai-keen （劉煒堅博士）(2004-2006)
  • Mr Wong Yen-kit （王仁傑先生）(2006-2010)
  • Rev. Bro. Steve Hogan(2010-2016)
  • Mr Tong Wun-sing (唐煥星先生）(2016-2023)
  • Mr Steve Leung Ho-yin (梁浩然先生)(2023-)

班別架構

[編輯]
  • 中一至中六：各七班（A-G）

校歌

[編輯]

喇沙書院校歌原本係英文版。[4][5] 1999年，由舊生黃霑博士翻譯做中文版歌詞。[6][7] 今日，學生同舊生重係比較常用英文版嘅校歌。校歌英文歌詞強調勇氣同膽量，當中「But La Salle is something more」係比較有代表性嘅歌詞，指喇沙學生勇於嘗試同挑戰。[8][9][10][11]

英文版 中文版

Boys of courage, boys of daring,
Full of manliness and will;
Spirit nought for danger caring,
Hearts to conquer every ill.

Refrain：
We are sons of La Salle everyone,
And no matter where we go;
High aloft her flag we will hold,
and strive that her fame may grow.

There are famous schools in plenty,
With their heroes by the score;
And they flourish high and mighty,
But La Salle is something more.

From her lofty station pointing,
To the sky's majestic dome;
She would have us ever minding,
That above is our true home.

Come whatever kind of weather,
Come the stormy days along;
When the old boys get together,
They will always sing this song.

豪情少年敢為敢作
一身朝氣心向上
人行正途艱危不怕
我會盡心全力幹

副歌：
有幸做好喇沙書院友
重遇我往昔同窗
不管天陰天晴日
我哋齊聲將此曲唱

芸芸教壇書堂精舍
各有當世好印象
唯從有成英雄榜看
母校突出人共仰

抬頭對長空求指引
放眼高闊天際望
昂昂志朝彩雲深處
與母校青雲共上

同門友誼因時俱進
當天歡笑不變樣
良朋滿堂欣然相對
母校校歌來合唱

出版刊物

[編輯]
  • The Lasallite（喇沙校刊）
- 年刊
- 喇沙書院編輯部（La Salle College Editorial Board）出版
  • The Lasallian（喇沙學生）
- 校報
- 喇沙書院學生會印務部（The Publications Board）出版

舊生

[編輯]
内文：喇沙書院舊生

參考

[編輯]
  1. ↑ "[1] 互聯網檔案館嘅歸檔，歸檔日期2009-05-19.", 南方網：1932人大環抱 香港喇沙書院破世界紀錄，2002-02-04。
  2. ↑ "[2] 互聯網檔案館嘅歸檔，歸檔日期2009年5月19號，.", 星島日報：喇沙環抱校園創紀錄 ，2002-02-04。
  3. ↑ 流芳歲月的「喇沙精神」Aki post，申雋寫，2016年1月22號出街，2017年9月14號睇
  4. ↑ 〈La Salle College School Song 喇沙書院校歌〉。YouTube。2009-08-30。喺2025-04-26搵到。
  5. ↑ "La Salle College English School Song". YouTube. La Salle College Campus TV. 2012-07-09. 喺2025-04-25搵到.
  6. ↑ 〈喇沙書院中文版校歌~〉。YouTube。2009-08-30。喺2025-04-26搵到。
  7. ↑ "喇沙書院中文校歌 La Salle College Chinese School Song (80th Anniversary Version)". YouTube. La Salle College Campus TV. 2012-05-15. 喺2025-04-25搵到.
  8. ↑ "La Salle School Song". La Salle College. 喺2025-11-01搵到.
  9. ↑ "School Song - LSCOBA". La Salle College Old Boys' Association. 喺2025-11-01搵到.
  10. ↑ 〈趙榮德：那些年，在喇沙就讀的雪泥鴻爪〉。明報周刊。2022-02-26。喺2025-11-02搵到。
  11. ↑ 〈【校長專訪】出身教育世家以育人為使命　喇沙小學校長培養學生做紳士〉。《香港經濟日報》。2023-04-25。喺2025-11-02搵到。

睇埋

[編輯]

出面網頁

[編輯]
由「https://zh-yue.wikipedia.org/w/index.php?title=喇沙書院&oldid=2340309」收