學術自由

學術自由即係指學術界做學術活動嗰陣嘅自由。可以再仔細啲咁定義，就係「有專業資格嘅人，喺佢哋勝任嘅範圍入面，去探索、發現、發表同埋講授佢睇到嘅真理，除咗受限於鑑證真理嘅理性方法之外，唔受任何權力約束嘅自由」。喺唔同嘅文化背景同情況之下，學術自由可以有唔同嘅意思。雖然到咗近代，大家對學術自由本身已經有基本共識，但係喺一啲個別議題上，都有好多唔同嘅睇法。

學術自由係思想自由嘅另一種表達方式。一個普遍嘅定義係，大學教職員同研究人員可以用佢哋嘅專業知識同埋學識去貢獻所長，喺教學同埋做研究嗰陣，唔會俾學院內外嘅制度同埋勢力限制或者干預，目的係保障學者可以探索唔同範疇嘅知識，同埋確保研究成果嘅中立性同可信性。而大學老師有發表、討論學術意見嘅自由，唔使驚會俾人炒魷魚或者降職。

部分被視為對學術自由造成風險嘅因素

• 院校業界協作 - 學校過分依賴院校業界協作，有可能會削弱學術自由(包括教學同研究)，甚至會將商業利益凌駕於學術誠信。