林士站鬧鬼傳說

出自維基百科,自由嘅百科全書
跳去導覽 跳去搵嘢

林士站鬧鬼傳說,係指香港地鐵本來想以林士站作為港島線總站,但因為施工期間各種靈異事件,地鐵最後改為興建上環站作為港島線新總站嘅都市傳說。

傳說內容[編輯]

地鐵原本想以林士站作為港島線嘅總站,但是喺興建林士站嘅時候,好多工人喺施工過程入面離奇死亡,而且好多人見到鬼魂喺月台出沒,於是地鐵以車站「為載客量不足」而暫停工程,改為喺更下層嘅位置興建上環站作為港島線新總站,而林士站起好咗嘅大堂建構,亦都由上環站接收。但靈異事件並無就此結束,相傳深夜喺封閉月台隧道嘅石磚後面,都會傳來慘叫聲,甚至有乘客闖入路軌後無故身亡,地鐵公司再為荒廢月台加上圍欄,以防再次發生事故[1][2][3]

關於傳說嘅真確性[編輯]

林士站嘅存在,其實係政府喺70年代計劃興建東九龍綫,以林士站同埋上環街市站作為尾站,而呢兩個站喺入閘區域相通,就好似中環站同香港站相通咁。不過,政府後來決定擱置東九龍線計劃。另外,林士站同港島線呈90度角,代表根本同港島線互不相連,唔能夠連接[1][3]

參考[編輯]

  1. 1.0 1.1 高街花子 (2017-11-17). "【港鐵猛鬼】上環荒廢月台林士站 石磚封隧道皆因工人離奇死亡?". 香港01 (中文). 喺2022-05-01搵到.
  2. am730. "鬼節2021|原來曾經有屈地站?!重溫5個經典地鐵鬧鬼都市傳說". am730 (中文). 喺2022-05-01搵到.
  3. 3.0 3.1 "Cyber X-Files 香港交通猛鬼傳聞-上環地鐵站的神秘月台". cyberxfiles.com. 喺2022-05-01搵到.