土地正義聯盟

出自維基百科,自由嘅百科全書
跳去導覽 跳去搵嘢
 
土地正義聯盟
Land Justice League
 
 
 
創立2011年
象徵顏色  綠色
 
立法會議席
0 / 70 (0%)
區議會議席
1 / 21 (5%)
大埔區議會
 
政治派系泛民主派自決派
意識形態綠色政治[1]
社群主義
直接民主
環境保護主義
政治立場左翼
 
網站landjusticehk.org
土地正義聯盟發起反對官商勾結抗議

土地正義聯盟粵拼tou2 dei6 zing3 ji6 lyun4 mang4英文Land Justice League),簡稱土盟,係一個香港泛民主派(亦係自決派)嘅壓力團體意識形態派別係綠色政治

呢個組織喺2011年成立,由多個社會運動環保團體組成,主張環境保護同反對地產霸權,其後演變成一民間團體[2]

佢哋過去曾經參加反對香港高鐵運動、反對新界東北發展計劃香港本土運動

依家團體以個案工作、農業支援為日常工作,關注受迫遷同土地破壞嘅鄉村,支援例如橫洲等村民;同時亦有支援農場轉型以及唔同農業計劃,例如協助信芯園舉辦太陽花節、組織耕種小組等。

政策綱領[編輯]

一. 城鄉共存共生 城市同鄉郊唔可能割裂,城市侵佔鄉郊絕非必然,而近年城市舊區嘅士紳化發展,並唔係港人所樂見嘅發展模式。我哋要求停止任何以規劃、發展同保育為名嘅破壞鄉郊水土、農業以及城市社區同文化嘅種種活動,堅決反對以鄉郊嘅「不可持續發展」,換取城市嘅「持續士紳化發展」,因為無論對於全球暖化、食物安全供應、社區經濟、本土文化同城市生活質素,盲目嘅土地發展,都係有百害而無一利。

我哋相信,只有恢復本土農業,香港嘅鄉郊生活先可以持續,唯有捍衛老區嘅草根生活同社區經濟,城鄉關係先可以持續發展,共存共生。

二. 保育生態環境 環保唔應該只係為下一代,人類作為自然世界嘅一分子,有責任確保鳥獸昆蟲能夠同我哋共存共生。近年,因為規劃失誤、跨境基建同環境政策嘅缺漏,已經導致大量自然生態衰退、農地棄耕、濕地填平、林木消失,充分說明過度嘅都市化,只會侵蝕本地嘅郊野公園、農地同綠化地帶等綠色空間。

我哋相信,發展應有倫理,生態應存公義,絕對唔能夠再容許土地因各種私利而將生態摧毁。

三. 捍衛居住權利 家園係我哋生命之所繫,但係近年土地商品化嘅發展,令家園淪為只會供投機炒賣圖利嘅工具,教一群視家園為根嘅市民,慘畀官商以所謂發展、公眾利益、善用空間資源為名強行迫遷。新界唔同類型社群身分所面對嘅差異對待,市區重建、環境質素同規劃發展過程中對居住權嘅漠視,造成社會上各種唔平等待遇揮之不去,抺煞人民種種基本權利。

我哋相信,居住權就係人權。我哋捍衛人民居住權利,爭取人人享有居住、參與同改造社區嘅基本權利。

四. 打倒地產霸權 地產霸權現已經成為破壞環境、壟斷經濟、摧毀社區同影響居住質素嘅核心源頭。地產商囤積農地數量驚人,全部用作投機,等待發展成為豪宅,大大扼殺咗土地各種可能性。政府持續賣地畀地產商興建豪宅,並透過更多嘅跨境基建配合跨境地產霸權,導致租金高企,教各行各業百上加斤,結果進一步鞏固地產商嘅壟斷同權益。

我哋認為,香港唔能夠再由少數地產商壟斷,主宰我哋嘅衣食住行。政府必須立即停止呢種把土地當作商品投機嘅過程,將土地孕育嘅能力,由地產商手上釋放出嚟,讓各行各業同唔同生活方式,得到基本保障,持續發展。

五. 結束官鄉商勾結 發展商唔單只喺經濟上同土地資源上實行壟斷,官(政府)、鄉(新界原居民勢力)、商(發展商)三者更加已經形成鐵三角,喺土地規劃嘅決策過程中,進行利益輸送。近年,無論係丁屋政策、收地迫遷,仲係各種大型發展規劃,都充分反映出官、鄉、商千絲萬縷嘅關係,以及佢哋對環境、文化、經濟同社區嘅負面影響。

我哋認為,過去幾十年嚟以短暫利益為盟嘅官、鄉、商勾結,必須結束,由公平、開放嘅程序同制度取代,落後於時代嘅管治同發展意識,必須中止。

六. 落實民主規劃 真正嘅民主,應該落實於人民生活嘅各個層面。依家無論城市舊區重建,抑或新界鄉郊發展,都由於土地商品化同區域融合而導致成個規劃過程由上而下,全由官僚同專家壟斷,缺乏人民嘅直接參與。當權者經常誇大香港被邊緣化,製造恐慌,強調香港唔可以經濟發展為本,就會走上末路。我哋認為,有關論述完全經唔起嚴謹嘅分析同事實嘅考驗。

議員[編輯]

區議會選舉[編輯]

選舉 民選得票 民選得票比例 民選議席 委任議席 當然議席 總議席 +/-
2011 3,416 0.29% 0 0 0
0 / 507
0
2015 1,482 0.10% 0 唔適用 0
0 / 458
0
2019 2,730 1 唔適用 0
1 / 479
1

區議員[編輯]

2019年區議會選舉入面當選嘅成員有:譚爾培[3]

區議會 選區號碼 選區 議員 備註
大埔區議會 P19 西貢北 譚爾培 同為大埔民主聯盟西貢鄉民成員
2019年區選結果
參選選區 候選人 得票 結果
2019年區議會選舉(大埔)
P19 西貢北 譚爾培 2,730票 Yes check.svgY 當選

代表人物[編輯]

同其他組織嘅關係[編輯]

2019年2月15號,蕭若元喺網台發表公開言論《理論蕭析》,表示支持喺香港大量填海造地,又指「土盟」等反對填海嘅組織其實係受到地產商資助[4]

參考[編輯]

  1. 袁彌昌 (2016-09-10). "香港新左翼的崛起". 明報. 原著喺2016-09-27歸檔. 喺2016-09-26搵到. Unknown parameter |dead-url= ignored (help)
  2. 社運戰士參選遭威嚇 若不退選菜園新村起唔成[失咗效嘅鏈]
  3. "2019年區議會選舉 - 選舉結果(大埔)". 2019-11-25. 原著喺2019-11-28歸檔. 喺2020-12-23搵到. Unknown parameter |dead-url= ignored (help)
  4. "香港的未來要如何走下去?明本志不忘初心part3". youtube. 2019-02-15.

出面網頁[編輯]