天狗 (日本妖怪)

天狗

天狗嘅面具

天狗tin1 gau2係日本民間傳說中嘅妖怪。佢哋打扮到好似日本嘅山伏，手攞住錫杖、羽扇同劍。頭上戴住頭襟（日文：頭襟），仲會著一件有隱身功能嘅蓑衣。

起源

根據《先代舊事本紀》嘅記載，素戔鳴尊曾經吐咗一啖氣出嚟，而嗰啖氣就變成天逆每姬神（日文：逆天毎），呢位女神獸首人身，正正就係天狗嘅祖先。

另外，日本本土佛教嘅僧人為咗頓悟，會積德同埋修行，希望死後可以投胎去極樂淨土。但如果僧人太傲慢、誤解佛道、心入面有邪念又或者係對世間嘅愛恨恩怨仲有執著就死咗嘅話，咁佢哋就會投胎做天狗。

就算係咁，如果僧人生前都仲係心地善良嘅話，佢哋會繼續保護其他修行緊嘅僧人，或者上山拜神嘅人。

相反如果上山嘅人心有惡念，咁天狗就會整蠱佢哋，呢類天狗叫做「善天狗」。

但係生前傲慢、邪惡嘅僧人投胎做天狗之後都依然好邪惡，佢哋會阻礙其他僧人修行，想嗰啲僧人同自己一樣墮落，呢類天狗叫做「惡天狗」。

天狗形象嘅演變

「天狗」呢個名其實係嚟自中國，山海經記載嘅天狗係一種動物，有啲似狐狸但係個頭係白色嘅，由天空嘅流星變成。同依家嘅印象好唔同。

天狗最早嘅記載係喺《日本書記》，舒明天皇九年（即係西曆637年），嗰陣時有粒好大嘅流星飛過平成京（即係依家嘅奈良縣）。曾經去過中國嘅僧侶就話嗰粒流星其實就係天狗。

後嚟，天狗融入咗日本本土嘅文化，變成一啲類似山精妖魅嘅妖怪。用嚟解釋一啲喺山入面解釋唔到嘅現象，例如山泥傾瀉叫做「天狗礫」、大樹冧咗叫做「天狗倒」。佢哋仲俾人描述成好鐘意權力鬥爭，會參與人類嘅曆史過程，以戰爭為樂嘅妖怪。

日本學者植松茂提出，我哋依家見到個鼻好長嘅大天狗大概喺室町時代出現。嗰個好長嘅鼻象徵住佢哋傲慢嘅反佛形象，對應佢哋係失敗修行者嘅身份。現存喺京都鞍馬寺嘅《鞍馬大僧正坊圖》被認為係最初描繪長鼻大天狗嘅畫像。去到江戶時代，天狗傳說嘅盛行令當時嘅浮世繪畫師以天狗嘅傳說故事作為題材，天狗亦都成為當時浮世繪最常出現嘅妖怪。

崇德天皇嘅傳說

崇德天皇係日本第七十五代天皇。喺真實嘅史實當中，已經退咗位嘅鳥羽法皇迫佢讓位俾佢嘅兄弟近衞天皇，成為冇實權嘅上皇。崇德上皇原本希望體弱多病嘅近衞天皇死後由自己個仔重仁親王繼位，用院政（日文：院政）拎返權力，但係最終都佢嘅另一個兄弟後白河天皇繼位。所以崇德上皇就發動保元之亂，企圖拎返個皇位，但係輸咗俾人流放去讚岐國(即係依家四國島嘅香川縣)。

喺俾人流放之後，崇德上皇開始崇佛。仲抄寫五部大乘經（分別係法華經、華嚴經、涅槃經、大集經、大品般若經），希望可以將經書送返京都，表達自己悔過嘅誠意。但係皇室驚經書其實係詛咒，所以俾後白河天皇拒絕咗。憤怒嘅崇德上皇咬斷條脷，用噴出嚟嘅鮮血喺自己抄寫嘅經書寫咗一段詛咒

我將成為日本嘅大魔王，令天皇淪為平民，令平民成為天皇

喺崇德上皇死咗之後，佢嘅屍身喺20日後都仲係好似啱啱死咁新鮮。下葬嘅時候，仲有血喺棺材入面湧出嚟。而且喺冇幾耐之後，繼位嘅天皇都好早就死咗、安元大火（日文：安元の大火）消毀咁咗三分一個京都。種種嘅災難相傳就係因為懷住怨恨而死嘅崇德上皇死後化身成大天狗，返嚟搵皇室報仇。

流行文化

• 《百鬼小當家》有鴉天狗出現，當中嘅鴉天狗角色身形好細粒。

• 寵物小精靈狡猾天狗嘅原型就係大天狗。

• 光榮特庫摩推出嘅動作RPG遊戲《仁王》有鴉天狗形象嘅敵人。

• 《神探伽利略》第二季第七集《偽裝る》嘅劇情就係攞烏天狗木乃伊做主題

參考來源

• 奇幻不思議！揭開傳說中亞人種的神秘面紗，密田憲孝著，TEAS事務所出版，王美娟譯，ISBN 978-986-331-606-0
• 日本神妖博物誌，多田克己著，商周出版，歐凱寧譯，ISBN 978-986-477-697-9
• 中日古代天狗形象考，姚瓊著，第３３卷第３期徐州工程學院學報(社會科學版)