帕夫洛娃蛋糕

帕夫洛娃蛋糕

一個以奇異果、士多啤梨同百香果裝飾嘅帕夫洛娃蛋糕
主要成分	蛋白, 細砂糖

帕夫洛娃蛋糕（英文：Pavlova cake），又名百露華蛋糕、巴甫洛娃蛋糕，係一種以蛋白霜為基底嘅甜品。佢起源於20世紀期嘅澳洲或紐西蘭，並以俄羅斯芭蕾舞者安娜·帕夫洛娃嚟命名 。帕夫洛娃蛋糕係呈圓餅形嘅烤蛋白霜，有香脆外殼同柔軟輕盈嘅內層，通常會放啲水果同忌廉喺上面 。

呢款甜品，據信係為咗紀念帕夫洛娃喺1920年代到訪澳洲或紐西蘭嘅期間或離開之後所發明嘅 。呢位發明者嘅國籍一直喺澳紐兩國爭議多年嘅問題 。帕夫洛娃蛋糕係兩國飲食文化中不可或缺嘅一部分。呢款甜品經常喺節慶同假日時享用，因為令人聯想到夏天，所以喺夏天，包括聖誕節期間，最常見亦最受歡迎 。

製作同保存方法

帕夫洛娃蛋糕同蛋白霜相似。首先將蛋白（有時會加鹽，容易啲將蛋白打起）打至乾性發泡，再慢慢加入細砂糖，最後加入醋或檸檬汁（或其他可用食嘅酸液）、粟粉同雲呢拿精油。然後將混合物倒喺牛油紙上，整成一個直徑20厘米嘅圓形蛋糕，中間稍微凹陷。之後放入焗爐以120–150 °C低溫烤焗45–60分鐘，最後由佢喺焗爐入面冷卻同乾燥，通常放過夜 。

帕夫洛娃蛋糕有酥脆嘅外殼，但中心柔軟濕潤、質感猶如棉花糖，同一般完全硬化哂嘅蛋白霜唔同。有人話咁係因為加咗粟粉；亦有人話粟粉同酸一樣只係用嚟增加蛋白霜嘅穩定性 。 帕夫洛娃蛋糕傳統上會以忌廉同奇異果、百香果、士多啤梨等新鮮嘅軟身水果嚟做裝飾 。工廠製嘅帕夫洛娃蛋糕可以喺超級市場（外國嘅）買到，可隨個人喜好加上裝飾。

加咗裝飾但食唔哂嘅帕夫洛娃蛋糕可以放雪櫃雪過夜，不過由於吸收咗水氣，蛋糕外殼會失咗酥脆嘅口感 。至於未裝飾嘅帕夫洛娃蛋糕，可以放係焗爐入面放一夜，或者放入密封容器幾日，等有時間時再裝飾。 喺紐西蘭，帕夫洛娃蛋糕通常會有奇異果；而澳洲就通常會有百香果，有時仲會加菠蘿；至於英國就多數加士多啤梨；古早啲嘅版本仲會加核桃 。

• 
  一個自家制，未焗嘅帕夫洛娃蛋糕。
• 
  一個係店鋪買嘅紐西蘭帕夫洛娃蛋糕，飾以英式雜果軟糖、士多啤梨同忌廉。可以見到棉花糖般柔軟嘅中心。

文化