四聲

四聲（粵拼：sei³ sing¹）係中文聲調，基於中古漢語嘅調類分類爲4個種類嘅聲調。喺中文音韻學分爲平聲（ping⁴ sing¹，中古漢語拼音：bieng）、上聲（soeng⁵ sing¹，中古漢語拼音：zjangx）、去聲（heoi³ sing¹，中古漢語拼音：khioh）、入聲（jap⁶ sing¹，中古漢語拼音：njip）。所以四聲又叫平上去入（ping⁴ soeng⁵ heoi³ jap⁶）。

喺中古後期，隨住全濁聲母清化，聲調開始因爲噉而分陰陽，調分陰陽帶來嘅係四聲八調（sei³ sing¹ baat³ diu⁶），亦即四個聲調各自都分咗陰陽，喺調類上總共有八個。現代粵語嘅聲調就係繼承自四聲八調格局，喺呢個基礎上，陰入根據元音長短，分成咗上陰入同下陰入，形成而家粵語九聲六調嘅格局。以下係粵語聲調嘅分類：

• 第一聲、第四聲分別係陰平同陽平，都係平聲。
• 第二聲、第五聲分別係陰上同陽上，都係上聲。
• 第三聲、第六聲分別係陰去同陽去，都係去聲。
• 第一聲、第三聲、第六聲（亦有分類爲第七、八、九聲）分別係上陰入、下陰入、陽入，都係入聲。

另外，以現代中文中嘅北方話爲基礎嘅普通話，佢嘅聲調亦係四聲，內容同古四聲唔同，中古漢語嘅入聲消失咗，分陰陽兩部嘅只有平聲，所以佢嘅四聲分別係第一聲（陰平）、第二聲（陽平）、第三聲（上聲）、第四聲（去聲）。

概要

喺語言學上嘅聲調（tone）係指音節之間音嘅高低唔同，中文就用呢種高低變化來區分唔同語彙。不過，喺中國音韻學中，音韻分類整理後，聲調就唔只高低變化，音嘅舒促（音嘅長短）都包含入聲調嘅範疇，亦即入聲，喺音節尾有-p、-t、-k、-h之類嘅內破音做結束，令音節變短，呢啲就分類爲入聲。冇咗入聲嘅語言就冇噉計。

喺中文，一個音節（一隻字）肯定配一個聲調，呢個高低稱呼做調值。呢個音高上下，而家用五度式來表示，分別係低（1）、半低（2）、中（3）、半高（4）、高（5），透過佢哋數值嘅組合來表示調值。然後再歸納分類同一調值嘅音節，再加埋音節尾嘅舒促，就會得出調類。

早期中古漢語係得四個調類，之後調值、音韻變化，中古以後嘅聲調分爲陰調同陽調，合計八聲，分類爲四聲八調。

中古音嘅聲調

四聲嘅名稱開始於六朝時代中嘅齊梁人沈約（441年～513年），佢根據中文聲調嘅聲氣，分出咗平、上、去、入嘅名。《梁書·沈約傳》話沈約作咗《四聲譜》，又有記載話梁武帝問周捨：「四聲係乜嘢？」答話：「天子聖哲」（天係平聲tin¹，子係上聲zi²，聖係去聲sing³，哲係入聲zit³）。平、上、去、入究竟係乜嘢內容佢無講，舉嘅只係啲代表字。另外因爲音韻變化嘅結果，而家好多中文方言「上」字嘅發音係去聲。習慣上，爲咗表示出個聲調，喺「上聲」呢個詞會讀上聲。

調值

六朝到唐代嘅四聲調值（調類嘅實際音值）好難推斷，除咗入聲可以知道佢係個短嘅音外。比較詳細嘅記述係日本嘅安然《悉曇藏》（990年）卷五：「平聲直低，有輕有重。上聲直昂，有輕無重。去聲稍引，無輕無重。入聲徑止，無內無外。平中怒聲，與重無別。上中重音，與去不分。」

上古音嘅聲調

聲調嘅發現係喺六朝時代嘅沈約，噉以前嘅上古漢語有冇聲調就成咗個問題。呢個問題古來好多人提出唔同嘅主張，啲主張嘅根據都係《詩經》嘅押韻。研究《詩經》押韻時四聲嘅調配，見到平聲、上聲可以同去聲押韻，去聲同入聲唔一定押韻。以《詩經》押韻調配爲音韻研究基礎，清代考證學者顧炎武主張語言嘅遲速輕重係押韻嘅平仄，平聲最長，上、去次長，入聲係急止停頓嘅音。另外去聲同入聲係押韻嘅，即使係中古音，「易」（入：jek，去：jeh）、「出」（入：chjyt，去：chjyih）、「惡」（入：qak，去：qoh）等字同時有去入二聲，所以可以睇出去入二聲有接近嘅關係。根據呢樣，段玉裁提出平、上、入三聲合埋同去聲另計，黃侃則提出平、入二聲同上、去二聲噉分成兩類。受呢樣影響，現代嘅王力喺《漢語史稿》提出平、入二聲嘅兩大分類，再按音嘅長短來分，分成長、短二類，合埋就係四聲。現代中文嘅聲調特徵係以音高爲主，但喺古代中文係以音嘅長度爲主要要素，長平聲變成咗平聲，短平聲變成咗上聲，長入聲變成咗去聲，短入聲變成咗入聲。張日昇以《詩經》作統計，指上古有去聲，但去聲以ɸ、d、g、m、n、ŋ爲韻尾。

現代音嘅聲調

現代各種中文嘅聲調係基於中古四聲分咗陰陽二類後嘅八聲（四聲八調）。從中古音到現代音，個調值變化未明，雖然各路中文嘅差異好明顯，但調類嘅變化好少，最大嘅特徵係對應聲母嘅清濁分成咗陰陽二類。一般來講，陰調係高調，陽調係低調，喺由來上，陰調來自古清音，陽調來自古濁音。噉係開始於濁音相比清音，個調要低啲，當中原無咗清濁區別時，就用音嘅高低來繼續啲字嘅分別。現代吳語嘅紹興方言同閩語嘅潮州方言全部調類都分咗陰陽二類，成爲八聲，呢啲陰陽就同清濁嘅區別對應。現代中文嘅普通話喺平聲分咗陰陽二類，入聲無咗。一般喺平聲，多數中文都分陰陽兩類，噉係因爲平聲嘅音長相比其他調類，會比較長，所以個發音比較清晰，唔會撈亂。喺歷史上，唐代就開始有陰平同陽平嘅區別。呢個調類嘅分化、同合併嘅唔同，係方言分類時要考慮嘅重要要素。至於入聲，晉語同一部分嘅中原官話，音節尾嘅促音無消滅到，個入聲仲喺度，而有啲官話靠調值唔同維持入聲嘅區別。另外，喺東干語甘肅方言，喺單音節時調值無唔同，當多個音節組合時，產生嘅聲調變化嘅唔同，令到個調類得以保持。

主要方言聲調對照表

方言區	地名	平聲			上聲			去聲			入聲			聲調數
		清	濁		清	濁		清	濁		清	濁
			次濁	全濁		次濁	全濁		次濁	全濁		次濁	全濁
官	北京	陰平55	陽平35		上聲214		去聲51				陰平, 陽平, 上聲, 去聲	去聲	陽平	4
	濟南	陰平213	陽平42		上聲55		去聲21				陰平	去聲	陽平	4
	西安	陰平31	陽平24		上聲42		去聲55				陰平		陽平	4
	蘭州	陰平31	陽平53		上聲442		去聲13						陽平	4
	比什凱克	平聲24			上聲51		去聲44				平聲			3
	成都	陰平44	陽平41		上聲52		去聲13				陽平			4
	南京	陰平31	陽平13		上聲22		去聲44				入聲5			5
	太原	平聲11			上聲53		去聲45				陰入2		陽入54	5
吳	上海	陰平52	陽舒113		陰上去335	陽舒113		陰上去335	陽舒113		陰入5	陽入23		5
	蘇州	陰平44	陽平24		陰上52	陽上31		陰去412	陽去31		陰入4	陽入2		7
	紹興	陰平53	陽平31		陰上335	陽上113		陰去33	陽去11		陰入45	陽入12		8
徽	歙縣	陰平31	陽平44		上聲35			陰去324	陽去22（33）		入聲21			6
	壽昌	陰平12	陽平52		陰上24	陽上534		去聲33			陰入甲55，陰入乙3	陽入31		8
湘	長沙	陰平33	陽平13		上聲41		陽去	陰去55	陽去21		入聲24			6
贛	南昌	陰平42	陰去	陽平24	上聲213		陽去	陰去55	陽去21		陰入5	陽入21		7
客家	梅州	陰平44	陽平11		上聲31		去聲52				陰入21	陽入4		6
閩	福州	陰平44	陽平52		上聲31		陽去	陰去213	陽去242		陰入23	陽入4		7
	廈門	陰平55	陽平24		上聲51		陽去	陰去11	陽去33		陰入32	陽入5		7
	潮州	陰平33	陽平55		陰上53	陽上35		陰去11	陽去31		陰入2	陽入5		8
粵	廣州	陰平55	陽平21		陰上35	陽上13		陰去33	陽去22		上陰入55, 下陰入33	陽入22		9
	南寧	陰平41	陽平52		陰上33	陽上24		陰去55	陽去22		上陰入55, 下陰入33	上陽入24	下陽入22	10

• 比什凱克用東干語嘅甘肅系標準音表示。

中文之外

四聲除咗可以應用喺漢語族語言嘅聲調分類外，其他亞洲複雜聲調語言嘅聲調，都可以同中文四聲對應，亦用得四聲嘅劃分。

越南文

越南文嘅聲調總共有六個，分別叫做平聲（a，44）、玄聲（à，31）、問聲（ả，313）、跌聲（ã，3ʔ5）、銳聲（á，35）、重聲（ạ，21ʔ）。其中，平、玄二聲相當於陰、陽平，問、跌二聲相當於陰、陽上，銳、重二聲相當於陰、陽去。越南文嘅入聲同去聲同調，都係銳、重聲，同去聲嘅區別在於，入聲字有-p、-t、-c、-ch呢四個入聲尾，同樣亦係分陰陽入聲，個陰陽分法同去聲一樣。所以按四聲來睇，越南文係四聲八調。

喺標準漢越音體系中，聲調按照原先漢字嘅清濁聲母，劃分成陰陽調，唯一嘅例外係平聲，平聲嘅次濁聲母字會派去陰聲調，亦即讀成平聲。上聲字度，有啲濁上繼續保持喺陽上（跌聲），但亦有濁上字變成咗去聲，陰陽去都有（銳、重聲），以陽去爲主。

古韓文

古韓文有聲調，而現代標準韓文冇咗聲調，只喺部分韓文方言繼續保存聲調。古韓文聲調分三種：低調、低高調、高調。《訓民正音》按照四聲劃分聲調，有平、上、去、入，寫字時喺隔籬落點來表示。唔標點，即係讀平聲（例如：나）；標一個點，即係讀去聲（例如：미〮）；標一個點，同時音節上有入聲尾，即係讀入聲（例如：랏〮）；標兩個點，即係讀上聲（例如：말〯）。平聲嘅讀音係低調，入聲嘅讀音係高調，上聲同去聲冇明確對應，可以係高調，亦可以係低高調。

壯侗語

壯侗語中，呢度介紹下壯話同泰文。

標準壯話（武鳴音）中，聲調總共有9個，佢嘅聲調格局同粵語一模一樣，都係平上去入，都係區分陰陽，然後陰入聲度區分咗上下（長短）。所以總共有：陰平（a；24）、陽平（az；31）、陰上（aj；55）、陽上（ax；42）、陰去（aq；35）、陽去（ah；33）、上/短陰入（aek；5）、下/長陰入（ak；35）、陽入（ag；3）。

泰文聲調總共有5個聲調，佢嘅聲調格局如下：平、去、入分陰陽，上聲唔分陰陽，然後陽入區分咗上下（長短），去入同調，而下陽入同上聲同調。所以聲調如下：陰平（ก๋า；114）、陽平（กา；33）、上聲（ก้า；41）、陰去（กะ；21）、陽去（ก๊ะ；45）、陰入（กาก；21）、上陽入（คิด；45）、下陽入（คาก；41）。

睇埋

• 聲調
• 詩韻
• 平仄
• 押韻