寄生植物
寄生植物係指植物嘅整個或者部分生命週期，佢哋嘅營養全部或者部分嚟自其他植物（寄主植物）。寄生植物有特化嘅根，叫做吸器（haustorium），會穿過宿主嘅組織到達木質部、或者韌皮部，或者兩樣都有，嚟吸取水份同養份。
而家已經發現做寄生嘅開花植物大約有19科，4,100種[1]。
分類
[編輯]寄生植物有下面嘅特性：
- 1a. 專性寄生（obligate parasite）——當寄生物冇宿主嘅時候就完成唔到佢嘅生活史。
- 1b. 兼性寄生（facultative parasite）——當冇宿主嘅時候，寄生物仍然可以完成佢嘅生活史。
- 2a. 莖寄生植物——寄生物著生（寄生）喺宿主嘅莖。
- 2b. 根寄生植物——寄生物著生喺宿主嘅根。
- 3a. 全寄生植物（Holoparasite）——植株幾乎冇葉綠素，而完全寄生喺另一棵植物度。
- 3b. 半寄生植物（Hemiparasite）——植株喺自然狀態下係寄生性嘅，但係本身有某種程度嘅光合作用能力。半寄生植物可能只係吸取宿主嘅水份同礦物質，但係都有好多半寄生植物從宿主度吸取有機營養素。
半寄生植物，可能可以應用到上面三組特性嘅某一特性，例如：
- 生長喺西澳嘅Nuytsia floribunda(Labill.) R.Br.（桑寄生科）係一種「專性寄生」嘅「半寄生」植物。
- 而分布歐洲到西亞嘅列當科植物Rhinanthus minor L.（Yellow rattle）係一種「兼性」「根部」「半寄生」植物。
- 槲寄生係「專性」「莖」嘅「半寄生」植物。
全寄生植物就一定係專性嘅，所以只需要兩個詞，例如：菟絲子係「莖」嘅「全寄生」植物；產於非洲嘅Hydnora africana Thunb.係一種寄生於「根部」嘅「全寄生」植物。