奧運廢棄場館

為咗達到舉辦奧運賽事場地嘅標準，好多城市攞到奧運主辦權之後，都會使好多錢，興建全新嘅場地，但呢啲場地喺奧運完結之後，唔少都會被荒廢。而興建同維護呢啲設施，往往產生唔少成本，包括借貸利息同土地嘅機會成本等。亦因為咁樣，有一啲人會反對自己嘅城市舉辦奧運。

各地情況

北京

北京喺2008年首次主辦奧運會，當時花咗470億美元爭取主辦，200 億人民幣用嚟起咗12座新場館同搭建8座臨時場館。當年北京標榜自己要搞綠色奧運，但當時就已經剷平無數嘅古宅，10年之後更加只剩低北京國家體育場有繼續維修同埋使用。有一啲臨時搭建嘅場館被棄置。喺石景山區，本來用嚟舉辦BMX比賽嘅老山小輪車賽場，已經變成一個小森林，連賽道都搵唔到。自行車賽事場地被蔓延雜草淹沒，完全睇唔到車道，看台座位亦生嗮青苔。而划艇用嘅室外場地，水道已經無咗水流，一遍荒蕪。另外，位於朝陽公園嘅沙灘排球場，亦日久失修，連看台上面嘅枱櫈都殘破不全；以京奧吉祥物福娃為造型嘅大型雕像亦被棄置喺叢林入面。

但就算係仍然會用嘅北京國家體育場，每年都要花一千萬美元維護，而且只係偶然使用，好多時候都只係畀遊客參觀。

雅典

雅典當年因應2004年奧運起咗22 座場館，大部分喺比賽之後都閒置咗，政府為咗維修呢啲閒置場館，花費高達7.84 億美元。雖然計劃入面，係有諗過點樣將呢啲支持變成民用，但最終都冇辦法實現。

雅典奧運村而家被塗鴉覆蓋、完全廢棄，政府亦無錢重建。

里約熱內盧

巴西舉辦完2016里約熱內盧奧運之後，多個體育場館都遭到閒置。出於安全考慮，法官已下令關閉奧林匹克公園。

例外情況

• 2012年倫敦奧運後，全部嘅場館都繼續運作。