若瑟 (創世紀)

  呢篇文章講嘅係創世紀入便提到，族長亞伯拉罕嘅曾孫。假如你想揾嘅係聖母瑪利亞嘅丈夫，請睇「聖若瑟」。

依幅畫描繪若瑟發嘅夢。

若瑟（天主教用嘅譯名），又叫約瑟（基督新教用嘅譯名），係希伯來聖經第一卷書《創世紀》嘅人物，雅各第十一個仔。根據創世紀入便嘅故事，若瑟嘅一眾兄長妒忌佢，將佢賣去埃及做奴隸，後來若瑟喺埃及做咗重臣，並且原諒佢啲兄弟。

家世背景

根據聖經記載，若瑟係雅各第十一個仔，由雅各同拉結所生。噉亦即係話，若瑟係亞伯拉罕嘅曾孫，以撒同利百加嘅孫，以掃嘅侄仔。

名嘅解釋

若瑟個名喺原文係希伯來文：יוֹסֵף ，羅馬化可作 Yōsēp̄ ，當中最開頭嗰個輔音用國際音標寫係 /j/ ，而依個音吻合若同約等漢字喺現代粵語中嘅讀音，即係粵拼：joek3*6 或者類似嘅音，嘅起始輔音。

根據聖經記載，若瑟能夠發有預知力嘅夢，仲識得為其他人解夢，因而喺猶太傳統中有咗個外號叫夢者若瑟，英文叫 Joseph the Dreamer ，當中 dreamer 字面意思係發夢嘅人噉解。

聖經故事

睇埋：創世紀

若瑟嘅故事，《創世紀》嘅第 37 至 50 章（後段，緊接於雅各與以掃同底拿嘅故事之後）有所記載。

故事講到，雅各同佢阿哥以掃和好一段時間之後，同家眷搬咗去迦南，過住平靜嘅生活。佢有兩個老婆，仲生咗好多個仔女，而咁多兄弟姐妹之中，約瑟係最受父親寵愛嘅。深愛若瑟嘅雅各送咗件長衫畀個仔著，依件衫彩色，若瑟成日都會著住。

隨住若瑟長大，佢嘅才能就開始展現出嚟。有一晚，佢仲夢見太陽、月亮同埋十一粒星星一齊向佢敬拜。佢將佢發嘅夢講咗畀屋企人知，佢嗰十個阿哥聽到，覺得若瑟係喺度暗示，話佢哋第時要畀若瑟統治，加上若瑟又得阿爸寵愛，結果就惹嚟一眾兄長嘅妒忌。有一日，眾兄弟同若瑟一齊出門口，佢哋以二十塊銀元嘅價格，將若瑟賣畀前往埃及嘅商人，跟住佢哋除咗若瑟件彩衫，並且殺咗隻幼羊，將幼羊嘅血淋落彩衫上帶返屋企，向雅各謊稱話若瑟畀猛獸殺死咗。信以為真嘅雅各對此感到悲痛不而。

依幅油畫，描繪若瑟畀兄長賣去做奴隸之景。

若瑟去到埃及成為奴隸。有一段時間，佢喺護衛長嘅屋企做僕人，佢幾做得嘢，但係後嚟因為畀護衛長嘅太太誣陷而入獄。但無論去到邊，若瑟都因為與上帝同在而展現出卓越嘅能力。喺獄中佢成功同法老王嘅兩個僕人解夢。過咗一排之後，法老王發咗個無人能解嘅夢，若瑟因而被召出獄。若瑟同法老王解夢，話法老嘅夢預示埃及將會有七個豐年，而跟住就係七個荒年。若瑟憑藉佢超卓嘅洞察力，畀法老升做埃及嘅宰相，權力僅次於法老，負責管理全國嘅糧食儲備。當時三十歲嘅若瑟名成利就，仲娶埋老婆成家立室。

依幅十九世紀嘅油畫，描繪若瑟喺埃及幫法老王打理糧倉。 依幅十九世紀嘅油畫，描繪若瑟喺埃及幫法老王打理糧倉。  依幅畫描繪若瑟（企喺中間嗰個）多年後同佢班兄弟重逢。 依幅畫描繪若瑟（企喺中間嗰個）多年後同佢班兄弟重逢。

接踵而嚟嘅荒年中，約瑟喺埃及嘅管理拯救咗埃及同周邊國家免於飢荒。及後為咗搵糧食，若瑟嘅一眾兄弟嚟到埃及。經過一系列考驗同安排，若瑟向佢哋表露身份，並且寬恕咗佢哋當年嘅惡行，而雅各知道佢嘅愛子未死，亦都非常高興。

依個故事最後講到雅各（被視為以色列人嘅先祖）舉家遷居埃及，而雅各一路活到 147 歲先過身，期間佢一路睇住自己嘅族人喺埃及繁衍，過住舒適嘅晚年生活。而若瑟就活到 110 歲至過身，遺體存放喺埃及。

以色列嘅族人喺埃及定居，亦帶到後續《出埃及記》嘅故事。

傳統詮釋

若瑟嘅故事，廣泛被視為信心、喺苦難中順服上帝嘅重要體現，而且佢亦被指係展現咗寬恕嘅美德。

猶太教

喺猶太傳統之中，若瑟係以色列人嘅重要祖先。

有啲猶太人亦留意到，若瑟同佢阿爸有唔少相似之處，例如兩個人都爭啲畀自己嘅兄弟殺害。

至於點解雅各咁寵愛若瑟，有一種講法係話因為若瑟個樣生得好似阿爸。

睇埋

• 勒烏本
• 創世紀
• 出埃及記

引述

參考文獻：

• Lang, Bernhard (2009). Joseph in Egypt: A Cultural Icon from Grotius to Goethe. Yale University Press. ISBN 978-0-300-15156-5.
• Redford, Donald B. (1970). A study of the biblical story of Joseph: (Genesis 37–50). Leiden: Brill.