林士站鬧鬼傳說

林士站鬧鬼傳說，係指香港地鐵本來想以林士站作為港島線總站，但因為施工期間各種靈異事件，地鐵最後改為興建上環站作為港島線新總站嘅都市傳說。

傳說內容

地鐵原本想以林士站作為港島線嘅總站，但是喺興建林士站嘅時候，好多工人喺施工過程入面離奇死亡，而且好多人見到鬼魂喺月台出沒，於是地鐵以車站「為載客量不足」而暫停工程，改為喺更下層嘅位置興建上環站作為港島線新總站，而林士站起好咗嘅大堂建構，亦都由上環站接收。但靈異事件並無就此結束，相傳深夜喺封閉月台隧道嘅石磚後面，都會傳來慘叫聲，甚至有乘客闖入路軌後無故身亡，地鐵公司再為荒廢月台加上圍欄，以防再次發生事故。

關於傳說嘅真確性

林士站嘅存在，其實係政府喺70年代計劃興建東九龍綫，以林士站同埋上環街市站作為尾站，而呢兩個站喺入閘區域相通，就好似中環站同香港站相通咁。不過，政府後來決定擱置東九龍線計劃。另外，林士站同港島線呈90度角，代表根本同港島線互不相連，唔能夠連接。