廣州商業區

遠眺中信廣場（喺天河北商業區）

廣州商業區，呢個版係主要講成個廣州市，主要嘅核心商業區、步行街呢啲嘅發展同分佈。自明清以嚟，到城市未有大改造兼大洗牌前，第十甫、太平南路、雙門底三個地頭，就一路係廣州本地市民嘅商業中心，因大量嘅傳統舖頭、批發市場同本地市民嘅認同等，而同現代新興嘅商業區有所分庭抗禮。

概覽

至2002年，廣州度計正係都會級嘅商業功能區，有北京路、天河、西關、東山口幾個。而係屬於區域級嘅商業功能區，就有大東門、江南西等13個，仲有環市東－天河北中央商務區，同埋流花會展商務區。

現代嘅廣州城中心商圈系統，主要係天河、越秀兩個建制區做主嘅雙核心結構。天河係20世紀90年代由政府規劃帶起嘅，一路發展到現代成咗商業（高尚商務）集中地，主要包括咗天河北、珠江新城等地。而越秀（含東山）就係廣州傳統城市中心，主要嘅商業集中地，包括由北京路去到上下九（接西關）、環市東路（高尚商務）。成個嘅商業結構主體，呈現咗雙中心空間結構。

整體嘅通商背景

歷史上廣州係一個以外貿而興起嘅港口城市，由秦漢時期（約前226-公元220年）開始，中國大陸嘅絲織品、瓷器、鐵器、銅錢、紙張、金銀等，就由廣州起航送到去海外，而外埠嘅珠寶、香藥、象牙、犀角等商品又由呢度輸入大陸，令廣州慢慢咁成咗世界最出名嘅貿易大港。而喺歷代朝廷嘅對外（尤南洋各國）貿易度，廣州都佔咗好重要嘅位，因為同中國大陸腹地嘅聯絡相對其他貿易港，係更密切、便利嘅。到咗明清時期，由於官府將廣州當成咗主要口岸，仲要搞埋一口通商，強化咗廣州嘅出入口商品集散中心地位。喺16世紀中期打後，朝廷同官府系統嘅運作，更係依賴包括廣州外貿所賺嚟嘅大量美洲白銀，先至運作得正常。就1700到1830年間輸入中國大陸嘅美洲白銀，單喺廣州港口，憑藉歐洲各國到廣州啲生意，大概有賺嚟9000萬鎊到1億鎊之間（折合大概4億銀元），成筆數就佔咗呢130年各外貿港輸入大陸銀元嘅五分四。

到咗1842年南京條約後五口通商，廣州嘅外貿中心地位，隨著上海開埠而轉移。而到咗香港變成自由港後，代替埋廣州成為咗貨物嘅集散地。到咗中華民國時期，廣州對外嘅貿易受第一次世界大戰（1912～1936），中日戰爭等影響，而有好大起落，戰事需要嘅原料、食品嘅交易會相應咁擴大，而其他啲貿易品交易就會大幅咁縮減。喺1946年到解放軍打到去廣州前，由於南京政府同美國聯邦政府簽訂咗《中美友好通商航海條約》，廣州嘅貿易地位，係一路跟著上海後尾做阿二。呢陣入口嘅西貨以製成品、消費品做主；出口貨，就主要係農副產品、礦產原料同埋半製品。出口貨值係逐年遞增且幅度好大，貨值仲一路佔咗中華民國嘅前三位。到咗1949年時，廣州外貿出超達到美金1400萬有多，而入口貿易就完全停滯咗。

中共建政後嘅1957～1979年間，當局喺當地搞咗新嘅國有外貿企業，用中央計劃管理控制啲貿易。到咗社會主義經濟建設時候，當局需要用到大筆嘅外匯，就由專業外貿公司壟斷嗮啲出入口貿易，將貿易嘅所得外匯冚唪唥上繳俾中央。而廣州啲外貿仲跟埋搞計劃經濟管理，照著啲「計劃」出口同收購。到1979年後，中共中央同國務院決定俾廣東、福建兩省「特殊政策」同「靈活措施」，而1984年再批咗俾包括咗廣州市嘅14個沿海城市有「特殊政策」，將廣州市列做「開放、改革的綜合試驗區」。到1985年，中央批俾廣州市恢復「國民經濟計劃單列戶頭」，令到廣州市政府享有省一級嘅經濟管理權限。喺呢個由計劃經濟過渡到市場經濟嘅過程度，廣州嘅貿易市場格局，重新有返啲歷史上嘅多姿多彩。

商區變遷

隋唐

呢陣時嘅廣州港係世界著名嘅商港，商業喺城市同世界範圍都有顯赫嘅地位，城鄉商業都係咁發達，令到廣州城入邊，形成咗三大商業區。中心喺老城區，範圍由西向東，大概係依家嘅華寧里去到小北路，由北向南，就大概係依家越華路去到中山路稍南（近省財政廳）。

宋元

喺宋代廣州嘅經濟外貿繼續有發展，令到住落嘅人加多起身。據統計喺宋朝300年時間入邊，廣州城擴建同修繕就有10幾次。北宋慶曆四年（1045）係規模最大嘅一次，加起咗中城、東城同西城，其中個西城係為咗保護新發展商業區而擴建，規模係最大嘅，城池嘅周長係十三里有多。

宋代廣州嘅商業區，基本係沿水路而發展嘅。城內就係以南濠、玉帶濠沿線最繁華（依家嘅惠福路、高第街、濠畔街一帶）。而後尾嘅西城，就喺廣州城嘅西南方（南海縣境），臨近啲深水道，外商嘅蕃舶同蕃坊就集中呢度。嗰陣嘅西城好鬼繁榮，之中以五丈幾高嘅「共榮樓」做最輝煌嘅代表。熙寧四年（1071年）主持起西城嘅經略使程師孟，仲作埋詩〈共榮樓〉讚佢話：「千門日照珍珠市，萬瓦煙生碧玉城，山海是為中國藏，梯航尤見外夷情。」

南宋後廣州城南喺沿江北岸，又跟著興起咗新嘅商業中心。官府為咗再保護，喺南宋嘉定三年（1210）由廣南東路經略使陳峴，主持喺城南外加起咗東西「雁翅城」（南城）一路去到海皮度，其中東翅係長九十丈，西翅係長五十丈。

明

明代嘅官府頒令，禁止啲外商同商船去廣州城做生意，喺城南嘅貿易活動，包括原先超旺盛嘅走私活動，好快就轉入低谷同消失。而西關呢陣時喺蜆子步度，設立咗市舶亭同懷遠驛，愛來接待外商。到咗嘉靖五年（1526年），西關南部開鑿咗河道，沿新河一帶好快就開咗唔少舖頭，新城濠畔街啲商戶亦紛紛搬去嗰頭發展，帶動咗西關商業嘅崛起同繁盛。

晚清

分區

• 城南商業區，廣州河南嘅新興商圈，喺白鵝潭東岸洲頭咀到龍溪鄉之間（依家嘅南華西路）嘅範圍。

• 城西商業區，以外商聚居嘅蕃坊（依家嘅光塔路附近）做中心，唔少外商經營嘅商鋪。商業區主要分散喺蕃坊、十三夷館（十三行路以南到沿江西路部分）、沙面。

清末到中華民國

喺1909~1929年，廣州嘅工商業逐步發展，東山由於地理嘅優勢，成為咗工商界、歸僑同僑眷爭著買地起屋嘅地頭，東山、東較場舊營壘（義山）等地成為咗新興嘅居住同商業區。

1918年廣州市政公所建立後主導拆城牆、拓闊馬路，大規模推動城市嘅新建設。1920到1930年代開馬路嘅同時，又起咗一大揸騎樓，好似較為西化嘅西堤大新公司、城內大新公司幾個，都係用騎樓嘅建築形式去起嘅。騎樓街因此成為咗新興嘅商業區，喺嗰陣好受市民歡迎，係便利咗日常生活同買嘢。而廣州新開嘅主要集中嘅騎樓商業街，有永漢路、一德路、惠愛路、文德路、吉祥路、財政北路、大南路等20幾個路段。而尤其永漢路、惠愛路、一德路、上下九路等主要位置，據統計商戶數目就佔咗呢啲區域嘅三成人口。

中共建政後

衝擊同重整

喺文革時期，受埋極左思潮嘅影響，廣州嘅商業遭到咗中共建政以來嘅第二次、亦係最嚴重嘅衝擊。其中1969年4月各市屬專業公司俾當局撤銷咗，而實行咗政企合一，商業嘅正常運作受咗好大阻滯。而服務華僑嘅專供僑匯商品嘅華僑商品供應公司，亦喺1966年俾當局撤銷咗。到咗1970年，當局提出「鬧市不鬧」嘅口號，喺備戰疏散陣大批裁撤咗商業網點，或者搬嗮到城市嘅邊緣區，例如國營嘅日用品商戶就俾減少咗115個，下降18％。50幾個商戶係俾搬到去郊區同市屬從化、花縣，另外仲關閉埋文昌、長壽兩個小商品市場。個人商販同集體商店一樣俾大批裁減，有大批嘅商業從業者俾下放到五七幹校或俾送到農村接受再教育。

商業網點俾大量裁併後，營業嘅管理跟埋國營工業模式而越來越機械化，似每日定時收檔，冇法好好服務啲市民嘅消費需要。四人幫俾當局處理咗之後，成個嘅營業管理先至開始改善，服務返啲市民顧客。而廣州未完全經濟開放前，好似早市嘅供應，就有好嚴重嘅問題，一個原因就係仲賣咁早餐嘅商戶，經已非常之少。據統計喺1970年後嘅廣州市入邊，就有60幾間飲食檔同80幾間糕點檔俾當局撤銷，廣大路口同清平路口一帶，原先食檔係超多嘅，但俾集中裁撤咗，所以根本供應唔到市民需要。同時期嘅海珠區嘅黨委副書記，就大力主導改變同重振全區食檔尤其啲夜市服務，令到區內嘅食檔延長咗服務時間、增加咗貨品花色兼提高埋品質。後期啲工礦點、居民區、交通幹線、車站、碼頭等地，都恢復設立返商業點，供應社會各種食品。據統計去到1979年初，廣州市飲食行業嘅早餐供應點由480幾個，增加到550幾個。

商業復甦

1980年代到90年代初，對外界廣州市民係有流行呢個講：「唔到南方大廈，就唔算到咗廣州。」而附近嘅人民南路、十三行商圈就係嗰陣啲外地客逛省城嘅中心商業區域。後期上下九、北京路相繼建立咗步行街，重新擴大咗本地同外地來客嘅商業消費選擇。而同一時間廣州城市開發嘅需求，隨著經濟重振而逐步升溫，政府嘅著眼點就係要東移開發空間，沿著環市東路跨過天河立交嘅地皮，就俾睇中咗做新開發嘅中心。1998年天河城廣場正式開業以來，天河路商圈跟著一路發展成型，千禧年後成為咗廣州嘅第一商圈。

規劃發展

喺陳濟棠主政廣東嗰陣，大搞廣州嘅市政建設，規劃埋中心商業區，將惠愛路、上下九路同西濠口商業區，規劃做廣州嘅中心商業區，建成咗中山戲院、新華戲院、新華酒店、新亞酒店等。據話當其時嘅格局，係廣州嘅大街小巷都佈滿咗商鋪，平均係50人就有一間。

中共建政後1956年搞咗社會主義改造，到1958年開始大幅裁撤啲商業網點，啲專業街慢慢冇嗮商業特色。而直到1979年改革開放前，當局嘅重點方向係搞大嘅工業區，對商業區嘅發展，就得1960年代喺員村工業區嘅「員村一條街」配套工程，主要就係服務啲工友嘅。到1979年後，各色商業區重新發展咗，啲層次擴大兼且多元化，主要嘅商業區分別喺市區中心同交通集散中心出現，而地區嘅中心仲有社區入邊，都有好多嘅商業中心（群）形成咗。

喺千禧後當局主推啲社會生產結構嘅大改變，因應生產總值同實際利用外資嘅（稅費收入）需要，目標轉去打造多個大型嘅產業中心，係以高新科技、金融服務業、商務投資等做主打。就咁就喺白雲、天河、番禺等地區，當局重點返去如白雲新城、珠江新城、南沙新區等主推嘅產業新中心區度，打造啲產業同附帶嘅商圈（商務配套），夾埋對粵港澳啲知識技術、人力、資金等嘅再配置同利用，去實現返北京中央揸莊嘅產業轉型升級工程啲目標。

清拆破壞

1980年代開始政府主導嘅城市建設，當中破壞咗唔少啲商業騎樓，對城市歷史文化造成咗難以挽回嘅傷痛。似1993年12月尾開搞嘅廣州地鐵一號線，廣州模仿咗香港，引入咗發展商沿線發展地鐵物業，騎樓就成為咗地產開發嘅阻礙而被大批清拆。廣州中山路沿線一帶嘅騎樓，中山四路—中山五路嘅騎樓街就咁俾拆曬。

現代嘅商業分區

• 兩大商業街（步行街）：
  • 北京路商業街
    包括咗北京路步行街、教育路、惠福路仲有中山五路
  • 上下九步行街

• 時尚同流行文化商業旺區：
  • 中山二路兼東川路商業區
    包括咗中華廣場、流行前线、地王廣場同東川運動名店城等
  • 體育西商業旺區
    包括咗天河城、廣百百貨中怡店、宏城廣場、正佳廣場、廣州購書中心、維多利廣場同天河南一路、天河東路特色小街
  • 環市東路高檔購物區
    包括咗花園酒店同建設六馬路一带，麗柏廣場，友誼商店
  • 天河北商業區
    包括咗中信廣場、市長大廈同時代廣場一帶
  • 江南西路
    包括咗江南西路，連同寶崗大道交界江南西

• 其他主要嘅商圈：
  • 崗頂商圈
    包括著天河崗頂一带，石牌東路、天河路交界一带，華南最主要嘅數碼電子產品同配件嘅交易市場
  • 站西路同流花廣州火車站一带，服裝批發商業區
  • 海珠廣場—一德路海味兼玩具批發商業區
  • 布匹交易商業區
    河南新港西路同東曉南路一帶

睇埋

• 廣州騎樓
• 廣州市歷年拆毀文物一覽
• 廣州十三行
• 廣州史