大佛寺 (廣州)

出自維基百科,自由嘅百科全書
大佛寺
廣州市文物保護單位
喺邊廣州市越秀區
古、近代建築
時代大清
登錄1993年
地圖
Map

大佛寺粵拼daai6 fat6 zi2英文Great Buddha Temple),之前叫新藏寺san1 cong2 zi2)、福田庵fuk1 tin4 am1);佢係中國廣東省廣州市嘅其中一間佛教寺院,喺越秀區入面。東邊靠住北京路步行街嘅臨街商舖,南邊靠住惠福東路,西邊靠住惠新西街,北邊靠住西湖路。呢間寺院係廣州五大叢林古寺嘅其中一間寺院。

歷史[編輯]

寺名嘅變遷[編輯]

其實佢一早就唔係嗌「大佛寺」嘅名,而係嗌「新藏寺」,嗰時係南漢時期(917——971年)啱啱起好咗無耐喇。而南漢時期嘅開國高祖——劉龑,因為佢唔單止信佛教,重鍾意同宮殿差唔多樣嘅建築,所以佢喺廣州城區嘅東南西北四個角落頭嗰邊,都起咗7座佛寺嚟應返天上嘅廿八宿。而呢廿八間佛寺就俾人話咗係「南漢廿八寺」[1]。到咗宋朝嗰陣,新藏寺同廿八寺入面嘅其它寺都逐渐噉廢嗮。而到咗元朝又整大咗,變成「福田庵」[1]。到咗明朝初期,朱元璋坐緊王位嗰陣又整大咗,嗰時又改咗名嗌「龍藏寺」。而明朝尾嗰陣因佛教式微,加上大佛寺嘅香火都留唔住,所以就變咗間巡按御史公署。

清朝[編輯]

清朝嘅尚可喜上緊台時,雖然1649年間廟因大火而燒冧咗,但喺1663年,又喺龍藏寺嘅廢墟度逳手,重新起過間廟,直到1664年起好[1]。而起好咗間廟之後,由於放咗三尊用銅整嘅佛像喺度,所以「大佛寺」嘅名就係噉嚟。

康熙六年(1667年),尚可喜個仔尚之隆畀朝廷招咗做額駙,同固倫公主返廣東省親,請咗以班禪喇嘛為首嘅藏傳佛教高僧四十幾人一齊到廣州 ,駐錫大佛寺,舉辦咗49日嘅「無遮勝會」。[2]而1733年,朝廷重向成個大清國嘅佛門度派諭旨嚟整頓沙門。而廣州知府揀咗喺大佛寺度讀諭旨,重喺嗰度起咗間宣諭亭。嗰時大佛寺去到有史以嚟,最犀利嘅一次。嗰時有好多僧人住咗喺呢間寺入面,加上好多香火喺度。而乾隆時期都整大咗,變成廣州五大叢林嘅其中一個。

林則徐喺1839年以欽差大臣嘅身份嚟咗廣州度查鴉片。而佢嚟咗呢度就爲咗查清朝啲鴉片嘅真相,就先扮成平民同第啲身份,而過咗3日嘅調查同暗訪,先至揀咗大佛寺度搞禁煙總局嚟指揮禁煙。而林則徐喺查緊禁煙嗰陣,成日打擊煙商同煙販,甚至揼到盡咁滯,重向埋啲煙民話戒煙都有。喺佢發咗份《曉諭粵省士商民人等》連戒鴉片告示》之後,好多人就決定去戒煙,甚至重將煙具丼咗都有。但係有咗煙癮同埋食咗煙好耐嘅煙民就話戒唔到,唔食就好似冇乜力噉。而林則徐睇到有咗煙癮同埋食咗煙好耐嘅煙民嘅辛苦情況之後,決定嗌人整個戒煙糖出嚟,就規定啲煙民如估將煙具丼咗佢嘅話,過嚟大佛寺度攞戒煙糖,甚至人人有份都得。結果噉就搞咗極大反響,有好多有咗煙癮同埋食咗煙好耐嘅煙民,甚至差唔多冚唪唥嘅普通煙民都俾佢嘅獎鼓勵咗,而加入戒煙嗰行。 由於廣州政府喺太平天國嗰陣霸咗大佛寺西邊大部分嘅樓嚟做市政公所,搞到寺入面嘅僧都冇得話事。而間寺凈係得返3個人都有。[未記出處或冇根據]

中華民國[編輯]

喺1921年,六榕寺海幢寺、大佛寺、光孝寺呢啲住持同陳秉前、梁季寬、湯瑛等夾埋卅幾個人一齊嚟整咗間「廣州佛教閱經社」。佢噉做係為咗宣傳佛教嚟淨化世道人心。而佢哋就將佛教月經社整喺大佛寺入面,結果俾孫文讚咗。而孫文重負責寫咗「闡揚三密」呢四個字嘅牌。[1]嗰時嘅廣州市長——孫科,就根據公安部門嚟睇吓點算,結果俾佢批准咗。最後嗰時廣東省政府話唔畀出面啲外省派軍隊嚟干涉大佛寺,搞到宗教苙苙亂。

喺民國初期,由於軍閥成日喺度打仗,加上又冇乜國庫響度,結果孫科喺1921年做咗廣州市長之後,就將間大佛寺當成係公家嚟拍賣。佢喺1924年同財政廳、廣東省公路署一齊將成間大佛寺又拍賣咗出去。結果咁大規模嘅寺就喺呢度俾孫科搞咗一筆OUT消喇。

而大佛寺嘅僧人收到噉嘅料就激到眼火爆。而住持敬勝和尚同埋卅幾個僧人、重有閱經社入面嘅人一齊,去嗮省府嗰邊搞抗議,寫請願書都有。嗰時陳濟棠收到噉嘅事之後,即刻派人去大佛寺度調查,最後先至知大佛寺係舊時龍藏寺嘅一笪地,而且歷史都好耐吓,有文物價值響度,甚至孫文喺呢度搞佛教月經社嘅歷史都喺埋度。而之前充公賣咗嘅某洋行喺運輸嗰陣,因鋼繩斷咗而搬唔到就算喇;但係嗰時啱啱拍賣咗嘅大佛寺房產俾興業公司房東買咗返嚟。[未記出處或冇根據]

中山艦事件之後,軍事委員會政治訓練部喺1926年5月22號——7月底派周恩來到大佛寺到大殿後面嘅東西兩條走廊度搞高級政治訓練班,出咗50幾位學員嚟參加北伐戰爭

1932年,嗰時嘅廣州市警察教練所夾硬借住大佛寺嚟做基地,後嚟經過姜西園呢位海軍司令自己出鏡嚟話退先至得。之後,姜西園重請咗雲南嘅月溪法師嚟呢間寺入面宣傳佛教。後嚟聽眾越嚟越多,重出版咗弘揚佛教文化嘅細單張,重吸引咗好多嘅知識分子嚟大佛寺度學佛教都有。就喺第二年(1933年),謝英伯同莫秀英一齊大力出錢重新整個間大佛寺。

第二次中日戰爭[編輯]

1938年,由於蘿蔔頭打仗殺到廣州,搞到好得人驚,連寺僧都鷄噉腳走嗮佬,凈係得返3個人喺度睺實山門。而日本偽政府嘅郵電部門霸咗大佛寺一部分地區嚟擺電信器材,直到1945年8月15號,蘿蔔頭投咗降之後先至畀返僧人繼續宣傳佛教。[1]

中華人民共和國[編輯]

喺1949年11月22號,廣州軍管會郵電部門俾軍管會主任葉劍英批准咗喺大佛寺入面辦郵電員工訓練班一直到1950年1月份,變成郵電工人子弟學校。不過喺20世紀50年代,重有10幾位僧人嚟睺住間寺唔畀人入嚟,但嗰時冇乜同佛教有關嘅嘢入嚟,更加唔使問啲人客喇,結果僧人就搞得好唔掂。而廣州市政府一方面為咗畀宗教可以有得宣傳同實行宗教信仰自由,而另一方面幫僧人搞生產嚟度過難關。就喺1956年,郵電工人子弟學校同埋郵電員工訓練班就搞唔掂喇,唔單止合併咗,相反重搬埋出大佛寺,去咗第度。而越秀區教育部門就喺之前郵電工人子弟學校嘅位度跟住辦惠新西街小學。

文化大革命[編輯]

喺1966年,由於文化大革命嘅爆發,紅衛兵就按當局話破四舊思想,結果將三尊佛像同觀音菩薩像都從大佛寺嗰度清咗出去,跟住送到南岸路嘅五金廠倉庫去搞金屬冶煉。但因周恩來話佢係古董唔係四舊先至有得留返響度。喺1972年尼克遜訪問中國嗰陣,因外交需要而去咗六榕寺度,就將之前按破四舊意思話拆走銅像嘅嘢搵返出嚟,之後焊接重還原返,最後畀咗六榕寺嗰邊。

1980年代打後[編輯]

到咗1982年,廣州市政府再出錢還原返大佛寺出嚟,喺1984年嘅大雄寶殿起好之後,就將之前嘅銅像搬返入去,之後由信徒嚟負責捐錢搞返入面啲嘢。而家喺大佛寺入面見到嘅三尊大像都係按返原版嚟重新整過嘅[1]。而1986年嗰陣先至對外開放,甚至喺1993年8月9號公佈咗係廣州市嘅文物保護單位

大佛寺圖書館舊址,間嘢喺2019年1月26號因大佛寺擴建南廣場而拆咗。

2000年9月,廣東省第一間開放嘅佛教圖書館喺大佛寺度正式開張[3]。而北邊嘅弘法大樓喺2011年初逳手重新起,一直到2016年1月15號起好[4],2017年7月20號通過一期嘅完工驗收。大佛寺圖書館喺2018年春節期間入駐毗盧殿之後,原先嘅佛教圖書館舊址喺2019年1月26號拆咗。

建築[編輯]

大佛寺圖書館[編輯]

大佛寺圖書館係2000年9月份成立嘅一間面向社會開放嘅現代化圖書館,喺寺院嘅東邊。之前起緊嗰陣得664平方米嘅佔地面積,後嚟搬咗去新址之後就整大到超過1200平方米嘅佔地。2003年,大佛寺圖書館變成廣東省立中山圖書館佛教分館。而2008年,中山圖書館就搬咗嚟一笪乞返嚟嘅舊寺用地嗰度。而間館入面㔷咗超過18000種150000萬本唔同品嘅佛教書同其他書響度[5],包括《大正藏大藏經》、《乾隆大藏經》、《頻伽大藏經》、《洪武大藏經》等經典[6]。館入面唔單止整咗互聯網,重整埋視聽室出嚟。而大佛寺圖書館都會定期搞講經說法、弘法利生嘅活動,成日俾人話係「繁華都市入面嘅一笪乾淨地區」[7]

不過間嘢喺2019年1月初施工時,圖書館搬入毗盧殿,佢嘅舊址喺同年1月26號正式拆咗。

弘法大樓[編輯]

弘法大樓係大佛寺嘅一個地標建築,喺寺院嘅北邊。好耐之前未有呢間大樓,直到2011年,大佛寺嘅擴建工程開始喐手起,2016年1月15號大樓正式起好。間樓係仿古樓閣式建築,總共有9層樓(地上7層樓,地下2層樓),佔地2354.1平方米,建築面積18834平方米。其中1~2樓係毗盧殿;3樓係大禮堂同講壇;4樓係佛經堂;5樓係廣東第一間佛教圖書館;6~7樓有禪堂同萬佛閣;東邊嘅副樓重有素食閣,書畫藝術展覽室同方丈室[8]。大樓嘅內部裝飾同舊時啲樓閣式建築相比,多咗好多現代化嘅電子產品同裝備。

[編輯]

[編輯]

  1. 1.0 1.1 1.2 1.3 1.4 1.5 《法讯》编辑部,千年沧桑 圣迹犹存 互聯網檔案館歸檔,歸檔日期2014年9月13號,.
  2. 广州图书馆·行走·尚可喜:是非成败转头空. www.gzlib.org.cn. 喺2023-10-28搵到.
  3. 广. 原著喺2016年3月6號歸檔. 喺2014年11月10號搵到.
  4. 大佛寺弘法大楼落成[失咗效嘅鏈] 信息时报 (2016-01-16 A05版)
  5. 广. 中国佛学网. 2008-06-03. 原著喺2012-07-22歸檔. 喺2011-02-05搵到.
  6. 温金玉 (2007-11-21). . 广东省佛教协会. 原著喺2012-08-01歸檔. 喺2011-02-05搵到.
  7. 刘向明 (2010-01-07). 广. 中华宗教文化交流网. 喺2011-02-05搵到.{{cite web}}: CS1 maint: url-status (link)
  8. 大佛寺弘法大楼落成 成北京路又一旅游地标 互聯網檔案館歸檔,歸檔日期2020年3月16號,. 奥一网 (2016-01-18)

出面網頁[編輯]