四牌樓 (廣州)

出自維基百科,自由嘅百科全書
2013年嘅越秀區西湖花市,有棟門樓係用咗四牌樓嘅樣。

中國廣東省廣州市入面嘅四牌樓就係響越秀區嘅解放中路中山六路嘅交界南邊冇幾遠嗰度,而家已經係一條大馬路。嗰啲牌坊已經搬走或者係拆嗮。

[編輯]

明朝嗰陣,喺依家嘅惠福西路北邊、中山六路嘅南邊、朝天路嘅東邊同依家嘅解放中路西邊隔離嗰橛,由於有惠愛坊、孝友坊、忠賢坊同貞烈坊呢4棟牌坊響度先至改咗噉嘅名。雖然話喺1954年嗰陣改咗名嗌解放中路,但有唔少嘅廣州人都慣咗嗌呢度係「四牌樓」嘅。

[編輯]

最早嘅四牌樓[編輯]

如估講話最早嘅四牌樓,就係喺明嘉靖十三年(1534年)嗰陣就出現咗喇,喺依家嘅惠福西路北邊、中山六路嘅南邊,朝天路嘅東邊同依家嘅解放中路西邊隔離嗰橛出現咗4棟用木頭嚟整嘅牌坊響度。而呢4棟牌坊就係惠愛坊、忠賢坊、孝友坊同貞烈坊。

  • 惠愛坊
惠愛坊紀念嘅係之前中原嗰陣嚟咗廣東嘅67位名人
  • 忠賢坊
忠賢坊紀念嘅係廣東嘅49位鄉賢
  • 孝友坊
孝友坊紀念嘅係廣東嘅54位仁者
  • 貞烈坊
貞烈坊紀念嘅係廣東嘅55位節婦。

喺清朝嗰陣,四牌樓同廣東嘅巡撫署都係映埋一齊嘅,佢重圍咗一個大型商業區出嚟,而喺嗰陣時係嗌「四牌樓市」。喺每年正月初一到上元節嗰陣,好多嘅店舖同民居都掛咗好多唔同品種嘅花燈嚟做燈市嘅。不過到咗1644年,明朝後期嘅其中一個嶺南三忠——陳邦彥,佢喺明朝冇咗之後,重帶啲兵仔嚟搞死啲清軍。喺清朝嘅順治四年(1647年),清軍就將陳邦彥霸咗嘅清遠城炸冧咗,打咗成十日之後,結果佢嘅細佬俾陳馨尹殺咗,而陳邦彥就被人斬咗3刀之後被人拉咗去四牌樓度開斬。

五棟牌坊[編輯]

搬咗去私立嶺南大學無耐嘅乙丑進士坊,嗰陣時響格蘭堂嘅西邊。

呢度講嘅所謂5棟牌坊就係以下呢5個喇[1]

  • 盛世直臣牌坊
呢個牌坊係由海瑞嚟起嘅。[2]
  • 乙丑進士牌坊
呢個牌坊係由李覺斯同佢屬下嘅7個人起嘅。[3]
  • 承恩五代牌坊
呢個牌坊係由何熊祥嚟起嘅。[4]
  • 奕世台光牌坊
呢個牌坊係由黃仕俊嘅一間屋三個人嚟起嘅。[5]
  • 戊辰進士牌坊
呢個牌坊係由梁衍泗(重有幾個人)嚟起嘅。[6]

清朝嗰陣[編輯]

喺清朝嘅康熙年嗰陣,由於明朝嘅廣東巡撫署俾人改咗去睺住啲廣州嘅八旗兵嘅將軍部。到咗1857年,由於第二次鴉片戰爭嘅爆發,由於英國同法國嘅軍佬都霸咗廣州成4年咁耐,結果就將間將軍署整大咗,變咗係英國駐廣州領事館(依家係迎賓館嗰度)。而嗰4棟木牌坊嘅運,喺《廣州城坊志》度凈係簡單寫作「署廢,坊亦廢。」呢句。

中華民國時期[編輯]

中華民國統治嗰陣嘅四牌樓

中華路嘅擴闊[編輯]

到咗民國十八年(1929年)嗰陣,廣州就將棟城牆拆咗,嚟起咗條馬路,而小市街嗰邊就整咗條中華南路,歸德直街嗰邊就整咗條中華中路,大北門直街就整咗條中華北路出嚟。不過五棟牌坊重喺條馬路嘅中間,每棟牌坊起碼隔廿僆卅米就見到一棟喇,而個建築嘅樣都係差唔多,都係用咗石柱、石幔、石樑、石匾呢啲疊架嚟整嘅,上面重有個瓦蓋添。每個牌坊嘅3個石門嘅闊度都係唔同嘅,其中中間嗰個就比較闊,而呢啲牌坊連中型汽車都可以過到去,而兩邊嘅門仔就凈係可以畀黃包車過啫[7]

牌坊嘅搬走[編輯]

喺1999年11月整好咗嘅乙丑進士牌坊

不過到咗民國卅六年(1947年),由於廣州市入面嘅汽車越嚟越多,搞到出咗幾單有汽車撞牌坊嘅交通事故出嚟都有,廣州市政府就決定搬走呢5棟牌坊,由廣州工務局嚟使錢,睇下佢點搬法。後嚟到咗民國卅六年嘅9月底,五棟牌坊就分別響新址重新起咗。而奕世台光牌坊同埋戊辰進士牌坊就移咗入去漢民公園入面(呢度後嚟改咗名嗌兒童公園,依家係南越國宮署遺址)嘅南門同埋西門。而盛世直臣牌坊同埋承恩五代牌坊就搬咗去中山紀念堂北邊嘅觀音山,百步梯嘅入口附近(依家係越秀公園嘅南門)石級度[7]。而乙丑進士牌坊就移咗過去私立嶺南大學(依家係中山大學)嗰度,就喺1999年11月,乙丑進士牌坊已經整好,呢個牌坊就係依家嘅中山大學入面,惺亭嘅西邊。而四牌樓移出咗去中華路之後,喺馬路邊嘅嗰啲巷仔重見到有寫住「四牌樓街」嘅名。[7]

牌坊俾人拆咗[編輯]

根據考察過,起咗喺百步梯嘅兩個入口附近嘅兩棟石牌坊,就喺20世紀50年代初俾廣州市人民政府當場拆咗;而喺漢民公園南門同埋西門嘅兩棟石牌坊就喺文化大革命入面,按照廢除四舊嘅意思就拆咗。而所謂嘅四牌樓喺1994年嗰陣,由於廣州市人民政府就話要整闊條解放路,不過佢哋冇向民眾公開收集意見就猛咁將條路入面嘅全部騎樓冚唪唥都拆嗮(重拆到過龍添),搞到做咗嘅嘢就冇得返轉頭。條馬路入面嘅四牌樓街同埋四牌樓都一齊冇埋[8]。廣州入面嘅大多數牌坊,依家凈係得返搬咗去中山大學入面嘅乙丑進士牌坊,而個牌坊上面重有一隻名響度,就係「東莞李覺斯」呢5個字。

俗語[編輯]

廣州入面成日有條數字地名順口簧,其中就包括咗呢度(加粗咗嘅字):

1德路、2沙頭、3元里、4牌樓、5仙觀、6榕路、7株榕、8旗二馬路、9曲巷,10甫路。

睇埋[編輯]

[編輯]

  1. 广. 羊城晚報. 2004-11-16. 原著喺2013-06-18歸檔. 喺2012-09-24搵到.
  2. 康熙寫嘅《南海縣志·卷之二·建置·坊表》本嘢入面話到「盛世直臣,爲右都御史海瑞建,在忠賢坊。」呢句。
  3. 康熙寫嘅《南海縣志·卷之二·建置·坊表》本嘢入面話到「乙丑進士,爲李覺斯、梁士濟等建,在忠賢坊。」呢句。
  4. 康熙寫嘅《南海縣志·卷之二·建置·坊表》本嘢入面話到「總揆百僚承恩五代,爲南吏部尚書何熊祥建,在忠賢坊。」呢句。
  5. 康熙寫嘅《南海縣志·卷之二·建置·坊表》本嘢入面話到「奕世台光熙朝人瑞,爲內關黃仕俊、祖黃廷機、父黃鎬建,在承宣街。」呢句。
  6. 康熙寫嘅《南海縣志·卷之二·建置·坊表》本嘢入面話到「戊辰進士,爲梁衍泗等建,在忠賢坊。」呢句。
  7. 7.0 7.1 7.2 广. 原著喺2014年5月2號歸檔. 喺2014年5月13號搵到.
  8. 四牌楼最后背影止于解放路扩建 南都網

連出去[編輯]