奇幻橋段

出自維基百科,自由嘅百科全書
跳去導覽 跳去搵嘢

奇幻橋段fantasy tropes)係指奇幻呢種體裁上常用嘅橋段[1][2]。廿世紀同廿一世紀初嘅奇幻作品常用嘅橋段有以下呢啲:

角色橋段[編輯]

一幅畫描繪一個巫師施緊法。
  • 被選中者(The Chosen One):故仔某一個角色俾某啲龐大嘅力量選中咗,成為唯一能夠解決情節當中嘅問題嘅人,例如「好耐好耐之前,有個先知作咗個預言,話有一日會有個俾天神揀中咗嘅人出現,打低大魔王同驅逐籠罩世界嘅黑暗」,然後故仔中途發現主角就係呢個被選中嘅人,最後主角打低魔王令預言應驗[橋 1]。到咗廿一世紀初,「被選中者」呢條橋一般俾西方文壇覺得係一種陳腔濫調,所以唔建議作家直接用呢條橋[3]
  • 秘密皇族(secret royalty):故仔主角或者其中一個重要配角係一個孤兒,養父母身份係平民,喺農田等嘅環境長大,而佢身處嗰個王國由一個殺死咗前任統治者嘅篡位者統治;喺故仔途中,嗰個孤兒角色發現佢查實係前任皇族嘅後裔,而佢之所以冇死係因為有個貴族角色為咗保護佢將佢送咗去養父母嗰度。到咗廿一世紀初,呢條橋喺西方奇幻文壇經已成為咗一種陳腔濫調[橋 2]
  • :一種可以用嚟拮同劈敵人嘅長形武器、兩邊鋒利、多數尖頂,其中一端會有個柄俾用把劍嗰個人揸,等個人可以揮舞佢把劍;喺中世紀嘅歐洲,整得靚嘅劍係貴族嘅象徵,而喺廿世紀嘅奇幻故仔當中,主角通常會以劍為主要武器,呢啲劍好多時會有魔法性嘅特徵,例如係會射閃電[橋 3]
  • 睿智嘅老巫師(wise old wizard):指一個年老又有學識嘅巫師;典型嘅老巫師形象通常係一個有濃密白鬚嘅阿伯,會著住長袍同戴尖頂帽,曉用魔法;呢啲老巫師多數係忠嘅,常見嘅角色係負責做主角同佢同伴嘅師傅,教主角一啲重要嘅知識同技能,好多亦係負責提出預言嘅人。亞瑟王相關傳說當中嘅梅林(Merlin)成日俾現代人描繪成老巫師噉嘅形象。
  • 魔杖(magic wand):指傳統形象嘅巫師施展魔法嗰陣會用嘅架生,一支魔杖通常會係一碌木造嘅長條,又輕又細可以用單手攞住;巫師施展魔法嗰時,會一路用一隻手揮舞佢支魔杖、一路唸咒語,然後魔法嘅力量就會由支魔杖嗰度走出嚟[4];例如《獅子·女巫·魔衣櫥》(The Lion, the Witch and the Wardrobe)當中扮演故仔大奸角嘅白女巫就會用佢嘅魔杖將人變成石頭[5]
  • 麻瓜(muggle):指唔識用魔法嘅人;麻瓜呢個概念通常出現喺設於類似現代世界嘅當代奇幻作品裏面,例如喺《哈利波特》當中,故仔世界就俾作者設定成得少部份嘅人識得用魔法或者知道魔法嘅存在,唔識魔法嘅人就係所謂嘅麻瓜,而識魔法嘅人往往會為咗避免同麻瓜起衝突特登隱瞞有關魔法嘅事[橋 4]
  • 黑暗魔王(Dark Lord / Evil Overlord):指一個扮演故仔大奸角、統始黑暗王國嘅角色;黑暗魔王一般會有青面獠牙嘅部下為佢做嘢以及同主角戰鬥,佢本人好多時會俾第啲角色指係邪惡嘅化身,而佢所統始嘅黑暗王國通常一望就知係對常人嚟講陰森恐怖(黑暗、荒蕪又充滿危險)嘅地方,反映佢嘅邪惡;黑暗魔王常見嘅目的包括征服世界同用黑暗籠罩世界呀噉;例子有《魔戒》當中嘅魔王索倫(Sauron)、《哈利波特》當中嘅黑魔王佛地魔(Lord Voldemort)以及超級瑪利奧系列當中嘅龍王(Bowser)[6]
描繪一個黑暗魔王同佢部下嘅畫

傳說生物[編輯]

一個人拉住隻西洋龍。
睇埋:傳說生物

現代奇幻故仔好興用喺人類傳統民間傳說以至神話當中出現嘅傳說生物[註 1]

  • 西洋龍(western dragon):歐洲人嘅民間傳說裏面都有龍呢種傳說生物;同東方人嘅唔同嘅係,西洋龍嘅傳統形象係凶惡(相對於吉祥嘅東方龍)、有翼曉飛(東方龍都曉飛,不過冇翼)、會噴火(東方龍通常唔會噴火),而且身形冇東方龍咁修長;喺現代西方奇幻入面,龍嘅形象喺正面度上相當多變-有奇幻故仔裏面嘅西洋龍係冇智能嘅,淨係做奸角嘅手下或者野生動物,但又有好多作品將西洋龍描繪成法力高強嘅有智能動物,某啲作品仲將佢哋描繪成好似天神一樣高於人類嘅存在[7]。廿一世紀初有西洋龍嘅奇幻作品有夢工場嘅動畫片《馴龍記》(How to Train Your Dragon)[8]
  • 種族(race):西方奇幻故仔成日會講個虛構世界入面有人類以外嘅有智能生物種族;以奇幻做美學設計嘅 RPG 遊戲(尤其係好似《魔獸世界》等嘅奇幻 MMORPG)好多時會俾玩家喺建立自己嘅角色嗰陣揀自己角色嘅種族,唔同種族喺能力值上有唔同。奇幻作品比較常見嘅種族有以下呢啲[橋 5][9]
    • 矮人(dwarf;眾數:dwarves):源自古代日耳曼人民俗嘅一種傳說生物[10];喺現代嘅奇幻故仔當中,矮人通常俾人描繪成生得矮,但身體粗壯而且力大無窮,男嘅矮人通常會有濃密嘅鬍鬚,好多時俾人描繪成喺工藝上有特殊天賦,例如《魔戒》入面就有零舍擅長採礦同打造武器嘅矮人族[11]
    • 精靈(elf;眾數:elves):源自古代日耳曼人民俗嘅一種傳說生物;喺現代嘅奇幻故仔當中,精靈通常俾人描繪成身材修長、尖耳、個樣生得靚、愛好大自然、而且長命過人類好多,好多時仲俾人描繪成零舍有魔法天份;例如《魔戒》入面就有長生不死嘅精靈族[橋 6]。另一方面,因為佢哋呢啲高貴特徵,奇幻作品有陣時會將精靈描繪成高傲又睇唔起第啲種族[12]
    • 高扁(goblin):源自歐洲民間故仔嘅一種傳說生物;喺現代奇幻故仔當中,高扁通常俾人描繪成身材細粒(成年高扁身材通常似得幾歲嘅人類細路)、光頭又醜樣,而且詭計多端,鍾意惡作劇或者偷嘢;例如《哈利波特》就有講到會營運魔法銀行嘅聰明高扁族[13]
    • 仙子(fairy):源自古代歐洲民間故仔嘅一種傳說生物;喺廿世紀嘅奇幻故仔當中,仙子通常俾人描繪成比較細粒(好多時得昆蟲咁大隻)、有好似蝴蝶噉嘅翼、仲曉用魔法;例子有 1953 年嘅迪士尼動畫片小飛俠》(Peter Pan)當中嘅小叮噹(Tinker Bell)[橋 7]
    • 人魚(merfolk / merpeople):喺世界多地嘅民間傳說當中都有嘅一種傳說生物,指上半身係人(或者似人)下半身係嘅生物,人魚上半身可以同人類冇乜分別,又可以好醜樣好恐怖,而美人魚(mermaid)就係指上半身係靚女嘅人魚;人魚可以係奸角-喺唔少故仔當中,美人魚都被描繪成會以甜美嘅聲唱歌,用佢哋嘅歌聲迷惑水手嘅心智同令船沉沒。人魚喺現代奇幻作品當中頗為常見,例如 1989 年嘅迪士尼動畫片《小魚仙》(The Little Mermaid)就係集中講美人魚[14][橋 8]
    • 半獸人(orc):源自歐洲民間故仔嘅一種傳說生物;喺現代嘅奇幻故仔當中,半獸人一般俾人描繪成所謂嘅「邪惡種族」,佢哋醜樣得嚟又大隻,智能唔高但又充滿攻擊性,所以成日會扮演黑暗魔王嘅手下;例如《魔戒》當中嘅半獸人族成個族都係大魔王索倫嘅手下[15]
1931 年一套戲入面嘅德古拉伯爵
  • 不死生物(undead):又有叫死靈,係傳說生物嘅一個類別,指一啲明顯死咗、但(因為魔法等嘅超自然力量)能夠好似生勾勾嘅生物噉活動嘅生物-即係例如隻嘢曉郁同講嘢,但冇心跳脈搏;喺奇幻故仔入面,呢啲生物可忠可奸,有啲故仔講佢哋唔自願噉俾邪惡魔法師變佢哋做不死,又有啲故仔講佢哋因為自己唔再有生命、仇恨生勾勾嘅人類而想殺人。會用不死生物同相關橋段嘅故仔觸及死亡相關主題恐怖谷(uncanny valley)等嘅嘢,所以多數會有恐怖成份,傾向於黑暗奇幻[橋 9][16]
    • 鬼魂(ghost):指因為肉體死亡而離開咗肉體嘅靈魂,通常觸摸唔到,能夠穿過實體。
    • 喪屍(zombie):指受超自然力量影響而曉郁嘅死屍,通常行得慢、冇乜智能可言同埋會想食人肉,好多時被描繪會成羣噉攻擊生勾勾嘅人;恐怖生存遊戲好興用喪屍做最基本嘅敵人,例子可以睇《生化危機系列》(Resident Evil)[17]
    • 吸血鬼(vampire):都係一種受超自然力量影響而曉郁嘅死屍;同喪屍唔同嘅係,吸血鬼郁動速度唔慢、有相當嘅智能同埋需要吸生勾勾嘅人或者動物嘅嚟維持自己存在,好多時仲會有能夠變身成蝙蝠等嘅特異能力;喺弱點上,吸血鬼多數怕陽光(所以日頭會喺棺材入面瞓覺),而除咗陽光之外好多時仲會驚十字架大蒜。源自 1897 年恐怖小說德古拉》(Dracula)嘅德古拉伯爵(Count Dracula)就係一個好出名嘅吸血鬼角色[18][19]
    • 死靈術士(necromancer):喺現代奇幻故仔當中通常係指使用死亡相關魔法嘅魔法師,呢啲魔法師使用嘅咒語能夠直接令周圍嘅生物死亡,以及將死屍變化成喪屍做自己嘅部下;因為死靈術士有呢啲令人不安嘅能力,佢哋多數會係奸角[橋 10]
    • 巫妖(lich):指用邪術令自己變成不死嘅死靈;喺奇幻故仔當中,有好多法力高強嘅死靈術士會想自己長生不死,而佢哋好多時會自願噉負出某啲巨大代價(例如係將自己嘅靈魂同人性賣俾惡魔)嚟變成巫妖得到長生;巫妖外觀上通常會有明顯「死咗」嘅特徵,例如皮膚呈灰白色,甚至係冇嗮肉得返棚骨,佢哋通常能夠保留自己生前嘅智能同法力,而且往往仲會因為佢哋通曉死靈術而成為喪屍等「低級」死靈嘅領袖;喺奇幻電子遊戲入面,巫妖通常會係大佬級嘅角色[20][橋 11]

設定橋段[編輯]

  • 中世紀(medieval age)嘅世界:西方嘅奇幻作品好多時會設喺一個類似中世紀歐洲嘅時空,故仔當中用到嘅傳說生物同魔法源自歐洲嘅民間故仔,背景嗰度會有城堡騎士等中世紀歐洲文化入面有嘅嘢;例如《冰與火之歌》就係噉[橋 12]
  • 中世紀停滯(medieval stasis):指一個社會文化唔會點演變嘅世界,例如一本奇幻小說,本續集設喺第一部作品嘅 3,000 年之後,但續集入面嗰個世界喺文化同科技等方面都同第一本作品入面嗰個世界冇乜差異;呢種情況常見於古典奇幻(「3,000 年前有一個預言話會有一個被選中者會出現...」),而呢點俾唔少文學評論者批評話難以令人信服(睇返暫停懷疑)-例如廿一世紀初嘅英文同 18 世紀嘅英文經已有明顯差異,令到廿一世紀初嘅人睇起嗰個時代嘅文學作品上嚟可以好吃力,所以有奇幻界人士提倡,做世界創建嗰陣作者應該要設定個虛構世界喺社會文化上會變化[橋 13]
  • 魔法學校(magic school):指一間多古怪嘢(所以成日有刺激嘢發生)嘅學校,通常係建立嚟俾人學魔法嘅;故仔嘅主角通常會係呢間學校嘅學生,並且經歷各種刺激嘅體驗,出名嘅例子可以睇《哈利波特》當中嘅霍格華茲魔法學校[21][22]
德國新天鵝堡(Neuschwanstein Castle);城堡係中世紀歐洲嘅特色建築,成日會喺奇幻故仔當中出現。

拉雜橋段[編輯]

  • 毀滅性嘅法寶(artifact of doom):指一件擁有巨大魔力嘅法寶,通常會受到大魔王等嘅奸角覬覦,因而扮演個故仔嘅麥高芬(MacGuffin);例如《魔戒》裏面嗰隻魔法戒指就係一件威力無邊嘅法寶,而故仔嘅主角想做嘅嘢就係阻止魔王索倫得到呢件法寶[橋 14]
  • 旅程(The Quest):七大基本情節當中被指零舍常喺奇幻故仔當中出現嗰一個;旅程型嘅情節會講主角同佢同伴出發去追尋一件物件或者去某個地方(拯救俾魔王捉走嘅公主、打低魔王或者搵寶藏等等),喺中途會遇到各種嘅難關以及由難關當中成長。《魔戒》就係一個經典例子,講主角同佢嘅同伴為咗要摧毀一隻附有邪惡力量嘅魔戒而帶住隻魔戒,出發去一個有能夠破壞任何魔法嘅神山,佢哋喺中途遇到多種危險,例如同想得到邪惡力量嘅人戰鬥,最後佢哋成功摧毀魔戒,為世界帶嚟和平[23]

註釋[編輯]

  1. 喺多數奇幻故仔入面,呢啲生物都俾故仔世界嘅人當係正常嘅嘢。

TV Tropes[編輯]

  1. The Chosen One. TV Tropes.
  2. Lost Orphaned Royalty. TV Tropes.
  3. Cool Sword. TV Tropes.
  4. Muggles. TV Tropes.
  5. Five Races. TV Tropes.
  6. Our Elves Are Better. TV Tropes.
  7. Our Fairies Are Different. TV Tropes.
  8. Our Mermaids Are Different. TV Tropes.
  9. The Undead. TV Tropes.
  10. Necromancer. TV Tropes.
  11. Our Liches Are Different. TV Tropes.
  12. Medieval European Fantasy. TV Tropes.
  13. Medieval Stasis. TV Tropes.
  14. Artifact of Doom. TV Tropes.

睇埋[編輯]

[編輯]

  1. Clute, John (1999). The Encyclopedia of Fantasy (1st St. Martin's Griffin ed.). New York: St. Martin's Griffin.
  2. 14 Popular Fantasy Tropes — And How to Make Them Feel New Again.
  3. Bending of a Trope: How 3 Iconic Franchises Made the 'Chosen One' Cliche Work.
  4. David Colbert, The Magical Worlds of Harry Potter, p 195.
  5. Downing, David C. (2005). Into the Wardrobe: C. S. Lewis and the Narnia Chronicles. San Francisco: Jossey-Bass.
  6. "Dark Lord" in The Encyclopedia of Fantasy (eds. John Clute & John Grant: First St. Martin's Griffin ed.: 1999), p. 250.
  7. Niles, Doug (2013), Dragons: The Myths, Legends, and Lore, Avon, Massachusetts: Adams Media.
  8. Wilhite, C. J., Wilhite, C., & Williams, W. L. (2010). Dragon training and changing culture: A review of DreamWorks' How To Train Your Dragon. The Behavior Analyst, 33(2), 239-242.
  9. The 12 most intriguing MMO races.
  10. Hafstein, Valdimir Tr. (2002). "Dwarfs" as collected in Lindahl, Carl. McNamara, John. Lindow, John. (2002).
  11. Tolkien, J. R. R. (1996), Christopher Tolkien, ed., The Peoples of Middle-earth, Boston: Houghton Mifflin.
  12. Ármann Jakobsson (2015). "Beware of the Elf! A Note on the Evolving Meaning of Álfar". Folklore. 126 (2): 215–223.
  13. Froud, Brian (1996). The Goblin Companion. Atlanta: Turner.
  14. Waugh, Arthur (1960). "The Folklore of the Merfolk". Folklore. 71 (2): 73–84.
  15. Straubhaar, Sandra Ballif (2004). Chance, Jane (ed.). Myth, Late Roman History, and Multiculturalism in Tolkien's Middle-Earth. Tolkien and the invention of myth : a reader. University Press of Kentucky. pp. 101-117.
  16. Melton, J. G. (2010). The vampire book: The encyclopedia of the undead. Visible Ink Press.
  17. Botting, F. (2011). Zombie death drive: Between gothic and science fiction. Wasson and Alder, 36-54.
  18. Clive Leatherdale (1985). Dracula: the Novel and the Legend. Desert Island Books.
  19. Stoker, Bram (1975) [1897]. Leonard Wolf (ed.). The Annotated Dracula. Crown. p. 193.
  20. Gygax, Gary (1976). Grewhawk. TSR Rules. p. 35. LICHES: These skeletal monsters are of magical origin, each Lich formerly being a very powerful Magic-User or Magic-User/Cleric in life, and are now alive only by means of great spells and will because of being in some way disturbed.
  21. Six Pros and Cons of the Magic School Genre.
  22. Wonderbook: Book of Potions.
  23. Booker, C. (2004). The seven basic plots: Why we tell stories. A&C Black.

[編輯]