巴西帝國

巴西帝國旗

巴西帝國（Empire of Brazil）係一個19世紀嘅帝國，領土大致包括現今嘅巴西同烏拉圭（直到烏拉圭喺1828年獨立）。帝國嘅政體係代議制議會君主立憲制，由佩德羅一世同佢個仔佩德羅二世兩位皇帝統治。

巴西本來係葡萄牙嘅殖民地。1808年，為咗逃避拿破崙入侵葡萄牙，當時嘅葡萄牙攝政王（即係後來嘅國王若翰六世）將佢自己同成個政府搬到巴西城市里約熱內盧，令巴西成為葡萄牙帝國嘅所在地。若翰六世後來返返葡萄牙，留低佢嘅大仔兼王位繼承人佩德羅，以攝政王身份統治巴西王國。

1822年9月7號，佩德羅宣布巴西獨立，並且成功打贏咗一場對抗佢父王王國嘅戰爭。同年10月12號，佢被擁立為佩德羅一世，成為巴西第一位皇帝。呢個新成立嘅國家幅員廣闊、人口稀少，而且種族多元。