廣州十三行

喺1780年嘅油畫入面，畫出咗廣州十三行嘅外貿特區— 丹麥、西班牙、美國、 瑞典、英國、荷蘭嘅夷館。

 廣州十三行（粵拼：gwong2 zau1 sap6 saam1 hong2） （行讀巷，下同），亦叫廣東十三行gwong2 dung1 sap6 saam1 hong2或十三洋行（粵音：sap6 saam1 joeng4 hong2）、十三行（Shih-san-hang，英文：European Factories at Canton），係清朝嗰時喺廣州對外貿易特區嘅多間牙行。後嚟呢度就叫十三行街，再逐漸演變成十三行路。

「十三行」

舊時嘅十三行係一個有商業特權嘅觀商團體，佢係由好多間商行同埋洋行組成。行號數最多到28家。到後期道光年間，得返十三家：

1. 伍秉鑑嘅怡和行，商名浩官
2. 盧繼光嘅廣利行，商名茂官
3. 潘紹光嘅同文行，商名啟官
4. 謝有仁嘅東興行，商名鼇官
5. 梁承禧嘅天寶行，商名經官
6. 嚴啟昌嘅興泰行，商名孫青
7. 潘文濤嘅中和行，商名明官
8. 馬佐良嘅順泰行，商名秀官
9. 潘文海嘅仁和行，商名海官
10. 吳天垣嘅同順行，商名爽官
11. 易元昌嘅孚泰行，商名昆官
12. 羅福泰嘅東昌行，商名林官
13. 容有光嘅安昌行，商名達官

史

1805—1806年嘅歐洲洋行

1850年嘅十三行

1856年嘅十三行地圖

喺大清嗰時，朝廷喺度猛咁搞閉關鎖國政策，而成個中國凈係得返廣州一個口岸嚟通商。結果就搞到好多商業用船成日嚟廣州嗰邊搞生意，結果廣州喺對外貿易方面就搞到鬼咁犀利噉。

而清朝就繼承咗明朝嘅傳統。話凈係得廣州先至可以對外通商，重規定咗外國佬唔畀同其他中國商人搞直接買賣。而鬼佬嚟中國搞交易嘅話，唔好意思，先去搵指定行商搞貿易經紀同代理。而呢啲行商就係1686年成立嗰啲對外貿易行，喺而家嘅廣州文化公園到海珠南路嗰帶。

由於十三行成日嚟搞對外貿易，所以又俾人話成係「洋行」，而行商又俾人話成係「洋商」。而噉喺十三行街一帶都有十三商館響度，嗰時俾人話成係「十三夷館」，而呢啲夷館係由十三行啲商人嚟起嘅。而呢啲十三行主要喺幫外商搞商品進口同交關稅、管理外國商人、傳達政令、辦理同外商有關外貿啲事。所以十三行既係私商貿易組織，又係代表官方理外貿同外事嘅機構。

不過到咗1720年，清政府就搞一種保商制度，而外商到咗岸之後必須搵間行商先至得，而保商就有先買貨物啲船嘅份。嗰時中國嘅對外通商口岸方面，凈係得返十三行嗰頭。結果嗰時嘅全國貿易方面（例如茶葉），喺中國入面邊個地區嚟嘅嗰啲人，都一定要嚟廣州嘅十三行先至可以同外商搞茶葉交易，而十三行嘅特權就霸嗮成個中國市場。

鼎盛時期

十三行入面，講得最犀利嘅係從乾隆到嘉慶嗰時，去到幾十間都有。其中廣利行、怡和行、同文行，及義成泰行係最出名。尤其嚟十三行交易嘅有英法丹瑞荷、巴俄葡西同東南亞嘅幾多個國家仔都嚟咗呢度搞交易，結果十三行就收咗好多錢。就係喺1812年，出口貿易數就去到15,000,000両白銀咁多；而進口貨物總數就去到12,700,000両咁多；出口超額就去到2,400,000両咁多。

逐漸衰落

到咗1821年，十三行就開始搞衰落。嗰時英國資產階級為咗扭轉乾坤，諗住搞多啲利潤返嚟，結果就向中國搞鴉片。由於英國資產階級猛咁唔停向中國輸入鴉片，所以搞到清廷一定要查鴉片先至得。嗰時十三行要逼住向商人搞貿易，因為嗰時有資本主義列強嚟猛咁向中國搞搞震，加上又俾清政府嘅官僚機構搗亂檔，而商行係都要畀幾十萬到成百萬両嘅白銀先至得。不過由於海關直接統治十三行，想加入或走佬？必須要畀好多銀両去海關嘅官吏先至有得撈！就到咗1840年，由於行商䦛咗成幾百萬銀両，甚至到破產或抄家都有。嗰年重爆埋第一次鴉片戰爭，英國佬一炮炸開咗清政府閉關自守嘅大門。結果清政府肥佬咗，一定要簽南京條約先至得，最後工作嘅一口通商同十三行嘅一家獨大都冇埋。

到咗1856年嘅第二次鴉片戰爭入面，由於廣州人好鬼嬲啲鬼佬嘅嘢，就燒咗好幾間鬼佬住嘅夷館，結果十三行就俾單火燭燒到冧嗮，最後搞咗成百年對外貿易嘅十三行，就結束咗使命。

而家嘅十三行

而家嘅十三行都係一條服裝嘅批發街，成日都賣女裝同男裝嘅衫褲。附近嘅新中國大廈、故衣街、豆欄上街、和平東路、槳欄路服裝商場搞出嚟嘅物流商業圈就變咗廣州歷史入面，最長時間嘅服裝批發集散地。但係嗰度啲人比較複雜，所以環境都好惡劣。

生意網路

嗰陣時十三行嘅貿易關係，遍佈亞、歐、美幾大洲，大批嘅茶葉、絲綢、藥材等都係由廣州度銷往世界各地，香藥材、染料、毛織品、白銀等就由呢度嘅關口，輸入返大陸。

出口貨

十三行主要承辦嘅輸出品有：

明礬、布帛、綢緞、肉桂、樟腦、棱契根、吧嘛油(damar)、生薑、雄黃、真珠貝、生絲、大黃、茴香實、砂糖、茶、白銅。

入口貨

行商承辦嘅輸入品主要有：

琥珀、阿魏、樟腦、冰片、丁香、黑檀、人參、豆蔻花、沒藥、肉豆蔻、乳香、真珠貝、胡椒、青木香、白檀、蘇方、魚翅、皮、金屬類、毛織物。

帝室財政

除咗一般貿易，粵海關同十三行仲承擔著代北京皇宮採辦嘅任務，要隨時置辦皇室所需嘅域外洋貨。洋行每年都要同宮廷輸送返啲洋貨，時稱「採辦宮物」，包括咗紫檀木、香料、象牙、琺瑯、鼻煙、鐘錶、玻璃器、金銀器、毛織品仲有寵物等等。

同佢有關嘅書

• 梁嘉彬：《廣東十三行考》
• 彭澤益：《清代廣東洋行制度的起源》
• 李國榮：《廣州十三行 帝國商行》，九州出版社，ISBN：7-80195-523-4
• 松本忠雄：《廣東之行商及夷館》
• 武藤長藏：《廣東十三行圖說》
• 根岸吉：《廣東十三洋行》
• 田萃一郎：著有《廣東外國貿易獨佔制度》同埋《十三行》
• Henri Cordier：《廣東之行商》（Les Marchands Henistes de Canton）
• 俗话广州 第42页 - 盛极一时十三行 ISBN 7-80655-150-6/K·18

睇埋

• 東印度公司
• 香料貿易
• 地理大發現
• 廣州史
• 廣州地名