域托里奧·艾曼奴爾·迪·薩伏依

出自維基百科,自由嘅百科全書
跳去導覽 跳去搵嘢
域托里奧·艾曼奴爾
Victor Emmanuel of Savoie (0).jpg
2013年攝
薩伏依王朝首領
(有爭議)
在位1983年3月18號ー
前任翁貝托二世
意大利王儲
在位1946年5月9號ー1946年6月12號
前任翁貝托二世
繼任君主制畀人廢除
私人明細
配偶瑪麗娜
仔女艾曼奴爾·菲力拔托
皇族薩伏依王朝
翁貝托二世
比利時瑪麗·荷西
出世 (1937-02-12) 1937年2月12號(85歲)
意大利王國那不勒斯

域托里奧·艾曼奴爾(意大利文:Vittorio Emanuele1937年2月12號—),全名域托里奧·艾曼奴爾·阿爾卑托·卡洛·特奧多羅·翁貝托·波尼法西奧·阿瑂迪奧·達米亞路·班納甸路·占尼奧·馬利亞·迪·薩伏依(意大利文:Vittorio Emanuele Alberto Carlo Teodoro Umberto Bonifacio Amedeo Damiano Bernardino Gennaro Maria di Savoia),係那不勒斯親王、末代意大利王儲,末代意大利國王翁貝托二世個仔,目前宣稱自己係薩伏依王朝首領。

生平[編輯]

域托里奧·艾曼奴爾(前)同阿爺域托里奧·艾曼奴爾三世

域托里奧·艾曼奴爾1937年2月12號響那不勒斯出世,係皮耶蒙親王翁貝托同王妃瑪麗·荷西嘅第二個細路、第一個仔,所以佢一出世就係王位第二順位繼承人。

1946年5月9號,老豆出任國王,佢亦自然升為王儲,獲得銜頭「那不勒斯親王」。但響一個月之後嘅全民公投入面,支持改建共和國嘅人有54%、高過通過門檻,意大利於是改成共和制,薩伏依王朝玩完,域托里奧亦跟住屋企人一齊走難到葡萄牙。後嚟老豆同阿媽嘅關係實在太差,兩個人於是分開住,而域托里奧就跟住阿媽到瑞士Merlinge住。兩父子嘅關係亦一直疏遠。

佢後生嗰陣做過生意人同飛機推銷員,之後轉行做軍火商。

回國[編輯]

域托里奧·艾曼奴爾,1964年攝

由於意大利廢咗君主制,同其他歐洲國家一樣,議會立咗憲法,規定薩伏依王朝成員唔可以進入意大利國內。所以域托里奧一直致力於返鄉下。

佢一直游說意大利議會畀自己返國土,認為自己已經響外國流亡超過56年。1999年,佢到歐洲人權法院起訴意大利議會,認為佢哋長期唔畀自己返鄉下係侵犯人權。2001年9月,歐洲人權法院正式處理呢單案。

為咗得到返國嘅權利,佢放棄對意大利王位嘅請求,又承認意大利共和國。之後佢同個仔伊曼紐·菲力拔托一齊發表署名信,表示對意大利憲法嘅忠誠。

2002年10月23號,域托里奧最終可以返去意大利,憲法入面禁止薩伏依王室成員入境嘅條例亦被廢除。作為交換條件,域托里奧簽咗一項協議,佢放棄對王位嘅一切請求,又承認依家意大利政府係唯一兼合法嘅政府。

犯法[編輯]

1978年佢誤殺咗法國人德力克·哈默,之後捲入多單官司。佢響1995年畀人判「持有危險武器」罪成立,判緩刑六個月。

2006年,佢響華倫納畀人拉咗,之後畀人關響波坦察。佢嘅罪名有貪污同幫客人買春。佢嘅主審法官約翰·活郭,係一位成日處理貴族犯法案件嘅法官。幾日後,佢畀人軟禁響屋企。同年7月佢獲釋,但唔可以留響意大利。不過佢分別響2007年同2010年,畀人判無罪,甩嗮所有罪名。

爭議[編輯]

銜頭[編輯]

佢響1969年曾經自行宣稱自己係意大利國王,話係老豆同意就佢嘅職位搞公投。但有知情人士話,係因為人響葡萄牙嘅翁貝托二世單方面召見奧斯塔公爵阿瑂迪奧,要立阿瑂迪奧係繼承人,所以域托里奧就「先下手為強」。

佢響1983年老豆死咗後出任薩伏依王朝首領,但咁唔代表爭議就咁完咗。2006年,堂叔奧斯塔公爵阿瑂迪奧話域托里奧嘅婚姻係「貴庶通婚」,而且婚姻未得到翁貝托二世嘅同意,所以話佢已經唔再有繼承權。而域托里奧同阿仔一齊申請法令,要求阿瑂迪奧唔再去用「薩伏依公爵」銜頭。2010年2月,阿雷佐地方法院判域托里奧勝訴,要求阿瑂迪奧賠錢兼且唔再用「薩伏依」做自己個姓。但兩家人嘅爭議一直持續,到2021年阿瑂迪奧死咗、由艾莫恩王子繼承嗰陣都係咁。

哈默之死[編輯]

1978年8月,響卡發拿島上面,域托里奧發現自己嘅橡皮艇畀人攞走咗。佢用步槍嚟自衛,要求上返架橡皮艇,而且向橡皮艇上嘅一個人開槍。呢一槍雖然冇打中個位人兄,但就打中咗另一個叫德力克·哈默嘅男人,德力克響幾個月後傷重死咗。佢本人因而畀人拉咗。

1989年10月11號,佢畀人以「致命傷害他人」同埋「持有危險武器」兩條罪起訴。但響1991年,巴黎巡迴法院判定「致命傷害他人」唔成立,只有「持有危險武器」係成立,判佢六個月緩刑。響2006年,佢話自己「我係犯錯,但我承認我玩咗班法國佬(即係指個位法官,法官係法國人)」,令到德力克嘅細妹比吉特好嬲,要求重審。

比吉特為咗大佬一直打咗好多場官司。最終呢單嘢由記者比雅特麗切·博路瑂奧發佈,仲幫由比吉特出嘅書Delitto senza castigo入面寫序言。域托里奧話嗰本書係誹謗,但響2015年法院判比吉特贏。

反猶太主義[編輯]

2003年,域托里奧話墨索里尼嘅「反猶太法」其實冇咁得人驚。呢個講法惹起爭議。

屋企[編輯]

1969年,域托里奧同女朋友瑪麗娜

響拍拖11年之後,1971年佢同女朋友瑪麗娜伊朗德黑蘭結婚。呢場婚姻並未得到老豆翁貝托二世嘅支持,因為呢場婚姻係貴庶通婚,跟據薩伏依王朝嘅王室法律係唔畀咁樣做,翁貝托亦好多次提醒域托里奧。呢點亦成為後嚟奧斯塔公爵阿瑂迪奧攻擊佢合法性嘅把柄。

佢哋兩公婆有一個仔艾曼奴爾·菲力拔托,響1972年出世。