就業能力

呢份履歷表（英文），反映寫嗰個人有咩特質？

就業能力，粵拼：zau6 jip6 nang4 lik6，係就業相關嘅討論中成日提到嘅概念。就業能力大體上係指個體係咪有能力搵到工，而且搵到之後仲要保住份工。個概念可以包括個體具有嘅特性，譬如係個人嘅技能、性格特質同埋態度呀噉，而喺好多研究者嘅討論中，市場等嘅外在因素都可以係就業能力嘅一部份。

基本概念

睇埋：就業、見工同組織

就業能力嘅諗頭，早喺一九五〇年代已經有人提及，仲一直有引起社科方面嘅學者討論。到咗二〇二〇年代初，學界對就業能力一詞嘅定義係乜，仲未有完全一致嘅見解。不過大致上，就業能力都係指緊一個人有幾能夠搵到工同埋保住份工，仲要喺份工度有長遠嘅發展。

例如喺二〇二〇年代初，蘇格蘭嘅政府噉樣定義就業能力一詞：

就業能力結合咗一系列嘅因素同過程，呢啲嘢令到人能夠通往就業、就業後 keepkip1 得住份工、並且喺事業上有所發展。就業能力取決於個人特性，比如係佢嘅自信心、學歷、健康等，亦取決於外在因素，包括係當地嘅勞工市場狀態同埋公共服務有幾容易搵得到等。

呢個定義講到就業能力包含個人嘅內在因素，但亦受制於外在因素，呢點好多就業相關嘅工作者認同，譬如係有學者喺〇三年撰文，主張個概念包含以下呢啲部份：

• 個人特性：個人嘅態度、知識及技能水平同埋係咪肯努力搵工等。
• 市場特性：譬如係對勞工嘅需求噉。即使個人嘅知識技能水平再高都好，如果身處個國家或地區對佢呢種人材冇需求，佢都會難搵工。
• 結果指標：有啲研究者集中於量度就業能力引起嘅效果，嚟衡量每個人嘅就業能力，可量度嘅結果包括有搵唔搵到工、份工嘅水準有幾高、份工前景如何等。
• 活動：有啲研究者則集中於剖析能夠提升就業能力嘅活動，例如係個人有冇主動追求進一步嘅培訓呀噉。

影響因素

畢業生嘅就業能力，一般會當成係多面向、動態嘅概念，唔只係講緊就業嘅成效，仲包括埋畢業生搵工、維持住自己份工同埋隨時間適應嘅能力。

喺二十一世紀初，就業能力要點提升，係廣受關注嘅議題。例如大學等嘅學府，就好在意就業能力，想理解點樣先可以確保學生唔淨只考試高分，仲有返咁上下就業能力。各界嘅其中一個討論重點，就係講緊就業能力會受咩因素影響。

軟技能泛指一啲無論係做邊行，都會用得到嘅技能，譬如係批判思考、解難、團隊合作、領導才能同埋創意等等。呢啲技能，都被指係就業能力嘅重要部份，而且一個難點係，要搵實質嘅證據寫落去履歷表度，向未來僱主証明自己真係有嗰啲技能。

移民對就業能力有一定嘅影響。研究表明，移民去第啲國家或地區嘅人，好多時都會喺求職過程中遇到困難，譬如係語言方面嘅困難，專業牌照因為制度唔同咗所以要再考過，又或者係適應唔到工作場所嘅文化呀噉。

睇埋

• 成人教育
• 讀寫能力
• 競爭優勢
• 個人品牌
• 行銷漏斗

文獻

歐美出嘅文獻：

• Forrier, A. and Sels, L., 2003. The concept employability: A complex mosaic. International journal of human resources development and management, 3(2), pp.102-124，呢篇文 03 年發表，相當多人引用。