小型大楷

小型大楷嘅其中一種用途係用嚟開段，等第一行或者頭幾個字個頂睇落可以齊葺葺。

小型大楷（英文：small caps），書面語寫小型大寫，係一種印刷同平面設計用嘅字母，形態上係大楷，但係高度只有正常字母嘅X長左右，呢種字母正常唔會單獨用，而係配合大楷或者細楷字母，作為一種改善排版效果嘅方法。一般畀出嚟嘅定義會話小型大楷係同細楷一樣大，但係現實生活入面嘅小型大楷其實通常係高過X長少少，而唔係同X長一樣。

小型大楷有兩種主要用途，一係啲字母其實係大楷，但係真係用大楷又太突出嗰陣用嚟代替大楷（例如配合古風體數字用），二係啲字母其實係細楷，但係某種原因想用大楷（例如細楷太唔突出），但係用大楷又太突出嗰陣用嚟代替細楷。

統一碼原則上並冇小型大楷嘅概念，只係當佢係異體字形，不過，因為有啲領域攞咗一啲小型大楷嘅字母當符號用，有啲語言又攞咗一啲本來係小型大楷嘅字母當正式字母用，所以先收錄咗一啲小型大楷；喺電腦排版，㨂小型大楷基本上係字型檔負責嘅嘢，喺早期，小型大楷甚至係獨立字型檔。

書目

• 何錦隆編 (2012)。"macron" (PDF). 《英漢印刷及傳訊科技雙解詞典》 (增訂版)。香港：香港印刷資源中心有限公司。
• Bringhurst, Robert (2015). The Elements of Typographic Style (加拿大英文) (第4.1版). Seattle, WA: Hartley & Marks. ISBN 978-0-88179-212-6.