專業動力
專業動力（Professional Power）係香港智庫組織，2010年創辦，立場定位係中間偏建制派。
召集人係西貢區議會議員方國珊，成員多數係西貢區地區人士，包括區議員陳繼偉、張展鵬同張美雄。
2021年第7屆香港立法會選舉，專業動力派出林素蔚參選新界東南選區，喺呢屆投票氣氛低迷（泛民主派全面杯葛）之下，結果以38214票當選。
政治立場
[編輯]專業動力官方自居「民生派」，外間就多數定義佢哋係中間派或者中間偏建制派。
黨內靈魂人物方國珊同最早期加入嘅陳繼偉都有親中陣營背景（方係前自由黨成員，陳係獨立親中派），不過，方國珊又試過參加由泛民主派組織嘅七一大遊行。
2019年香港修例風波期間，專業動力反對逃犯條例修訂草案，力撐一次移交陳同佳，亦都曾經譴責元朗襲擊事件。
喺選舉方面，佢哋好多時都有中方「祝福」，好似區議會選舉，部份專業動力候選人嘅名就多次出現喺親中社團嘅「推薦名單」當中，但當記者問到佢哋係咪有親中派支持嗰陣，佢哋通常都否認，同佢哋保持距離。選委會方面亦都係咁，喺區議會或者地區代表界別入面，專業動力嘅成員往往獲保證撞到一席。
第7屆香港立法會選舉方面，西貢區所屬嘅新界東南選區，傳統親中陣營淨係派一個人出選，被視為「讓路」畀專業動力嘅人，果然成員林素蔚（聖雅各福群會林姑娘）喺新界東南贏到第二席。
2022年，張展鵬、張美雄、陳繼偉另起爐灶，搞咗一個智庫同埋地區組織民生圓桌，專業動力嘅區議員得番方國珊一個。
