四色印刷

四色彩印用唔同角度嘅網點，造出一種睇落係其他色嘅視覺錯覺；用嘅網點越細，效果就越好

四色彩印（英文：process colour printing），又叫四色印刷，係指用四隻唔同顏色嘅油墨嚟印刷，但係印刷講嘅四色係特別指減色法三原色加黑色⸺即係青色（cyan，C）、桃紅（「紫」、magenta，M）、黃（yellow，Y）同黑（black，K）。四色彩印嘅數學模型叫CMYK色彩模式。

黑色係分開嘅一隻油墨，主要係因為油墨並唔係純色，所以其實黑色係溝唔出嘅；其他原因包括成日要印黑色所以黑色分開一隻油墨可以慳啲、下下溝色好容易會印歪（me2）等等。

四色彩印可以印出呢四種墨溝埋表達得出嘅任何顏色，方法係將正稿分成 CMYK 四部分（呢個工序叫做分色）同落網將原色溝淺，再重疊印刷做出溝色效果。一般嚟講，四種色落嘅網並唔係一樣嘅角度，因為如果角度一樣，印出嚟會有波浪紋，例如喺北美嘅標準做法係黑色網 45 度，紅色網 75 度，青色網 15 或者 105 度，黃色網 0 或者 90 度。

四色彩印印得出嘅顏色同熒幕睇得見嘅顏色可以有好大出入，因為就算用最好嘅白紙，四色彩印都只可以印到幾千種色，同熒幕嘅16萬色相差好遠。如果一定要印其他嘅色，就只能夠用專色，即係用其他色嘅墨。

睇埋

• 彩通