布列斯特-立陶夫斯克條約

出自維基百科,自由嘅百科全書
布列斯特-立陶夫斯克條約
條約嘅第一版
類型和約
簽署日期1918年3月3號
簽署地點 白俄羅斯布列斯特[1]
生效條件批准
簽署者
  • 德意志帝國 Max Hoffman
  • 其他代表人物
  • 俄羅斯蘇維埃聯邦社會主義共和國 Grigori Sokolnikov
締約方
語言德文匈牙利文保加利亞文土耳其文、同埋俄文
  俄國喺條約輸咗嘅地

布列斯特-立陶夫斯克條約俄文Брестский мир德文Friedensvertrag von Brest-Litowsk),簡稱布列斯特條約,係蘇俄同埋同盟國之間喺1918年3月3號喺白俄羅斯布列斯特簽嘅和約,代表俄羅斯退出一次大戰東方戰線正式打完。

背景[編輯]

自從布爾什維克十月革命開始掌權以嚟,佢哋一直都談判緊停火,希望儘早俾俄羅斯(革命之後變咗做蘇俄)退出場仗。到1917年12月,佢哋終於同意咗停火,準備談判同簽和約

當初談判嘅時候,德國嘅立場就係,俄國應該割讓所有同盟國已經控制緊嘅地區。但係,蘇俄方面並冇同意到,覺得條約太嚴格。相反,佢哋嘗試拖慢進度,希望能夠又唔簽和約又唔洗繼續打仗。同時,佢哋希望歐洲其他國家都同樣會出現共產革命

當然,德國因爲知道俄國唔會肯簽,所以喺1918年2月曾經再一次發動過攻擊。俄國喺冇任何軍事準備底下,加上俄羅斯內戰嘅影響,令德軍可以基本上行入去俄國地頭。到3月頭,俄國終於認輸,肯同對方簽和約。

條文[編輯]

諷刺嘅係,俄國最終同意嘅條文,其實嚴格過佢哋原本拒絕咗嘅條文。

喺條約之下,俄國失去咗烏克蘭波蘭白俄羅斯波羅嘅海國家、同埋高加索地區。呢啲土地包含咗俄國本身 34% 嘅人口、54% 嘅工業地、89% 嘅煤礦、同埋26% 嘅火車軌。除此之外,俄國亦承認咗芬蘭獨立,同時應承會停原本同烏克蘭人民共和國打緊嘅仗。

喺賠錢嘅議題上面,俄國同意會俾德國60億馬克

結果[編輯]

反應[編輯]

呢份條約喺俄國非常受爭議,特別係嚟自反共嘅白軍。佢哋聲稱,呢個就係俄國應該繼續打仗對抗德軍嘅原因,同時批評紅軍嘅做法。

推翻[編輯]

喺一次大戰打完嘅時候,同盟國最終都輸咗俾協約國。喺佢哋簽嘅《康邊停戰協定》之中,推翻咗布列斯特條約[2]。之後,蘇俄嘗試攞返佢哋喺條約入面冇咗嘅地。佢哋成功贏返烏克蘭同埋高加索地區,但係就依然打唔贏波蘭波羅嘅海國家

喺1922年嘅一份條約,威瑪共和國蘇聯同意放棄所有土地同錢銀嘅瓜葛。

睇埋[編輯]

參考資料[編輯]

  1. "To whom did Brest belong in 1918? Argument among Ukraine, Belarus, and Germany" (烏克蘭文). 烏克蘭之聲. 2011-03-25.
  2. Fry, Michael Graham; Goldstein, Erik; Langhorne, Richard (2002). Guide to International Relations and Diplomacy. Continuum. p. 188. ISBN 0826452507.