對等文本

相中嘅係羅塞sak1塔石碑；一般認為羅塞塔石碑嘅事反映，對等文本對學語言嚟講極其重要。

對等文本，又或者叫平行文本，指嘅係有兩份或多份文本，佢哋喺內容上相對應，但係就用咗唔同話嚟寫，例子可以睇吓《新約全書，中西字》嘅新約聖經，佢哋同一段內容會用英文同漢字粵文寫，以粵語為母語、識睇漢字嘅人，可以一路睇一路學英文。

基本概念

二〇一九年喺大英博物館影到嘅羅塞塔石碑

舉例說明，想像家吓要整一份粵英平行嘅《新約聖經》文本。呢份文本理應要句句說話都有粵文版同英文版。即係好似噉：

（英文） Then Jesus came from Galilee to the Jordan to be baptized by John. But John tried to deter him, saying, "I need to be baptized by you, and do you come to me?"

（粵文） 其後耶穌由加利利嚟到約旦，準備接受約翰嘅洗禮。不過約翰就似乎有啲驚訝，講：「應該係我接受你嘅洗禮喎，點解你會嚟我呢度？」

呢份文本就達致粵英並行。

對等文本有好多用途，例如可以用嚟幫人學語言，又或者用嚟做語料教電腦做粵英翻譯呀噉。

解讀技巧

做語言學研究嘅人，有時會用平行文本嚟拆解未知嘅語言。即係攞住一份份平行文本，目標語言同某隻已知語言並列，再比較詞語間嘅對應規律。舉個簡單例子說明，假想有一隻未知嘅語言叫南 X 島語，呢隻語言係用羅馬字拼寫嘅，而依家發現咗南 X 島語同粵文嘅平行文本，當中

• 南 X 島語："ka mi ro kaai."

  對應粵文：佢喺度食飯。

• 南 X 島語："ka su thenar kyi nyit."

  對應粵文：佢尋日去神殿嚟。

由上述例子可見，兩句都有 ka 一詞，而且對應嘅粵文句子同樣都有佢，噉 ka 一詞喺南 X 島語之中好有可能係佢噉嘅意思，而且既然呢隻語言會將身為主語嘅佢擺喺句子最前，就表示呢隻語言似係主動賓型或者主賓動型嘅。透過大量噉樣嘅對照，研究者就可以逐步建立詞彙對應表，從而拆解未知語言嘅語法同詞彙。

不過，單靠平行文本依然有局限：有唔少語言都冇書寫系統，只得口語流傳冇得留低文字記錄；即使有對照文本，若果翻譯得唔完整或者啲字詞有多重意思，都會阻礙理解。

歷史背景

睇埋：羅塞塔石碑

喺翻譯同語言教育等領域嘅歷史上，對等文本一直都相當有用。

譬如係羅塞塔石碑嘅事就好出名：羅塞塔石碑係一塊遠古嘅石碑，據考究出自古埃及；塊石碑喺一七九九年被發現，用咗三文兩語（聖書體古埃及語、世俗體古埃及語同古希臘文）寫同一段說話；之前，學界一路都無法解讀古埃及語，但靠住古希臘語（已知嘅語言）同羅塞塔石碑，得以學識少量古埃及語字詞，然後佢哋就可以推測其他古埃及文文獻寫咗啲乜。呢件事反映咗對等文本對學習未知語言嚟講係幾咁有用。

睇埋

• 機械翻譯
• 語言資源
• 學第二語言
• 示拿嘅詠唱

引述

參考文獻：

• Parallel text processing bibliography by J. Veronis and M.-D. Mahimon
• Proceedings of the 2003 Workshop on Building and Using Parallel Texts
• Proceedings of the 2005 Workshop on Building and Using Parallel Texts

連結

• （英文） Trans-Search 嘅對等字詞庫