外籍家庭傭工

出自維基百科,自由嘅百科全書
Jump to navigation Jump to search
菲律賓家庭傭工組織參與香港七一遊行
一班菲律賓家庭傭工週日喺香港中環皇后像廣場聚集,背景係中銀大廈

外籍家庭傭工指喺僱主屋企打理家務嘅外國籍僱員,一般出身自收入較低嘅國家或地區,尤其常見於香港台灣新加坡等亞洲華人地區。

外傭一般職責包括照顧老人細路、煮食、熨洗衫、執屋、買家居日常用品、照顧寵物、照顧行動不便嘅僱主屋企人等。外傭處理政府容許範圍以外嘅工作有可能犯法。

經濟效益[編輯]

關於請外傭嘅經濟效益,可以想像一個簡化例子。若果一位單親阿媽有兩個幼兒需要看護,佢可以有至少三個選擇:

  1. 留喺屋企親自湊仔,佢嘅家庭收入將會係「零」;
  2. 請本地人來屋企湊仔,及打理家務。而呢位阿媽自己可以有時間出外做嘢。社會亦獲得生產力。代價係要畀本地人人工。
  3. 用最低工資請外傭。而呢位阿媽自己可以有時間出外做嘢,獲得比外傭最低工資更高嘅收入。社會亦獲得生產力。

喺啲比較富裕嘅國家同埋地區,願意擔當低薪傭工嘅本地人唔多,而僱主又唔肯出高薪請傭工。當本地失業率處於低位時,有意請傭工嘅僱主可能會難啲請到人,輸入外傭有助滿足市場需求,不過噉又會增加本地家傭喺求職同爭取改善待遇方面嘅困難。

外籍傭工嘅出現取代以前嘅媽姐本地傭人嘅角色。想像中,請傭人嘅應該係大戶人家嘅事。當然,能夠講出自己請咗外傭,亦係顯示身份嘅象徵。因為只有中等至高收入嘅職業社群,請外傭至合乎經濟效益。