形狀

唔同嘅二維形狀：左上嘅係平行四邊形，左下嘅係直角三角形，而右手邊嘅係圓形。

形（粵拼：jing4），又叫形狀（粵拼：jing4 zong6），係喺幾何上由三條或者更多嘅邊結合而產生嘅封閉空間。形狀如果只由直線組成，就係多邊形；如果由圓錐曲線組成，就會係圓形或者橢圓。形狀係幾何學上好基礎嘅概念。

二維形狀

四個形狀，得頭兩個一模一樣，第三個輪廓一樣但縮細咗。

常見嘅基本二維形狀包括三角形、四方形同長方形等等。

三角形由三條邊組成，三隻內角加埋等如 180°。如果三條邊長分別係 a、b、c，可以用呢條公式計其面積：

$S={\sqrt {p(p-a)(p-b)(p-c)}}$

三角形嘅一個特別情況係直角三角形，會滿足畢氏定理：

$a^{2}+b^{2}=c^{2}$

呢度 c 係斜邊嘅長度。

正方形有四條邊，四條邊一樣咁長，每隻角都係直角（90°）。

• 面積公式係：$S=a^{2}$
• 周長公式係：$P=4a$。

而長方形有相等嘅對邊同埋四隻直角。

• 面積公式係：$S=ab$，當中 a 同 b 係長度同闊度；
• 周長係：$P=2(a+b)$。

三維形狀

基本嘅立體形狀有體積同表面積，常見例子包括立方體同圓柱體。

正方體有六個正方形嘅表面，每條邊長都係 a 咁多。

• 計表面積條式：$A=6a^{2}$
• 計體積條式：$V=a^{3}$

圓柱體由兩個平行嘅圓形面同一塊曲面組成，如果底面半徑係 r、高係 h：

• 表面積：$A=2\pi r(h+r)$
• 體積：$V=\pi r^{2}h$

立體模型係一種俾電腦用嘅模型，用嚟表示物件喺三維空間入便嘅形狀、大細同結構。喺電腦圖像同工程設計，立體模型幫到人以影像化嘅方式模擬現實世界物體，例如立方體可以代表盒、圓柱體可以代表樽或管。

複雜程度

二〇一三年有人用 3D 模型呈現一笪地嘅地形。好似自然地貌噉嘅自然物體，梗會或多或少帶有不規則。

呢款俾幼兒玩嘅玩具，訓練細路辨別唔同嘅基本形狀。

睇埋：自然形態規律、程序生成同複雜度

形狀有複雜同簡單之分。簡單嘅形狀結構規則、邊界清晰、容易用數學公式定義。例如：

• 圓形：由圓心距離相等嘅點組成；
• 三角形、四方形、長方形；
• 正方體、圓柱體等嘅基本立體。

相對嚟講，複雜又「有機」嘅形狀通常邊界不規則，出現好多微細嘅起伏。呢啲形狀望落往往比較似自然界嘅物體，例如雲、山脈、海岸線，又或者係植物嘅葉、動物身體嘅輪廓等有生命嘅嘢。喺電腦圖像工作上，時會用程序生成或者柏林雜音等嘅方法製造呢啲「自然」嘅形狀。相比之下，好似建築物等嘅人造物體，就較有可能會貼近正方體同圓柱體等簡單嘅基本形狀。

心理研究

睇埋：完形心理學

認知心理學同視覺科學嘅研究，會探討人類點樣感知同理解形狀。

另見

• 幾何
• 空間
• 距離

資源

• 維基同享中有關形狀嘅資源類
• Chang, D. and Park, J., 2022. Describing the geometric difference of architectural forms in three primary shapes of circle, triangle and square. Journal of Asian Architecture and Building Engineering, 21(1), pp.1-21，呢篇建築設計論文講到唔同類嘅建築喺形狀特性上有異，並且討論有邊啲方法可以量化呢種差異。