宏業建築工程
宏業建築工程有限公司（英文：Prestige Construction & Engineering Co. Limited ），簡稱宏業建築工程，係香港一間私人建築工程公司，辨公室喺九龍新蒲崗，主要承接香港樓宇維修、加建、改建同翻新工程，包括大埔宏福苑、沙田景田苑、西半山寧養臺等整體維修工程。當中曾捲入法律訴訟，並牽涉職安健同工程違規。 2025年11月26號宏福苑大火發生後，公司兩名董事涉嫌誤殺同貪污被捕，旗下嘅維修工程遭勒令停工。
宏業建築工程喺2004年6月9號成立，宜家兩名董事係侯華健同何建業，其中侯係公司唯一股東[1] 。成立嗰陣仲有位股東曹德光，但曹喺2006年時轉走晒手上所有股份，並喺2009年元朗樓宇翻新工程貪污判囚後，何建業加入成為公司董事[2] 。公司原本係註冊小型工程承包商，但2019年9月香港屋宇署已經唔續佢牌[3] 。現時只係屋宇署註冊一般建築承建商，有效期去到2027年3月[4] 。其業務主要承接香港樓宇維修工程，包括跑馬地藍塘花園、北角光超台、西半山般咸道寧養臺、屯門康麗花園等大維修項目[2] 。
市區重建局喺2021年推行「樓宇復修公司登記計劃」，審核承建商嘅專業資格同項目管理系統，當中宏業建築工程喺「項目管理」獲滿分[5] 。公司喺宏福苑大火受到調查後，市建局撤銷計劃登記同刪除記錄，仲話要改善計劃嘅審核同結果呈現方式[6] 。
打官司
[編輯]2012年沙田景田苑曾經有業主提告，要求裁定景田苑業主立案法團喺2011年舉行嘅特別大會，同埋管理委員會議決無效，撤銷9月同宏業建築工程簽嘅，約9,100萬港紙工程合約[7] 。嗰陣業主話「宏業建築工程」隱瞞貪污指控，提出嘅工程費用高過正常價，但法官認為證供對案件冇用，仲超出咗審訊範圍而撤銷佢申請[4] 。之後業主喺2014年上訴，被拒之餘仲要幫被告法團同宏業建築工程畀訟費[8] 。
違規紀錄
[編輯]小型工程
[編輯]2012年同2014年，宏業建築工程分別喺柏道寶威閣同般咸道寧養臺做小型工程，遭屋宇署指控疏忽同行為不當，違反《建築物條例》 [9] 。其中寶威閣部分冇跟例呈交開工同完工通知書，同埋識別小型工程性質級別；寧養臺部分就冇跟例交啱尺嘅則及準時交表通知[10] 。最後屋宇署註冊承建商紀律委員會喺2023年8月裁定，唔準宏業建築工程核證同做小型工程四個月兼罰港幣50,000蚊，涉事嘅授權簽署人就被譴責同罰港幣5,000蚊[9] 。
職安健
[編輯]2018年宏業建築工程負責新蒲崗嘉時工廠大廈維修工程時，違反四條《工廠及工業經營條例》建築安全規例[11] 。包括冇確保棚架同梯啱情況下用、提供或維修安全出入口、工作安全指引同監督，同埋採取足夠步驟防止有人墮落，分別罰款10,000至17,000蚊[12] 。
之後承辦西半山寧養臺維修工程期間，再犯《工廠及工業經營條例》建築安全規例[11] 。勞工處喺2019年指控冇確保工人配戴啱嘅安全帽，罰咗9,500港元[12] 。2022年再告承辦商，冇確保提供或維修安全出入口，同埋工人喺監督下起拆棚架，分別喺2023年罰咗港幣4,000同3,000蚊[13] 。
宏福苑大火
[編輯]2021年12月21號，大埔宏福苑業主立案法團委派鴻毅建築師有限公司為大維修工程顧問，幫手寫工程標書，2023年5月16號經市區重建局「招標妥」公開招標[14] 。同年7月5日截標後，夾埋收到57份合資格承辨商嘅標書，宏業建築工程係其中之一[15] 。工程顧問鴻毅喺承辨商分析報告之中，評定宏業建築工程喺「公司背景」同「合理報價」部分，分別獲得 B 級同 A 級，成為57間承辨商之中嘅「首選考慮」 [16] 。 2023年9月，鴻毅同咗上述法團同宏福苑管理委員會匯報，之後報告交畀市建局審批[17] 。
2023年10月，宏業建築工程同13間承辨商接受鴻毅同上述法團面試，綜合評為B 級表現理想[18] 。根據鴻毅嘅面試分析報告，宏業建築工程聲稱冇遭勞工處檢控、勒令停工同傭用黑工等記錄，亦冇同法團業主嘅訴訟記錄[18] 。面試嘅綜合評分由鴻毅同法團比例各佔一半，分別評為「優良」（90分）同「有待改善」（57分），鴻毅喺報告大讚承辦商「大致展現足夠能力同專業水平，能夠清楚針對唔同方面提問回應，關於標書內容同法例方面認知清楚」 [17] 。最後宏業建築工程喺2024年1月28日，爭議下成為宏福苑大維修工程承辨商[17] 。
2025年11月26號發生宏福苑大火，造成過百人死亡同近百人受傷。香港警務署喺大火發生後，以涉嫌誤殺拉咗宏業建築工程兩名董事侯華建、何建業，同埋一名工程顧問兼授權簽字人黃忠基，11月27日搜查公司新蒲崗辦公室，之後押解三人到其寓所搜證[19] 。事後喺11月28號獲准保釋候查，但同日廉政公署以涉嫌貪污為由再拉上述三人[20] 。翌日屋宇署勒令公司承辦嘅28個私樓工程停工，當中有11個維修工程同17個加改建工程[21] 。
參考
[編輯]- ↑ 李穎霖、勞顯亮 (2025-11-27)。〈宏福苑五級火｜宏業建築工程成立21年 曾因棚架安全遭定罪罰款〉 (香港中文)。香港。香港01。喺2025-12-03搵到。
- ↑ 2.0 2.1 〈香港世紀大火｜大埔宏福苑大維修 57 間承建商入標 涉案宏業建築工程顧問評分最高 廉署拘捕 8 人 2025年11月29日〉 (香港中文)。香港。梭角媒體 Point Media。2025-11-29。喺2025-12-03搵到。
- ↑ 〈宏福苑五級火︱勞工處災前一周巡查 書面警告宏業採防火措施 去年7月起3宗檢控〉 (香港中文)。香港。Yahoo 新聞。2025-11-28。喺2025-12-03搵到。
- ↑ 4.0 4.1 〈宏福苑五級火 3.3億維修費惹爭議 承辦商「宏業建築」曾遭其他屋苑業主入稟控造價過高〉 (香港中文)。香港。法庭線 The Witness。2025-11-28。喺2025-12-03搵到。
- ↑ 〈大埔宏福苑五級火｜「宏業」項目管理評分獲評滿分 市建局：會改善審核範疇準則〉 (香港中文)。香港。有線新聞。2025-12-03。喺2025-12-03搵到。
- ↑ 〈宏業及鴻毅疑不達評分標準仍獲滿分 市建局今突刪紀錄〉。《東網 on.cc》 (香港中文)。香港。2025-12-03。喺2025-12-03搵到。
- ↑ 香港特別行政區土地審裁處 (2012-08-16)。《建築物管理申請編號2012年第189宗判決書》 (香港中文) (第LDBM 189/2012版)。香港。喺2025-12-03搵到。
- ↑ 香港特別行政區高等法院上訴法庭 (2014-04-23)。《高等法院雜項案件2014年第430號判案書》 (香港中文) (第HCMP 430/ 2014版)。香港。喺2025-12-03搵到。
- ↑ 9.0 9.1 〈宏福苑五級火｜涉事承辦商是誰？ 「宏業」十被控違職安例、三宗涉棚架安全 曾遭屋宇署紀律處分〉 (香港中文)。香港。集誌社 The Collective。2025-11-28。喺2025-12-03搵到。
- ↑ 屋宇署 (2023-08-11)。〈註冊一般建築承建商被紀律委員會禁止核證或進行小型工程四個月〉。《新聞公報》 (香港中文)。香港。喺2025-12-03搵到。
- ↑ 11.0 11.1 〈承建商曾遭檢控捲官司 維修顧問招標報告失實〉。《明報》 (香港中文)。香港。2025-12-02。喺2025-12-03搵到。
- ↑ 12.0 12.1 〈宏福苑大火｜維修承建商宏業建築工程 近年至少7次違例判罰紀錄〉 (香港中文)。香港。無綫新聞。2025-11-30。喺2025-12-03搵到。
- ↑ 勞工處 (2025-10-16)。〈過去兩年的定罪紀錄〉 (PDF)。《職業安全及健康定罪紀錄》 (香港中文)。香港。頁 39-40。喺2025-12-03搵到。
- ↑ 鴻毅建築師有限公司 (2023–09)。〈宏福苑 - 預算工程籌備時間表〉. 《業主大會樓宇復修工程資料簡報》 (簡報) (香港中文) (第SWP3231/EGM /001/JW版)。香港：宏福苑業主立案法團。頁 4。喺2025-12-03搵到。
{{cite book}}: CS1 maint: date format (link) - ↑ 鴻毅建築師有限公司 (2023–09)。〈投標過程〉. 《業主大會樓宇復修工程資料簡報》 (簡報) (香港中文) (第SWP3231/EGM /001/JW版)。香港：宏福苑業主立案法團。頁 24。喺2025-12-03搵到。
{{cite book}}: CS1 maint: date format (link) - ↑ 鴻毅建築師有限公司 (2023–09)。〈回標分析〉. 《業主大會樓宇復修工程資料簡報》 (簡報) (香港中文) (第SWP3231/EGM /001/JW版)。香港：宏福苑業主立案法團。頁 25-40。喺2025-12-03搵到。
{{cite book}}: CS1 maint: date format (link) - ↑ 17.0 17.1 17.2 〈【宏福苑五級火】工程顧問回標分析報告疑造假 稱宏業建築工程沒有訴訟紀錄〉 (香港中文)。香港。獨立媒體 inmediahk.net。2025-12-01。喺2025-12-03搵到。
- ↑ 18.0 18.1 鴻毅建築師有限公司 (2023–09)。〈分析標書工作後的續後程序〉. 《業主大會樓宇復修工程資料簡報》 (簡報) (香港中文) (第SWP3231/EGM /001/JW版)。香港：宏福苑業主立案法團。頁 41-58。喺2025-12-03搵到。
{{cite book}}: CS1 maint: date format (link) - ↑ 〈宏福苑五級火災｜警拘三名工程公司負責人嚴重疏忽涉嫌誤殺〉 (香港中文)。香港。NOW新聞。2025-11-27。喺2025-12-04搵到。
- ↑ 〈大埔宏福苑五級火｜廉署再拘3人 為宏福苑大維修工程承建商負責人〉。《明報新聞網》 (香港中文)。香港。2025-11-29。喺2025-12-03搵到。
- ↑ 林遠航 (2025-12-01)。〈宏福苑火災｜屋宇署公布承建商宏業28已停工私樓名單 涵半山豪宅〉 (香港中文)。香港。香港01。喺2025-12-03搵到。