基督教正生書院

基督教正生書院係香港一間由基督徒搞嘅私立中學，係全亞洲唯一嘅戒毒學校。學校喺大嶼山芝麻灣半島嘅下徑（又叫做霞澗或者蝦澗）。2009年大約有110個學生。學校係由而家嘅校長陳兆焯博士喺1998年創辦，校監係創立正生會嘅林希聖先生。學校內嘅學生喺入學前情緒、行為上「出現偏差」、失控（例如打交、食煙、濫藥），佔百分之九十都係由香港法庭判入去。學生喺入學嗰陣都已經係冇晒毒癮。

學校類型

正生分級為中一至中六，已獲批新高中學制/三三四課程，今年亦有20名學生合資格報考新高中文憑試，亦有報導話呢間係特殊學校。雖然正生比起一般學校嘅模式特殊，但呢種說法係唔受到教育局規範。香港而家有60間資助特殊學校，根據教育局嘅網頁，正生唔屬於資助特殊學校，而係一間私立群育中學。

創辦機構

香港社團註冊為基督教正生會有限公司，喺1985年創辦，正生會亦提供咗自願者住院輔導，住院者通常都係未成年而且受毒癮困擾嘅人，佢哋希望脫離癮癖，學習重新融入主流社會。

課程

• 預備班（中一）
• 基礎班（中二、中三）：中文、英文、數學、聖經、體育（目標為本課程）
• 會考班（中四及中五）：木工、電腦、鋼琴維修、養魚、手工藝、園藝、維修等
• 興趣班︰鋼琴、結他、理髮、烹飪、合唱、籃球、游泳等。

申請搬去梅窩爭議

正生書院芝麻灣校址，因為2007年青少年濫藥問題嚴重，學生人數突然增加近三倍，令到住宿床位唔夠、設施及資源嚴重缺乏，加上成日有大石碌落嚟，土力工程署評定校址為危險地帶，勸喻佢哋搬，因此正生申請搬去梅窩原本係新界鄉議局南約區中學嘅空置校舍，但受到部分當地嘅居民反對，並遊行抗議遷入。2009年6月21號，香港電台城市論壇喺正生書院舉行，並邀請相關官員同地方人士，討論正生書院搬校問題，同埋共同商討各種可能嘅多贏方案。專欄作家梁啟智諷刺指有人提出「為何不把正生搬到特首辦」（點解唔將正生搬去特首辦）。陳兆焯校長後來表示曾經睇過鄉議局所畀嘅6個選址分別為荃灣、元朗、西貢、上水同屯門的廢置校舍都無一個合適，表示對梅窩居民仍然有信心，同埋認為梅窩係最佳嘅選擇。部分梅窩居民認為佢冇包容以前部分當地居民嘅反對聲音。

其他爭議

2009年有報導指出基督教正生會喺福建武夷山開咗一間旅遊公司，但旅遊公司係一間集夜總會、卡拉OK、足浴、色情按摩於一身嘅淫竇。另外正生會喺國內嘅投資有成三千萬港元，佢啲資金主要來自香港正生書院嘅學費住宿收入。正生已正式入稟控告對方誹謗，案件等緊排期審理。

出面網頁

• 官方網址
• 正生會網頁