Gimmick

綽頭（粵拼：coek3 tau4，又寫做噱頭），香港廣東話又會借英文叫 gimmick（粵拼：gim1 mik4 ），就係指緊新款嘅裝置或者諗頭，主要設計嚟吸引人注意或者增加吸引力，好多時本身冇乜實際價值。

用喺零售上面，就係一個獨特或者古靈精怪嘅特點，專門令產品或者服務喺競爭對手之中「突出」嚟。產品噱頭有時畀人當成純粹新奇玩意，同產品嘅實際功能關係唔大。噱頭偶爾會畀人睇低，但以前一啲看似雞毛蒜皮嘅噱頭，有時會演變成有用同永久嘅功能。喺電子遊戲入面，呢個詞 gimmick 有時都用嚟形容一啲唔尋常嘅功能或者玩法，特別係如果佢哋唔必要或者令人討厭嘅話。

喺香港廣東話入面，綽頭就係指啲好誇張或者吸引人眼球嘅嘢，但其實唔一定有實際價值。呢啲通常都係為咗吸引人注意或者炒作，而冇實質嘅內容，通常帶有一啲負面意思。

商用

睇埋：產品

喺商業上，gimmick 係指某件產品或者某個諗頭，具有一啲新穎、吸引到人注意嘅特徵，睇落與眾不同。而喺商業應用上，通常仲包含一個意思，話佢冇咩內在、長遠嘅價值，新鮮感過咗之後啲人就會對佢冇晒興趣。

喺市場學上，企業向消費者 sell 自己嘅商品嗰時，成日會強調自己商品嘅 gimmick，用意係吸引人注目。

例子

睇埋：廣告、注意力同營銷策略

如果一樣產品廣告做得好花巧，但實際上啲效果唔係咁好，你可以話佢係「綽頭」。或者，如果有啲人講咗啲咁嘅嘢只係為咗吸引注意，但其實冇乜實際內容，都可以話佢係「綽頭」。例句：

呢間鋪頭啲廣告成日都係綽頭啫，冇料到嘅。

喺市場學等領域上，單靠噱頭好多時都只能短期內吸引人注意，但由於噱頭定義上通常都冇乜真正嘅價值可言，唔似得真正嘅創新，靠噱頭諗住圖利，好多時都會招致大失敗。

睇埋

• 創新
• 好奇
• 經濟泡沫