執行功能
_-_lateral_view.png)
執行功能（粵音：zap1 hang4 gung1 nang4），粵語中文又叫管控功能，係神經心理學上嘅概念，大致係指一系列幫手調控行為嘅認知功能。例如想像人按照自己想達到嘅目的，由若干個可能嘅行動中揀其中一個，再向身體下令要肌肉做出適當嘅行為。好似噉嘅過程會用到注意力控制同工作記憶等嘅功能[1]。
喺人類之中，執行功能主要由個腦嘅額葉掌控，當中前額皮層（PFC）零舍重要。前額皮層（因為中風或者嚴重扻親個頭等嘅原因）受損，會令到個人出現執行功能障礙，例如控制唔到衝動呀噉。此外，好似自閉症譜系等嘅障礙，都有可能左右患者嘅執行功能。呢啲情況造成嘅執行功能損傷，可以對患者嘅日常生活造成嚴重負面影響。
概念定義
[編輯]執行功能係一種「高層次」嘅認知功能。至於執行功能具體上要點定義，通常都講緊例行處理同非常規處理之間嘅「層次」差異：例行處理係指一啲已經做到熟晒、可以唔使諗就做出嚟嘅操作，例如對於普通嘅大人嘅腦嚟講，計算點樣行路同講嘢，都係能夠高度自動化做嘅運作；相對之下，非常規處理嘅情況就係講緊冇用開嘅刺激反應對應可以用，或者行為上出現咗「樽頸」（例如突然發覺自己做出咗唔恰當嘅行為）。喺呢啲情況裡便，個腦就要做所謂嘅「高低階」運算－自動化嘅處理用到「低階」嘅認知功能，而要做非常規處理，個腦就要壓抑即將會做出嘅自動化行為，期間用到「高階」嘅認知功能。執行功能就係指緊呢種由高階過程調節低階過程嘅腦操作[2]。
廿一世紀初嘅研究已經確立咗一點，執行功能有多個面向：研究顯示，參加者喺唔同執行功能測試上嘅得分雖然有正相關，但相關值唔係太高[註 1]而且呢啲相關值唔一定高過同非執行功能測試嘅得分；亦有研究者行因素分析，發現執行功能測試中嘅分數有多過獨立因素[3]；而神經研究亦表示，額葉（四大腦葉之中最近額頭嗰個）唔同部位受損，會影響唔同嘅執行功能表現。由此可見，執行功能仲可以細分好多唔同種。
量度方法
[編輯]量度執行功能有好多唔同方法。好似威斯康辛咭片分類測驗（WCST）就係其中一種常見嘅測試方式。喺呢個測驗入面，參加者會見到一啲咭片，然後要將啲咭分類。不過，佢哋唔會事先知分類準則，只會根據系統俾嘅回饋（電腦會話佢知啱定錯）嚟推斷自己分得啱唔啱。呢個測驗主要係用嚟測試參加者「心靈轉換」嘅能力：測驗開始嗰陣，首先會訓練參加者用其中一種分類方法－顏色、形狀或者數字－去分。佢哋連續答啱幾次之後（代表佢哋應該已經掌握咗規則）測驗就會突然轉規則，參加者就要重新思考（心靈轉換）用新嘅分類方法應對，而佢哋轉變嘅速度（要答錯幾多次先識轉）就反映佢哋適應規則改變嘅能力[4]。
| 範例：電腦化嘅 WCST | ||
|---|---|---|
|
呢啲測試有個共通點，就係要求參加者唔可以齋靠做到熟晒嘅反應，或者單靠刺激同反應之間嘅連繫。舉個例，有時需要：
- 抑制：要壓抑自己本能反應；
- 工作記憶：喺有干擾嘅情況之下，記住同操作資訊，維持一段時間；
- 靈活轉換：可以喺兩個或者以上嘅刺激-反應規則之間來回切換；
- 策略應用：需要自己搵出新方法或者策略嚟應對新情況；
腦部研究
[編輯]
執行功能同額葉關係密切。額葉受損嘅病人可以出現好多症狀，有時齊晒，有時可能只得其中一種。症狀包括衝動行事，或者無法長期堅持自己嘅目標，不過前額葉受損又可能導致「僵化」－舊有嘅行為已經唔再適用嘅時候，仍然無法轉換行為模式。
有神經心理學方面嘅學者提出咗一個理論框架，解釋執行功能，亦可以解釋有關額葉嘅研究結果。根據佢哋嘅框架，人嘅行為由一系列「思考或行動圖式」所控制。人重覆做出某列行為後，會有一堆行動或者認知連繫埋一齊。呢啲圖式可以透過兩種方式啟動，第一就係由環境事件觸發，例如當人揸車見到紅燈，耷逼力圖式就會觸發[註 2]。呢種由環境觸發嘅圖式，喺常規情況下足夠幫人作出合適反應。不過喺新奇、或者需要抑制原有反應嘅情況下，單靠環境觸發未必夠，所以就需要第二套系統嚟調節圖式嘅啟動。學者稱呢套系統為監控系統[6]而呢個系統係由額葉掌控。有時環境會啟動一個圖式，但另一個圖式先係恰當嘅選擇。喺呢啲情況之下，如果監控系統受損，病人就好可能會繼續選擇舊有、唔適合嘅圖式，導致行為僵化。而如果手頭上嘅工作唔係由外界提示引導嘅話，監控系統作用減弱就表示環境中嘅物件就經常會錯誤噉啟動圖式，搞到人容易分心。所以監控系統受損可以同時解釋點解病人會過度僵化又會易分心[7][8]。
額葉裡便嘅前額皮層（PFC）被指係特別適合擔當高層次調節嘅角色，噉係因為前額皮層本身唔同子區域之間有密切嘅連繫，而且佢同大部份嘅感覺同運動皮層系統都有來回嘅神經連繫，能夠負責整合感覺同運動方面嘅資訊[9]。
睇埋
[編輯]文獻
[編輯]有志攻讀神經心理學嘅學生，可以參考：
- （英文） Gilbert, S. J., & Burgess, P. W. (2008). Executive function. Current biology, 18(3), R110-R114.
- （英文） Menon, V., & D’Esposito, M. (2022). The role of PFC networks in cognitive control and executive function. Neuropsychopharmacology, 47(1), 90-103.
- （英文） Kirkham, R., Kooijman, L., Albertella, L., Myles, D., Yücel, M., & Rotaru, K. (2024). Immersive virtual reality–based methods for assessing executive functioning: systematic review. JMIR Serious Games, 12, e50282.
- （英文） Suchy, Y., Mora, M. G., DesRuisseaux, L. A., Niermeyer, M. A., & Brothers, S. L. (2024). Pitfalls in research on ecological validity of novel executive function tests: A systematic review and a call to action. Psychological Assessment, 36(4), 243.
參考
[編輯]註釋：
引用來源：
- ↑ Diamond, Adele (2013). "Executive functions". Annual Review of Psychology. 64: 135-168.
- ↑ Gilbert, S. J., & Burgess, P. W. (2008). Executive function. Current biology, 18(3), R110-R114，佢哋第一頁就講呢一點。
- ↑ Gioia, G. A., Isquith, P. K., Retzlaff, P. D., & Espy, K. A. (2002). Confirmatory factor analysis of the Behavior Rating Inventory of Executive Function (BRIEF) in a clinical sample. Child neuropsychology, 8(4), 249-257.
- ↑ Heaton, R. K. (1981). Wisconsin card sorting test. Psychological assessment resources.
- ↑ Gilbert, S. J., & Burgess, P. W. (2008). Executive function. Current biology, 18(3), R110-R114，佢哋第二頁就講呢一點。
- ↑ 英文：supervisory system
- ↑ Shallice, T., Marzocchi, G. M., Coser, S., Del Savio, M., Meuter, R. F., & Rumiati, R. I. (2002). Executive function profile of children with attention deficit hyperactivity disorder. Developmental neuropsychology, 21(1), 43-71.
- ↑ Burgess, P. W. (2004). Theory and methodology in executive function research. In Methodology of frontal and executive function (pp. 87-121). Routledge.
- ↑ Miller EK, Cohen JD (2001). "An integrative theory of prefrontal cortex function". Annual Review of Neuroscience. 24: 167-202，呢種現象表示，一個腦區嘅細胞同連繫特性，會影響佢啱做咩功能。
外拎
[編輯]
- （香港繁體） 執行功能，講到點樣協助自閉症譜系嘅細路訓練執行功能。
- （香港繁體） 研究稱人腦負責高級思維嘅前額葉皮層區最易衰老，香港文匯網
