國家主席存廢之爭

國家主席存廢之爭係中國喺文化大革命期間發生嘅重要歷史事件，係主張廢除國家主席嘅毛澤東同主張設立國家主席嘅林彪之間嘅政治鬥爭。呢次事件加劇咗毛澤東同林彪，當時中國共產黨一號同二號人物之間嘅矛盾，促成後來嘅毛林決裂同九一三事件，係文革嘅重要轉捩點。結果係林彪走佬墜機死咗，毛澤東喺1975年修憲廢除國家主席職務。

1966年文化大革命爆發之後，做緊中國國家主席嘅劉少奇因為同毛澤東之間嘅嚴重分歧，被作為頭號打擊目標而迅速失勢，喺1968年嘅中共八屆十二中全會上被罷免黨內外所有職務，開除出黨，第二年受迫害致死。劉少奇被罷免之後，國家主席嘅位置空咗，當時兩個國家副主席宋慶齡同董必武名義上代理主席職務，不過無以副主席嘅身份繼任國家主席。

劉少奇死咗之後，毛澤東想廢咗國家主席，不過受到林彪同周恩來等人嘅阻擾，喺1970年嘅中共九屆二中全會，林彪同佢嘅盟友陳伯達更發表「天才論」，鼓動毛澤東以中國共產黨中央委員會主席嘅身份兼任國家主席。毛澤東講過好多次唔會做國家主席，反而懷疑已經做咗黨內唯一副主席嘅林彪想自己做國家主席，對佢嘅動機反感，兩個人嘅關係開始惡化。

1971年九一三事件爆發，林彪走佬不過死喺墜機意外，國家主席嘅存廢之爭告一段落。不過毛澤東無馬上廢除國家主席嘅職務，反而喺1972年畀董必武做「中華人民共和國代主席」。到咗1975年第四屆全國人民代表大會召開，通過新嘅《中華人民共和國憲法》，正式用修憲嘅方式廢除國家主席同副主席嘅職務。