奮進號

奮進號飛近國際太空站準備進行接駁作業

奮進號（STS Endeavour OV-105，又譯努力號）係美國太空總署（NASA）同甘迺迪太空中心（KSC）第五架用嚟執行太空飛行任務嘅穿梭機，亦係最新嘅一架，喺1992年5月7號嘅STS-49號任務第一次飛。奮進號負責嘅任務入面，唔少都係支援國際太空站計劃。

改名

正式編號軌道器105號（Orbitor Vehicle - 105）嘅奮進號，係美國一系列穿梭機入面，第一架用公開徵名比賽嘅方法來改名嘅，由美國嘅中小學生決定穿梭機個名之後，再由布殊總統喺1989年正式宣佈。跟番美國穿梭機嘅命名原則，奮進號個名係由一艘早年嘅研究調查船而嚟。奮進號係出名嘅英國探險家占士曲船長（James Cook）喺1768年第一次遠征搭嘅一艘368噸三桅帆船 HMS Endeavour。

建造

特色

某種角度嚟講，奮進號係一艘「拼裝穿梭機」，佢係用發現號同亞特蘭提斯號建造合約入面一批同時生產嘅備用結構零件做基礎，額外拼出嚟嘅，做番挑戰者號爆咗之後留低嘅任務。但係咁唔代表奮進號嘅性能無咁勁，而係相反，事實上因為係最新嘅一艘穿梭機，奮進號喺建造過程汲取咗好多前輩嘅教訓，有更多新開發嘅硬體裝備。而大部分新一代嘅穿梭機儀器設備都係喺奮進號率先採用之後，先趁住停飛維修嘅機會，裝番喺其他幾架穿梭機上面。呢啲改良嘅重點包括有：

• 一個直徑40呎嘅新型減速傘，可以縮短穿梭機落地之後嘅減速滑行距離大概1,000呎（近300米），改良之後嘅滑行總長係2,000呎。
• 一啲配合延伸繞行期限（Extended Duration Orbiter, EDO）改裝所需嘅管線同電路連結，因而能夠將穿梭機環繞地球運行嘅任務期限延長到28日。
• 升級版嘅航電系統，包括較先進嘅通用任務電腦，改良嘅慣性測量單元（Inertial Measurement Units）、戰術空中導航系統（Tactical Air Navigation Systems）、強化版嘅主任務控制器、多路轉換器/多路分解器（MUX/DEMUX）、固態跟星儀（Solid-State Star Tracker），同一套改良過嘅鼻輪轉向機構。
• 一套改良版嘅輔助動力系統（Auxiliary Power Unit, APU），係用嚟提供穿梭機液壓系統所需嘅動力。

建造過程

• 1982年2月15號 - 開始乘員模組嘅結構裝嵌（因為奮進號嘅主結構本來係其他太空梭嘅備用零件，所以整得重早過簽建造合約）
• 1987年7月31號 - 簽建造合約
• 1987年9月28號 - 機身後段機嘅結構裝嵌開始
• 1987年12月22號 - 機翼由格魯曼（Grumman）公司送到棕櫚谷（Palmdale）嘅裝嵌地點
• 1987年8月1號 - 最後裝嵌開始
• 1990年7月6號 - 最後裝嵌完成
• 1991年4月25號 - 由棕櫚谷完工出廠
• 1991年5月7號 - 運到甘迺迪太空中心
• 1992年4月6號 - 準備點火，進行飛行
• 1992年5月7號 - 第一次升空（STS-49）

奮進號曾經嚮1996年，喺加州棕櫚谷進行過一個8個月長嘅Orbiter Maintenance Down Period，OMDP（軌道器維修停飛期），喺呢段時間穿梭機改裝咗用嚟接駁國際太空站嘅External Air Lock（外部氣閘），令到太空站嚮1997年開始起之後，可以幫太空站補給運輸。

飛行紀錄

到2010年9月為止奮進號有24次飛行紀錄，喺太空渡過280日9個鐘39分44秒，環繞地球3,964圈，總飛行距離有成166,003,247公里。

#	日子	任務代號	降落地點	附註
1	1992年5月7號	STS-49	愛德華茲空軍基地	捕捉同重新部屬Intelsat（國際遙距通訊衛星組織）六號衛星
2	1992年9月12號	STS-47	甘迺迪太空中心	太空實驗室（Spacelab）J號任務
3	1993年1月13號	STS-54	甘迺迪太空中心	部屬TDRS-F（追蹤與資料中繼衛星）
4	1993年7月21號	STS-57	甘迺迪太空中心	做太空實驗室實驗，回收歐洲可回收載具（European Retrievable Carrier）
5	1993年12月2號	STS-61	甘迺迪太空中心	維修哈勃太空望遠鏡
5	1994年4月9號	STS-59	愛德華茲空軍基地	做太空雷達實驗室（Space Radar Laboratory）實驗
7	1994年9月30號	STS-68	愛德華茲空軍基地	做太空雷達實驗室實驗
8	1995年3月30號	STS-67	愛德華茲空軍基地	做太空實驗室Astro-2號實驗
9	1995年9月7號	STS-69	甘迺迪太空中心	籌載真空尾跡屏罩設備（Wake Shield Facility，WSF）同進行其他實驗
10	1996年1月11號	STS-72	甘迺迪太空中心	回收日本嘅太空飛行器單元（Space Flyer Unit）
11	1996年5月19號	STS-77	甘迺迪太空中心	做太空實驗室實驗
12	1998年1月22號	STS-89	甘迺迪太空中心	同和平號太空站會合，交換人員
13	1998年12月4號	STS-88	甘迺迪太空中心	裝嵌國際太空站任務
14	2000年2月11號	STS-99	甘迺迪太空中心	做太空穿梭機地貌雷達任務（Shuttle Radar Topography Mission）實驗
15	2000年11月30號	STS-97	甘迺迪太空中心	裝嵌國際太空站
16	2001年4月19號	STS-100	愛德華茲空軍基地	裝嵌國際太空站
17	2001年12月5號	STS-108	甘迺迪太空中心	同國際太空站交換人員
18	2002年6月5號	STS-111	愛德華茲空軍基地	同國際太空站交換人員
19	2002年11月23號	STS-113	甘迺迪太空中心	同國際太空站交換人員
20	2007年8月8號	STS-118	甘迺迪太空中心	太空漫步4次；裝國際太空站上面整合結構支架嘅S5號支架；帶SPACEHAB公司5000磅重嘅貨，係送去國際太空站嘅設備，第二位「太空老師」（而家叫教師太空人計劃）亦喺今次任務上太空（上一個係喺挑戰者號爆炸失事意外入面死咗嘅Christa McAuliffe）。雖然推進器下面嘅隔熱瓦喺發射升空嗰陣壞咗，而且哥倫比亞號穿梭機就係因為機身隔熱瓦脫落而失事，但NASA仍判斷損壞嘅部分唔會搞到出事，所以決定喺飛緊嗰陣唔整。因為驚5級颶風迪恩（Dean）會搞到任務控制中心撤離，所以奮進號提前一日返回。
21	2008年3月11號	STS-123	甘迺迪太空中心	運日本希望號實驗艙嘅保管室組件同加拿大嘅遙控機械人去國際太空站。
22	2008年11月14號	STS-126	愛德華茲空軍基地
23	2009年7月15號	STS-127	甘迺迪太空中心	帶Japan's Kibo Module最後兩部分、Spacelab Pallet-Deployable 2同埋一個Integrated Cargo Carrier-Vertical Light Deployable上國際太空站。[16]
24	2010年2月8號	STS-130	甘迺迪太空中心	帶Node 3（寧靜號節點艙）同Cupola（穹頂艙）上國際太空站。起國際太空站嘅進度去到98%。

任務徵章

奮進號每次任務嘅徵章
STS-49	STS-47	STS 54	STS 57	STS 61	STS 59	STS 68	STS 67
STS 69	STS 72	STS 77	STS 89	STS 88	STS 99	STS 97	STS 100
STS 108	STS 111	STS 113	STS 118	STS 123	STS 126	STS 127	STS 130
STS 134

出面網頁

• 美國國家航空暨太空總署官方網站（英文）
• 甘迺迪太空中心官方網站（英文）
• 奮進號介紹頁（NASA官方網站）（英文）
• 奮進號介紹頁（甘迺迪太空中心官方網站）（英文）