國王生咗對驢耳
國王生咗對驢耳係希臘神話一個故事，講到具有「黃金之觸」嘅國王邁達斯喪失咗自己嘅神力同財富之後，畀太陽神阿波羅變咗佢對耳仔做驢耳。
內容
[編輯]睇埋：邁達斯
故事嘅主角係國王邁達斯。佢經歷「黃金之觸」嗰單嘢之後變到憎恨財富同奢華，於是就搬咗去鄉下，成為田野同薩佗之神阿潘嘅信徒。
有一次，阿潘好大膽，將自己嘅音樂攞嚟同太陽神阿波羅嘅比較（阿波羅除咗係太陽神，仲掌管埋音樂），然後佢竟然想挑戰阿波羅嚟場音樂比賽。山神特莫洛斯就被選為裁判。比賽開始，阿潘開始吹佢嘅牧笛，用佢嘅鄉土旋律，令到佢自己同埋佢嘅忠實追隨者邁達斯好滿意。然後輪到阿波羅表演，阿波羅彈起佢嘅七弦琴。特莫洛斯諗都唔諗就宣布贏嘅係阿波羅，而在場近乎所有人神都同意呢個決定——唯獨邁達斯表態反對，佢仲質疑判決係咪公正。阿波羅就大發雷霆：
- 「你嗰對係咩耳仔嚟㗎？！」
結果阿波羅郁手變，邁達斯對耳仔就變咗做驢耳。邁達斯見到自己對耳仔噉嘅樣，就感到好羞恥。及後，邁達斯著起大頭巾或者頭飾嚟遮住佢對耳，但係後嚟畀幫佢剪頭髮嘅人知道咗佢個秘密。理髮師口風唔夠密，佢搵咗笪草地，喺地下掘咗個窿，將邁達斯件事細細聲對住個窿講，然後再將個窿冚埋返。冇幾耐之後，有一大堆怪草由呢個窿嗰個位度生咗出嚟，佢哋仲開始細細聲講個故事，話「邁達斯國王有對驢耳仔」。
有啲版本話，邁達斯覺得自己冇面目見人，所以就飲雄黃（一種好毒嘅物質）自殺。
