跳去內容

天寶·葛蘭汀

出自維基百科，自由嘅百科全書
瑪麗·天寶·葛蘭汀
葛蘭汀，2011年
姓名原文Mary Temple Grandin
出生日 (1947-08-29) 1947年8月29號（78歲）
出生地美國麻薩諸塞州波士頓
本名Mary Temple Grandin
國籍美國 喺Wikidata改呢個
識嘅語言英文 喺Wikidata改呢個
母校
職業動物學家、作家、activist、非虛構文學作家、大學教員、編劇、獸醫、講師 喺Wikidata改呢個
僱主Colorado State University、University of Colorado 喺Wikidata改呢個
亞爸Richard McCurdy Grandin 喺Wikidata改呢個
亞媽Eustacia Cutler 喺Wikidata改呢個
網站grandin.com

瑪麗·天寶·葛蘭汀（Mary Temple Grandin，1947年8月29號—）係美國一位學者、發明家同動物行為學家。佢係一位人道對待待宰牲口嘅倡議者，發表過超60份關於動物行為學嘅科學論文。葛蘭汀係位畜牧業顧問，為動物行為提供專業意見 [1]。

葛蘭汀寫低咗自己因自閉症先有嘅經驗，並從中獲得嘅獨到見解。佢係首批將呢啲經驗同見解記錄底嘅自閉症患者之一。佢係科羅拉多州立大學農業科學學院動物科學系嘅教職員 [2]。

係2010年，美國《時代》雜誌將葛蘭汀列為全球最具影響力嘅100人之一，並將佢列係「英雄」類別中 [3]。同年，以葛蘭汀為主角嘅傳記電影《星星的孩子》（Temple Grandin）贏得黃金時段艾美獎同金球獎。

早年生活

[編輯]

家庭

[編輯]

瑪麗·天寶·葛蘭汀生於麻薩諸塞州波士頓嘅一個富裕家庭。因為佢屋企嘅其中一個僱員都叫瑪麗，為免混淆，大家都叫葛蘭汀做天寶，佢個中間名 [4]。天寶嘅母親安娜·厄斯塔西亞·珀維斯（Anna Eustacia Purves，之後改姓卡特勒（Cutler））係一位女演員同歌星，亦係約翰·科爾曼·珀維斯（John Coleman Purves，航空自動駕駛儀嘅發明人之一）嘅孫女。佢仲有哈佛大學嘅英語學士學位 [5]。天寶嘅父親係李察 ·麥柯迪·葛蘭汀（Richard McCurdy Grandin），一位地產代理同葛蘭汀農莊嘅繼承人。葛蘭汀農莊係當時全美國規模最大嘅小麥農業企業 [6]。葛蘭汀嘅父母係佢15歲時離婚，而佢母親其後係1965年改嫁班·卡特勒（Ben Cutler），一位紐約市嘅色士風演奏家 [7]，當時葛蘭汀18歲。

葛蘭汀有三個細佬妹：兩個細妹，一個細佬。葛蘭汀形容佢其中一個細妹有讀寫障礙。佢一個細妹係藝術家；另一個係雕塑家；細路係銀行家 [6][8]。莊·李維斯頓·葛蘭汀（John Livingston Grandin，天寶嘅太爺）同佢細路威廉·占士·葛蘭汀（William James Grandin）係法國預格諾派信徒，佢哋以採石油起家。莊·葛蘭汀原本打算同約翰·D·洛克菲勒（John D. Rockefeller）開會傾生意，但後者遲遲未到，於是佢唔等人嚟就走咗。三兄弟轉戰銀行業，當傑·庫克（Jay Cooke）嘅公司破產時，佢哋收到北達哥他州千英畝未開發嘅土地作為債務抵押品。佢哋係紅河谷（Red River Valley）開設小麥農莊，又起咗宿舍比工人住。北達哥他州嘅葛蘭汀鎮（Grandin, North Dakota）就係以莊·李維斯頓·葛蘭汀嚟命名 [5][9]。

雖然葛蘭汀自細就係聖公會信仰熏陶下長大，但佢年幼時就唔相信世上有神祇或上天旨意，反而傾向更科學嘅觀點 [10] :282。

診斷

[編輯]

直到成年前，葛蘭汀未被正式診斷為自閉症患者。唯一嘅正式診斷係腦損傷，當時佢兩歲 [11][12]。而呢個診斷係2010年葛蘭汀63歲時，比係猶他大學做嘅神經造影推翻 [13]。係葛蘭汀仲係青少年時，佢母親係機緣巧合下發現咗自閉症診斷清單。審視清單後，佢母親推測自閉症係最適合形容葛蘭汀嘅狀況。葛蘭汀後來被判定為有學者症候群嘅自閉症人士 [11][14][15][16][17]。

童年早期

[編輯]

係葛蘭汀仲係小朋友時，當時嘅醫學建議認為，好似葛蘭汀呢種狀況嘅人，最好入住精神療養機構接受治療 [18]，而呢個方法令葛蘭汀嘅父母因意見分歧嗌晒大交。佢父親想送個女入院，而母親就堅決反對 [19]。

葛蘭汀嘅母親帶佢去波士頓兒童醫院，去見世界一流、專門研究特殊需求嘅學者，希望可以搵到唔洗入院嘅治療方法。佢母親終於搵到位腦神經科醫生，醫生建議試下言語治療。於是係葛蘭汀兩歲半時，請咗位言語治療師，度身訂做咁訓練葛蘭汀 [20]。之後係葛蘭汀三歲半時，佢母親請咗位保姆，輪流同葛蘭汀以及佢妹妹玩。葛蘭汀係Dedham Country Day School讀幼稚園。佢嘅老師以及同學都嘗試幫佢營造一個切合佢需求同敏感特質嘅環境。 葛蘭汀表示，佢好慶幸由小學開始就遇到不斷支持佢嘅恩師們；不過葛蘭汀亦吐露中學時期係佢一生中最難捱嘅時刻 [21]。

中學時期

[編輯]

葛蘭汀係海狸國家走讀學校（Beaver Country Day School）讀七年級至九年級。係14歲時，葛蘭汀被退學，因為佢向一位嘲弄佢嘅同學掟書。葛蘭汀形容自己為一個「又呆又怪嘅細路（nerdy kid）」，每人都奚落佢。葛蘭汀描述，當佢行過學校走廊時，佢嘅同學會叫佢做「錄音機」，因為佢有口語固著（重複又重複同一句話）。葛蘭汀係2012年表示：「我依家可以笑看往事，但當時真係好痛苦 [22]。」

係葛蘭汀被退學1年後，佢嘅父母離咗婚。3年後，葛蘭汀嘅母親嫁咗比班·卡特勒，一位紐約市嘅色士風演奏家 [7]。係葛蘭汀15歲時，佢係班·卡特勒嘅姊妹安（Ann）係亞利桑拿州嘅牧場度過咗一個夏天，而呢段經驗為佢日後嘅工作取向奠基。

葛蘭汀被海狸國家走讀學校退學後，佢母親幫佢註冊咗位於新罕布什爾州林奇嘅漢普郡鄉村學校（Hampshire Country School）。呢間學校由兒童心理學家亨利·帕提（Henry Patey）係1948年創辦，專為那些「天賦異稟，但比主流學校埋没」嘅學生而設。葛蘭汀被取錄，仲成為咗呢間學校嘅冬季嘉年華皇后同曲棍球隊隊長。

一啲報告同文獻提到葛蘭汀所讀嘅學校有唔同嘅名：Beaver Country Day School或 Cherry Falls Girls' School（後者係第一本書《星星的孩子—一個畜牧科學博士的自閉症告白》（Emergence: Labeled Autistic）中出現）；仲有Hampshire Country School或 Mountain Day School （後者係葛蘭汀早期嘅書出現）。 係漢普郡鄉村學校，葛蘭汀認識了威廉·卡洛克（William Carlock），一位曾係NASA工作嘅科學老師。佢係葛蘭汀嘅良師益友，對葛蘭汀建立自信心起咗極大幫助 [23]。


係葛蘭汀由佢阿姨亞利桑拿州嘅農場返黎，讀高中最後一年時，卡洛克鼓勵葛蘭汀實踐自己嘅想法，起一部擁抱機（hug box）出嚟 [23]。葛蘭汀18歲時，佢仲係漢普郡鄉村學校讀緊書時，係卡洛克同學校創辦人亨利·帕提嘅支持下，葛蘭汀起咗部擁抱機 [24]。即使係離校之後，卡洛克依然係葛蘭汀嘅生命中扮演支援角色。睇在亨利·帕蒂份上，呢座新起嘅、離漢普郡鄉村學校5英里嘅富蘭克林·皮爾斯大學（Franklin Pierce College）嘅校長，係冇一般高中生嘅成績表以及學籍紀錄下，破格取錄葛蘭汀。當葛蘭汀係大學因擁抱機飽受批評時，係卡洛克建議佢用科學實驗嘅方式評估擁抱機嘅成效 [23]。正正係因為卡洛克不斷嘅引導，葛蘭汀重新審視自己對擁抱機嘅執念，並將佢轉化為有建設性嘅課題。正因如此，呢項由葛蘭汀親自完成嘅研究其後被廣泛引用，並成為葛蘭汀機智聰慧嘅有力證據。

高等教育

[編輯]

1966年葛蘭汀係漢普郡鄉村學校畢業；1970年於富蘭克林·皮爾斯大學取得人類心理學學士學位；1975年於亞利桑那州立大學（Arizona State University）取得動物科學碩士學位；1989於伊利諾大學奧班拿-香檳分校（University of Illinois at Urbana–Champaign）取得動物科學博士學位。取得博士學位後，葛蘭汀係1990年成為科羅拉多州立大學（Colorado State University）嘅教授，自此一直係動物科學部門任教 [25]。

職業生涯

[編輯]

自閉症光譜

[編輯]

係史提夫.西爾貝曼（Steve Silberman ）嘅《自閉群像》（NeuroTribes）一書中寫道，葛蘭汀幫手打破自閉症多年來嘅羞恥同污名，因為佢係最早公開透露自己係自閉症人士嘅其中之一。伯納·林姆蘭（Bernard Rimland），一位個仔有自閉症嘅父親同《嬰兒自閉症》（Infantile Autism）嘅作者，幫葛蘭汀嘅第一本書《星星的孩子—一個畜牧科學博士的自閉症告白》（Emergence: Labeled Autistic）寫前言。葛蘭汀嘅書係1986年出版。林姆蘭寫道：「天寶有能力向讀者傳達佢內心深處嘅感受同恐懼，再加上佢對心理歷程嘅解釋，兩者相輔相成，令讀者對自閉症有更深刻嘅理解，真係冇幾多人可以做到。」

係《Developing Talents, 2nd Edition》中，葛蘭汀探索咗好多被忽略嘅職業性復康計劃，呢啲計劃供職業培訓同實習比殘疾人士。社會保障署（Social Security Administration）亦提供包含就業輔導嘅計劃。

喺佢後期（1995年）出版嘅書《Thinking in Pictures》入面，神經科醫生奧利弗 · 薩克斯（Oliver Sacks）喺前言嘅結尾寫道「呢本書『提供咗一道橋樑，連接我哋嘅世界同佢嘅世界，令我哋可以一窺一種截然不同嘅心靈世界』。」

係葛蘭汀早期嘅寫作中，佢定義自己係康復咗嘅自閉症患者。係伯納·林姆蘭嘅前言中，佢就用咗自閉症復康人士（recovered autistic individual）呢個詞。不過係葛蘭汀後期嘅寫作中，佢放棄咗呢個形象刻畫。史提夫.西爾貝曼寫道：「葛蘭汀慢慢發覺，佢唔係好番咗，而係用好大努力去應身邊人嘅社會規範。」

葛蘭汀表示，佢係1995年出版嘅書《星星的孩子：自閉天才的圖像思考》（Thinking in Pictures）中寫道，佢相信所有自閉症人士都同佢一樣，係用具體嘅相片式心象（photographic-specific images）嚟思考。係2006年出版嘅修訂本中，葛蘭汀發現假設所有自閉症人士嘅思考方式都同佢一樣係錯嘅。係2006年嘅修訂本中，佢寫道，自閉症人士有三種特化嘅思維模式：

  1. 同佢一樣係圖像思考者，以具體嘅相片式心象嚟思考；
  2. 音樂同數學嘅思考者—運用模式同規律嘅抽象化思考，可能擅長數學、棋藝同電腦程式；
  3. 言語邏輯思考者—以鉅細靡遣嘅文字資訊嚟思考，葛蘭汀提及佢最鍾意科目可能係歷史。

葛蘭汀後期寫嘅其中一本書，《我的大腦和你不一樣: 看見自閉症的天賦優勢》（The Autistic Brain: Thinking Across the Spectrum），進一步拓展咗自閉症人士三種思維模式呢個概念。呢本書係2013年出版。克拉拉·克萊本·帕克（Clara Claiborne Park）係2001年出版嘅書《Exiting Nirvana: A Daughter's Life with Autism》對葛蘭汀有深遠影響，幫助佢發展出「模式同規律嘅抽象化思考」呢一概念。《我的大腦和你不一樣》一書中涵蓋大量科學研究，提供有力證據證明具現化視覺思維（object-visual thinking）同空間視像智能（spatial-visualization abilities）係兩回事。

喺奧利佛·薩克斯喺1995年所著嘅《火星上的人類學家》（An Anthropologist on Mars）被提及後，除咗係美國自閉症社群外，葛蘭汀都有好高知名度 [10]:244–296。呢個書名衍生自葛蘭汀嘅描述，形容佢對身處神經典型人（neurotypical people）周遭嘅感受。在1980年中葉，葛蘭汀應露絲·沙利文（Ruth C. Sullivan）之約，第一次就自閉症進行公開演講。露絲·沙利文係美國自閉症協會（Autism Society of America，ASA）嘅始創人之一。佢寫道：

「
我第一次見到天寶係喺1980年中葉嘅ASA年度大會。一位年輕高䠷嘅女子企喺人群嘅旁邊，顯然對佢哋嘅討論深感興趣。佢比人一種怕羞又和善嘅感覺，佢靜靜咁 聆聽住。我知道佢叫天寶·葛蘭汀。不過我果個禮拜後期先發現原來佢係位自閉症人士。我聯絡佢，問佢願唔願意係下年嘅ASA年度大會發表演講，佢答應咗。係第二年，天寶第一次對ASA嘅聽眾發表講話。會場觀者如堵，個個意猶未盡。呢度，第一次有人可以憑經驗話比我哋知，對聲音異常敏感係點嘅一回事（好似比人綁係路軌上而地鐵轟隆轟隆駛埋嚟）。佢被問及好多問題：「點解我個仔成日轉圈圈？」「點解佢用手揞住耳仔？」「點解佢唔肯望住我？」佢用佢自身嘅個人經驗回答，佢嘅洞見令人印象深刻。果日，唔止一雙眼眼泛淚光。好快天寶係自閉症社群中變成紅透半邊天嘅演講者。
 」

[26]

基於個人經驗，葛蘭汀提倡自閉症嘅早期介入處理，同埋要有給予支持嘅老師，佢哋可以將自閉症兒童嘅固執行為轉化向有建設性嘅方面發展。葛蘭汀描述過佢對噪音以及其他感官刺激嘅高敏感性。佢表示言語係佢嘅第二語言，佢「完全以圖像方式思考」，透過大量嘅圖像記憶將資訊轉化成心理投影片，並且能夠係腦中操作同連結圖像 [27]。葛蘭汀將佢作為人道畜牧場設計師嘅成功，歸因於佢可以回想細節嘅能力，而呢份能力係圖像記憶嘅特點。葛蘭汀將佢係記憶比喻為腦中嘅長篇電影，可以按心意隨時播放，令佢可以連細枝末節都留意到。佢仲可以改變光影嘅位置，喺稍微唔同嘅情境下檢視記憶。

葛蘭汀唔贊成徹底根絕自閉症嘅基因同反對治療一啲自閉症「輕微」嘅人士 [12][28]。不過，佢認為果啲嚴重失能同無法言語嘅自閉症兒童須要「比如［應用行為分析］治療［...］令佢哋正常生活 [12]。」喺佢嘅書《星星的孩子：自閉天才的圖像思考》中，佢提出「理想嘅世界中，科學家應該搵出方法，防止重度自閉症，但容許比較輕微嘅自閉症存在 [29]。」喺2022年3月葛蘭汀官網常見問題嘅更新中，佢反對批評家將佢嘅諗法定位為優生學 [30]。

葛蘭汀批評《精神疾病診斷與統計手冊》第五版（DSM-5）係2013年關於自閉症相關診斷嘅更新。係2022年一個採訪中，葛蘭汀被問及相關更新，佢表示：

 

「
自閉症嘅光譜太廣，根本不合理。難道我哋要將唔識自己着衫嘅重度自閉症患者，同係矽谷工作嘅輕度自閉症人士歸為同一類別？佢亦令冇學好生活技能呢個問題更嚴重—因為即是喺有少少宅嘅小朋友都被標籤喺光譜上。不過呢個標籤可能喺人際關係上有啲幫助—可破除誤解。
 」

[31]

係安德魯·韋克菲爾德（Andrew Wakefield）於1998年發表嘅造假研究，錯誤咁指出自閉症同MMR疫苗（麻疹、流行性腮腺炎及德國麻疹混合疫苗）有關聯性嘅15年之後 [32][33]，葛蘭汀公開推測自閉症同疫苖可能存有因果關係，特別係打完疫苖就變得唔講野嘅兒童 [34][35][36][37]。2022年1月葛蘭汀拒絕紐約時報就呢個問題嘅採訪，儘管採訪員再三遊說 [38]。

喺2022年3月，葛蘭汀喺波士頓大學舉辦過一場公開活動 [39]。（英文原文有誤）

牲畜管理

[編輯]

係1980年，葛蘭汀發表咗頭兩份科學論文，探討肉牛喺管養下嘅行為：分別喺《International Journal for the Study of Animal Problem》第一期33-52頁，同《Applied Animal Ethology》第六期19-31頁發表嘅「牲畜行為同設施設計嘅關係」以及「牛隻行為觀察喺牛隻管養設施設計上嘅應用」。佢喺最早發現動物對環境具敏感性嘅其中一個科學家，比如管養設施中嘅影子、晃動嘅鏈、以及其他幾乎冇人留意嘅環境細節。

葛蘭汀係伊利諾伊大學厄巴納-香檳分校攞到博士學位，佢研究環境豐富化對豬隻嘅影響。佢博士論文嘅標題喺「飼養環境同環境豐富化對幼豬行為同神經發展嘅影響」。佢喺著作《Animals Make Us Human》中擴展同深化呢套理論。


喺2008年，葛蘭汀同佢嘅長期合作伙伴（Mark Deesing）出版咗《Humane Livestock Handling》[40]。呢本書概述牛隻行為嘅各個主要面向，以及提供建築計劃同藍圖嘅圖解指南，以實踐葛蘭汀關於人道生畜管養嘅諗法。葛蘭汀好多係書中提倡，關於牲畜管養領域同牲畜管養系統設計圖嘅貢獻，可以喺佢嘅個人網站入面搵到[未記出處或冇根據]。葛蘭汀幫手設計咗喺佐治亞州（Georgia）布拉夫頓（Bluffton）白橡樹有機牧場（White Oak Pastures）嘅屠宰場 [41]。

其他科學貢獻

[編輯]

葛蘭汀係超過60份經同儕評審嘅科學論文嘅作者或共同作者，研究涵蓋多種其他動物嘅行為。其他主題包括：髮旋位置同牛隻行為嘅關聯性、屠宰前壓力指數對肉質嘅影響、宗教性屠宰、肉牛嘅母性為、牛隻嘅性情以及造成瘀傷嘅原因。

動物福利

[編輯]
2010年2月，天寶·葛蘭汀喺TED上演講

葛蘭汀到處演講佢嘅親身經驗，分享被周遭切事物威脅，以及被身邊人恐懼同當空氣嘅焦慮感，因而激發佢踏上人道牲畜管養流程嘅道路上。佢研究牛隻嘅行為，研究佢哋對牧場工人、各種動作、物件同光線嘅反應。然後葛蘭汀設計咗多弧畜欄（curved corrals），以減輕將被屠宰嘅動物嘅壓力、驚恐同受傷嘅機會。呢件事進一步深化咗動保人士對葛蘭汀嘅批評同爭議，佢哋認為葛蘭汀言行不一，佢聲稱自己對動物抱持同情心及尊重，但同時又以起動物屠宰場為業。葛蘭汀嘅設計被廣泛應用喺屠宰業上，佢主張自己對動物嘅同情心係源於佢嘅自閉症，佢可以從動物嘅角度看世界，當佢抱住將被宰殺嘅動物個頭時，佢感受到人畜間有深刻嘅聯結 [42]。

佢嘅個人網站倡議提升屠房同牧場動物嘅待遇標準。

喺2004年，葛蘭汀贏得善待動物組織（PETA）Visionary類別嘅Proggy獎 [43]。

喺佢眾多關於動物福祉嘅重要論文中，有一篇叫做「動物唔係物品」[44]。佢提出雖然動物嚴格嚟講可視為財產，但法律上最終賦予佢哋道德上嘅保護或權利。佢比較財產權上，擁有牛隻同擁有螺絲批嘅性質同權限，例舉出兩者為人類服務嘅眾多相似之處，但喺施加痛苦上，兩種「財產」就有決定性嘅差異，因為法律上，人可以砸碎或磨爛一把螺絲批，但就唔可以對動物施以酷刑。

葛蘭汀將佢嘅洞見歸因於理解動物嘅內心世界，令佢重視嗰啲動物特別敏感嘅細節變化，然後用佢嘅圖像思考能力去設計出經過深思嘅人道動物管養設備。佢喺2009年獲選為美國農業與生物工程師學會（American Society of Agricultural and Biological Engineers）嘅會士 [45]。

喺2012年，當美國牛肉業界因使用同售賣粉紅肉渣（pink slime），面臨公眾疑慮而陷入困境時，葛蘭汀公開力挺呢樣產品。佢表示：「佢應該喺市場到賣；佢應該加上標籤。咁多嘅牛肉我哋唔應該掉咗佢 [46]。」 葛蘭汀嘅研究引起好多對動物嘅道德地位（moral status）感興趣嘅哲學家嘅注意。安迪・萊米（Andy Lamey）批駁：雖然葛蘭汀提出嘅屠宰方法為為動物福祉帶嚟顯著嘅正面效益，但佢嘗試為食肉呢個行為提出嘅道德辯護就唔太有說服力 [47]。

「
我認為以動物為食唔係一件違犯道德嘅事，不過我哋要正確咁做呢件事。我哋應該比動物過住有尊嚴嘅生活，以及冇痛苦嘅死亡。我哋欠動物一份尊重。
 」

———天寶・葛蘭汀，於艾路·摩里斯（Errol Morris）First Person節目上

個人生活

[編輯]

喺葛蘭汀嘅自傳式作品中，佢指出自閉症影響佢生活嘅每一環。佢須要穿着舒適嘅衣物以抵消感覺處理功能障礙（sensory processing disorder）帶嚟嘅超敏反應。同時，佢亦調節生活形態以避免感官超載。佢定期服用抗抑鬱藥，但係冇再用擁抱機 [24]。喺2010年2月，佢話：「擁抱機喺2年前爛咗，我一直冇時間修理佢。我依家鍾意抱人多啲 [48]。」

喺寄宿學校就讀期間，葛蘭汀選擇咗獨身生活 [10]:285。喺2013年紐約時報嘅採訪中，佢表示：「我依家終於夠老，所有性慾都消失哂，感覺就似，好走不送 [36]。」

榮譽

[編輯]

喺2010年，葛蘭汀入選《時代》雜誌嘅世上最具影響力嘅百大人物排行榜嘅英雄類別 [3]。喺2011年，佢榮獲雙螺旋獎章（Double Helix Medal）[49]。佢獲多間大學頒發嘅榮譽學位，包括：加拿大麥基爾大學（McGill University，1999）、瑞典農業科學大學（Swedish University of Agricultural Sciences，2009）、美國卡內基梅隆大學（Carnegie Mellon University in the United States，2012）、艾文理大學（Emory University，2016）[50]。喺2015年，佢獲得美國技術傳播協會（Society for Technical Communication）嘅榮譽名銜 [51]。

喺2011年，葛蘭汀獲選阿育王基金會（Ashoka）嘅阿育王伙伴（Ashoka Fellowship）[52]。喺2012年，佢入選科羅拉多女性名人堂（Colorado Women's Hall of Fame）[53]、Texas Trail of Fame [54]、國家牛仔與西部文化博物館（National Cowboy & Western Heritage Museum）嘅 Hall of Great Westerners [55]。喺2015年，葛蘭汀榮獲世界動物衛生組織（World Organisation for Animal Health）嘅傑出貢獻獎（Meritorious Achievement Award）[56]。 喺2016年，葛蘭汀獲選為美國文理科學院（American Academy of Arts and Sciences）院士 [57]。喺2017年，葛蘭汀被列入國家女性名人堂（National Women's Hall of Fame）[58][59][60]。

喺2023，葛蘭汀獲頒艾奧瓦州立大學（Iowa State University）理學博士學位（Doctor of Science）[61][62]。當年稍晚，獲頒堪薩斯州立大學（Kansas State University）榮譽獸醫學博士學位（Doctor of Veterinary Medicine）。呢項表彰，係佢第一個獸醫學博士（DVM）頭銜 [63]。

喺2025年11月15號，葛蘭汀榮獲美國國家肖像畫廊（National Portrait Gallery）嘅國家肖像獎（Portrait of a Nation Award）。呢個獎項表彰得獎者「對美國嘅歷史同文化帶嚟變革性嘅貢獻」[64]，並由嘉露兒·丹絲（Claire Danes）親自為她頒獎。美國國家肖像畫廊委托藝術家David Lenz為葛蘭汀畫肖像，以便列入館藏中。

媒體

[編輯]

著作

[編輯]

書目

  • 《星星的孩子 : 一個畜牧科學博士的自閉症告白》，天下遠見出版，ISBN：9576215773。Emergence: Labeled Autistic (with Margaret Scariano, 1986, updated 1991), ISBN 0-446-67182-7
  • The Learning Style of People with Autism: An Autobiography (1995). In Teaching Children with Autism: Strategies to Enhance Communication and Socialization, Kathleen Ann Quill, ISBN 0-8273-6269-2
  • 《星星的孩子：自閉天才的圖像思考》，心靈工坊出版，ISBN：9789866112560。Thinking in Pictures: Other Reports from My Life with Autism (1996) ISBN 0-679-77289-8
  • Developing Talents: Careers for Individuals with Asperger Syndrome and High-Functioning Autism (2004). ISBN 1-931282-56-0
  • 《傾聽動物心語》，木馬文化出版，ISBN：9789866973079。Animals in Translation: Using the Mysteries of Autism to Decode Animal Behavior (with Catherine Johnson, 2005), ISBN 0-7432-4769-8
  • 《社交潛規則 : 以孤獨症視角解析社交奧秘》，華夏出版社有限公司，ISBN：9787508098005。The Unwritten Rules of Social Relationships: Decoding Social Mysteries Through the Unique Perspectives of Autism (with Sean Barron, 2005), ISBN 1-932565-06-X
  • Livestock Handling and Transport (2007). ISBN 978-1-84593-219-0. CABI, UK.
  • 《我看世界的方法跟你不一樣：給自閉症家庭的實用指南》，心靈工坊出版，ISBN：9789866112607 。The Way I See It: A Personal Look at Autism and Asperger's (2008), ISBN 9781932565720
  • Animals Make Us Human: Creating the Best Life for Animals (with Catherine Johnson, 2009), ISBN 978-0-15-101489-7
  • Improving Animal Welfare: A Practical Approach (2010). ISBN 978-1-84593-541-2, CABI, UK
  • 《我的大腦和你不一樣: 看見自閉症的天賦優勢》，心靈工坊出版，ISBN：9789863570783。The Autistic Brain: Thinking Across the Spectrum (with Richard Panek, 2013), ISBN 978-0-547-63645-0
  • Genetics and the Behavior of Domestic Animals, Second Edition (with Mark Deesing, 2013), ISBN 978-0-12-394586-0
  • Calling All Minds: How to Think and Create Like an Inventor (2018) ISBN 1524738204
  • The Loving Push: How Parents and Professionals Can Help Spectrum Kids Become Successful Adults (with Debra Moore Ph.D., 2016), ISBN 978-1941765203
  • 《圖像思考：用對的方法，釋放大腦潛能》， 天下文化出版，ISBN：9786263552623。Visual Thinking: The Hidden Gifts of People Who Think in Pictures, Patterns, and Abstractions (2022) ISBN 0593418360
  • Navigating Autism: 9 Mindsets for Helping Kids on the Spectrum (with Debra Moore, Ph.D., 2021). ISBN 978-0-393-71484-5

論文代表作

[編輯]
  • Grandin, T. 1989 (Updated 1999). "Behavioral Principles of Livestock Handling". Professional Scientist. December 1989 (pages 1–11).
  • Grandin, T. 1994. "Euthanasia and Slaughter of Livestock". Journal of American Veterinary Medical Association. Volume 204:1354–1360.
  • Grandin, T. 1995. "Restraint of Livestock. Proceedings: Animal Behaviour Design of Livestock and Poultry Systems" International Conference (pages 208–223). Published by: Northeast Regional Agriculture Engineering Service. Cooperative Extension. 152 Riley – Robb Hall, Ithaca, New York, 14853 USA.
  • Grandin, T. 1996. "Factors That Impede Animal Movement at Slaughter Plants". Journal of the American Veterinary Medical Association. 209 No.4:757–759.
  • Grandin, T. 2001. "Cattle vocalizations are associated with handling and equipment problems at beef slaughter plants". Applied Animal Behaviour Science. Volume 71, 2001, Pg. 191–201.
  • Grandin, T. 2013. "Making slaughterhouses more humane for cattle, pigs, and sheep". Annual Review of Animal Biosciences. 1:491–512.

參考

[編輯]
  1. ↑ "Temple Grandin: A Heroine to the Autism Community, Brings Humanity to Animal Science | American Association for the Advancement of Science". www.aaas.org (英文). May 24, 2018. 喺November 10, 2022搵到.
  2. ↑ "Temple Grandin, PhD – "The Way I See It: A Personal Look At Autism" at the Quick, March 25". Fairfield University (英文). 2026-03-02. 喺2026-05-13搵到.
  3. 1 2 Hauser, Marc (April 29, 2010). "Temple Grandin". Time. 原先內容歸檔喺April 26, 2019. 喺April 14, 2019搵到.
  4. ↑ Cutler, Eustacia (2004). A Thorn in My Pocket: Temple Grandin's Mother Tells the Family Story. Future Horizons. p. 204. ISBN 9781932565164.
  5. 1 2 Cutler, Eustacia (2004). "10". A Thorn in My Pocket: Temple Grandin's Mother Tells the Family Story. Future Horizons. ISBN 9781932565164.
  6. 1 2 Grandin, Temple. "Temple Grandin: An Inside View of Autism". Autism Research Institute. 原先內容歸檔喺December 16, 2017. 喺April 14, 2019搵到.
  7. 1 2 "Ben Cutler, 96, Whose Bands Entertained the Society Set". The New York Times. January 15, 2001. ISSN 0362-4331. 原先內容歸檔喺July 25, 2018. 喺April 14, 2019搵到.
  8. ↑ Cutler, Eustacia (2004). A Thorn in My Pocket: Temple Grandin's Mother Tells the Family Story. Future Horizons. p. 205. ISBN 9781932565164.
  9. ↑ Federal Writer's Project of the Works Progress Administration for the State of North Dakota (1990). The WPA Guide To 1930s North Dakota (第2版). State Historical Society of North Dakota. pp. 193–194. ISBN 978-1891419140.
  10. 1 2 3 Sacks, Oliver (1995). An Anthropologist on Mars: Seven Paradoxical Tales. Knopf. ISBN 0679437851. 喺May 30, 2025搵到.
  11. 1 2 Grandin, Temple; Scariano, Margaret M. (1996). Emergence: Labeled Autistic. Grand Central Publishing. p. 91. ISBN 9780446671828.
  12. 1 2 3 "Interview with Temple Grandin". January 2, 2006. 原先內容歸檔喺November 5, 2018. 喺April 14, 2019搵到.
  13. ↑ Grandin, Temple (2013). The Autistic Brain. Houghton Mifflin Harcourt. ISBN 978-0547636450.
  14. ↑ Hughes, Virginia (October 14, 2012). "Researchers reveal first brain study of Temple Grandin". SpectrumNews.org. Simons Foundation. 原先內容歸檔喺August 21, 2019. 喺April 14, 2019搵到.
  15. ↑ Nuwer, Rachel (October 17, 2012). "What Makes Temple Grandin's Brain Special?". Smithsonian. Smithsonian Institution. 原先內容歸檔喺August 21, 2019. 喺April 14, 2019搵到.
  16. ↑ Stix, Gary (October 19, 2012). "A Little Hard Science from the Big Easy: Temple Grandin's Brain and Transgenic Sniffer Mice". ScientificAmerican.com. Springer Nature. 原先內容歸檔喺July 3, 2019. 喺April 14, 2019搵到.
  17. ↑ McGowan, Kat (March 13, 2013). "Exploring Temple Grandin's Brain". Discover Magazine. Kalmbach Publishing. 原先內容歸檔喺September 25, 2020. 喺April 14, 2019搵到.
  18. ↑ "Temple Grandin: Look at what people can do, not what they can't". MIT News | Massachusetts Institute of Technology (英文). 18 March 2015. 喺25 May 2024搵到.
  19. ↑ Allen, Jennifer (2014). "A Day with the great Eustacia Cutler!". Aspergers101. 喺25 May 2024搵到.
  20. ↑ White, Randall (2005). "Autism First-Hand: An Expert Interview with Temple Grandin". Medscape Psychiatry. 原著喺September 3, 2016歸檔. 喺April 14, 2019搵到.
  21. ↑ Grandin, Temple (1995). Thinking in Pictures: And Other Reports from My Life with Autism. New York: Doubleday. ISBN 9780385477925.
  22. ↑ "Temple Grandin Inducted into Colorado Women's Hall of Fame". March 8, 2012. 原著喺December 28, 2013歸檔. 喺April 14, 2019搵到.
  23. 1 2 3 "How the squeeze machine came to be". Aspergers Test Site. June 6, 2013. 原先內容歸檔喺July 3, 2019. 喺April 14, 2019搵到.
  24. 1 2 Grandin, Temple (Spring 1992). "Calming Effects of Deep Touch Pressure in Patients with Autistic Disorder, College Students, and Animals". Journal of Child and Adolescent Psychopharmacology. Mary Ann Liebert, Inc. 2 (1): 63–72. doi:10.1089/cap.1992.2.63. PMID 19630623. S2CID 15343030. 原先內容歸檔喺October 6, 2020. 喺April 14, 2019搵到.
  25. ↑ Cornelius, Coleman (January 7, 2026). "The Future of Animal Welfare: Temple Grandin's graduate students describe her influence". CSU Source. 喺February 23, 2026搵到.{{cite web}}: CS1 maint: url-status (link)
  26. ↑ Grandin, Temple (2008). The Way I See It: A Personal Look at Autism and Aspberger's. Future Horizons. ISBN 9781932565720. 原先內容歸檔喺May 20, 2022. 喺April 14, 2019搵到.
  27. ↑ Grandin, Temple (2009). "How does visual thinking work in the mind of a person with autism? A personal account". Philosophical Transactions of the Royal Society B. 364 (1522): 1437–1442. doi:10.1098/rstb.2008.0297. PMC 2677580. PMID 19528028.
  28. ↑ Grandin, Temple (2008). The Way I See It: A Personal Look at Autism and Aspberger's. Future Horizons. ISBN 9781932565720. 原先內容歸檔喺May 20, 2022. 喺April 14, 2019搵到.
  29. ↑ Grandin, Temple (November 1, 1995). Thinking in Pictures (第Expanded版). USA. p. 122. ISBN 9780307275653.
  30. ↑ "Temple Grandin - Frequently Asked Questions". templegrandin.com. 喺May 17, 2025搵到.
  31. ↑ Corbyn, Zoë (October 15, 2022). "Autistic scholar Temple Grandin: 'The education system is screening out visual thinkers'". The Guardian. ISSN 0261-3077. 喺September 18, 2025搵到.
  32. ↑ The Editors of The Lancet (February 6, 2010). "Retraction—Ileal-lymphoid-nodular hyperplasia, non-specific colitis, and pervasive developmental disorder in children". The Lancet. 375 (9713): 445. doi:10.1016/S0140-6736(10)60175-4. ISSN 0140-6736. PMID 20137807.
  33. ↑ Boseley, Sarah (February 2, 2010). "Lancet retracts 'utterly false' MMR paper". The Guardian. ISSN 0261-3077. 喺May 16, 2025搵到.
  34. ↑ Corbyn, Zoë (October 15, 2022). "Autistic scholar Temple Grandin: 'The education system is screening out visual thinkers'". The Guardian. ISSN 0261-3077. 喺September 18, 2025搵到.
  35. ↑ "Professor Temple Grandin discusses the most personal issue of her life: autism". Cornell Chronicle. March 19, 2007. 喺May 16, 2025搵到.
  36. 1 2 Goldman, Interview by Andrew (April 12, 2013). "Temple Grandin on Autism, Death, Celibacy and Cows". The New York Times. ISSN 0362-4331. 喺May 16, 2025搵到.
  37. ↑ Guthrie, Julian (April 26, 2010). "Temple Grandin offers window into autistic life". SFGate. 原先內容歸檔喺March 8, 2022. 喺May 16, 2025搵到.
  38. ↑ Marchese, David (January 24, 2022). "Temple Grandin Wants Us to Think Differently About Kids Who Think Differently". The New York Times. ISSN 0362-4331. 喺May 16, 2025搵到.
  39. ↑ "Renowned Autism Advocate and Scientist Temple Grandin to Speak at BU March 18". Boston University. March 17, 2022. 原先內容歸檔喺March 19, 2022. 喺April 30, 2022搵到.
  40. ↑ Grandin, Temple. (2008). Humane livestock handling. Deesing, Mark. North Adams, MA: Storey Pub. ISBN 9781603420280. OCLC 176902393.
  41. ↑ Severson, Kim (2015-03-10). "At White Oak Pastures, Grass-Fed Beef Is Only the Beginning". The New York Times (美國英文). ISSN 0362-4331. 喺2023-03-24搵到.
  42. ↑ Coe, Sue (2012). Cruel: bearing witness to animal exploitation. New York: OR Books. p. 64. ISBN 978-1-935928-72-0.
  43. ↑ "2004 PETA Proggy Awards". PETA. September 9, 2004. 原著喺August 8, 2009歸檔. 喺April 14, 2019搵到.
  44. ↑ "Animals are not things". 原先內容歸檔喺March 3, 2019. 喺April 14, 2019搵到.
  45. ↑ "ASABE Fellows" (PDF). American Society of Agricultural and Biological Engineers (ASABE). 原著 (PDF)喺October 30, 2017歸檔. 喺April 14, 2019搵到.
  46. ↑ Carman, Tim (May 23, 2012). "Animal scientist Temple Grandin supports 'pink slime'". Washington Post. 原先內容歸檔喺August 18, 2020. 喺April 14, 2019搵到.
  47. ↑ Andy Lamey, "The Animal Ethics of Temple Grandin: A Protectionist Analysis", The Journal Of Agricultural and Environmental Ethics, Vol. 32 Issue 1, 2019. Open access version at https://philpapers.org/rec/LAMTAE-2 互聯網檔案館嘅歸檔，歸檔日期August 8, 2020，.
  48. ↑ Wallis, Claudia (February 4, 2010). "Temple Grandin on Temple Grandin". Time Magazine. 原先內容歸檔喺October 11, 2020. 喺April 14, 2019搵到.
  49. ↑ "Double Helix Medals of 2011". Cold Spring Harbor Laboratory. 原著喺January 6, 2013歸檔. 喺April 14, 2019搵到.
  50. ↑ Grandin, Temple. "Temple Grandin Ph.D." 原先內容歸檔喺February 2, 2019. 喺April 14, 2019搵到.
  51. ↑ "Recognition Monday: Temple Grandin Named Honorary Fellow". Society for Technical Communication. May 11, 2015. 原先內容歸檔喺August 9, 2020. 喺April 14, 2019搵到.
  52. ↑ "Temple Grandin | Ashoka". www.ashoka.org (美國英文). 喺2025-01-17搵到.
  53. ↑ "Temple Grandin". Colorado Women's Hall of Fame. December 6, 2013. 原先內容歸檔喺July 16, 2020. 喺November 30, 2019搵到.
  54. ↑ "Temple Grandin". Western Heritage from the Texas Trail of Fame. June 14, 2013. 原先內容歸檔喺July 3, 2019. 喺April 14, 2019搵到.
  55. ↑ "Hall of Great Westerners". National Cowboy & Western Heritage Museum. 原先內容歸檔喺April 19, 2019. 喺November 22, 2019搵到.
  56. ↑ "Opening of the 83rd General Session of the World Assembly of Delegates of the World Organisation for Animal Health". The World Organisation for Animal Health (OIE). May 24, 2015. 原著喺September 20, 2015歸檔. 喺April 14, 2019搵到.
  57. ↑ "American Academy of Arts and Sciences Elects 213 National and International Scholars, Artists, Philanthropists, and Business Leaders". American Academy of Arts and Sciences. April 20, 2016. 原先內容歸檔喺August 4, 2020. 喺April 14, 2019搵到.
  58. ↑ "Ten women added to National Women's Hall of Fame in Seneca Falls". WSYR. September 17, 2017. 原先內容歸檔喺November 6, 2018. 喺April 14, 2019搵到.
  59. ↑ Dimas, Jennifer (February 10, 2017). "Temple Grandin named to the National Women's Hall of Fame". Source. Colorado State University. 原先內容歸檔喺April 30, 2019. 喺April 14, 2019搵到.
  60. ↑ Sanchez, Hayley (February 18, 2017). "Temple Grandin will be inducted into National Women's Hall of Fame, Q&A". The Denver Post. 原先內容歸檔喺April 15, 2019. 喺April 14, 2019搵到.
  61. ↑ "Autism and animal behavior expert to deliver lecture at Iowa State • News Service • Iowa State University". www.news.iastate.edu.
  62. ↑ "Autism and animal behavior expert to deliver lecture at Iowa State • News Service • Iowa State University". www.news.iastate.edu.
  63. ↑ "K-State veterinary college presents Temple Grandin with honorary degree". www.k-state.edu.
  64. ↑ "Smithsonian's National Portrait Gallery Honors Jamie Dimon, Temple Grandin, Joy Harjo and Steven Spielberg at the 2025 Portrait of a Nation Gala". npg.si.edu (英文). 2025-11-17. 喺2025-12-04搵到.
由「https://zh-yue.wikipedia.org/w/index.php?title=天寶·葛蘭汀&oldid=2435355」收