廣東史

廣東嘅歷史可以回溯返遠古嘅時候。喺古代呢度係揚州百越（粵）嘅地頭，所以就有粵嘅簡稱，而喺15萬年同13萬年前有封開人同馬壩人喺粵地生息。秦征服咗九州後，喺番禺（今廣州）創立咗南海郡嘅殖民建置。到秦末趙佗自己以番禺（廣州）做據點，獨立建國南越國。到咗西元前112年，漢武帝再派軍南下征服咗南越國，再次將廣東納入中原政權嘅殖民管治，建置屬交州。

到咗東漢末期，廣東自己啲農業、手工業仲有商業都有返咁上下發展。而唐代嘅韶關人張九齡開通咗大庾嶺路，令到廣東同中原嘅各方面都有更多嘅交流。宋後嶺北度有大班移民南下，加速咗珠三角同韓江地區嘅發展。到咗明代之後，廣東嘅商業經濟同對外貿易相對發達埋，社會慢慢有咗高速發展，仲有咗更強嘅自主意識。尤其喺清末後，對成個大中華圈有咗好重大嘅角色同影響，而有著更為複雜嘅關係。

遠古到先秦

據留落最早啲記載睇，當時嘅廣東嘅土著文明，係同太平洋島國、東南亞、臺灣嘅原住民文明相類似。喺中原文化南下前，廣東地方係經有相當高嘅文明程度，包括有埋自己一套嘅禮儀制度。不過呢啲嘅歷史文化同生活習慣，喺中原文明殖民管治同文化南下後，由於中文強勢嘅書寫同記載，而掩蓋咗本土原先嘅文明痕跡。南越王之前嘅文明面貌，得返啲圖像同儀式去估估下。

由前218年開始，秦國侵攻嶺南百粵。喺公元前214年，秦又開通咗秦鑿渠（唐之後叫靈渠），打通楚地（而家嘅湖南）同粵西（而家嘅廣西）之間嘅水路，噉樣就較易入粵東（而家嘅廣東）。之後秦國就打落成個嶺南，而跟著設埋郡縣實施殖民管治。

南越國獨立到再被征服

留落嚟南越王嘅金印

喺秦嘅管治將俾推翻嘅時候，南海郡尉趙佗乘機起兵、食咗桂林郡同象郡而喺公元前大概204年建立咗南越國。喺前196年嘅時候，趙佗仲試過效忠咗西漢皇帝劉邦，令南越國成咗西漢嘅一個「外臣」。到大概係前183年，南越國同西漢嘅關係轉差咗，趙佗再次自己獨立做皇帝，跟著得到埋閩越、夜郎、同師等國嘅臣服效忠，南越國嘅勢力達到咗頂峰。後尾啲關係變化過幾次，歷經五代君主，卒之到咗前112年西漢漢武帝派咗10萬大軍征伐南越國，將佢成個食返落嚟。

三國到南北朝

三國時期喺公元210年，東吳孫權任命咗步騭做交州刺史。步騭到交州後，喺217年將州治由梧州搬咗去番禺。呢陣嘅吳國實際對成個兩廣，地方嘅控制係相對弱嘅。

喺粵西度嘅士燮家族後尾反對王朝嘅管治，咁嗰時嘅交州刺史呂岱，就向朝廷建議拆分交州嘅東部做廣州以對付呢個家族。於是乎喺公元225年開始有咗廣州呢個建置。等到咗士燮嘅家族被朝廷鎮壓咗，又恢復返原交州嘅建制。再到公元263年，吳國先至正式分出咗廣州，由此開始有咗固定嘅廣州建置。

280年晉朝征服咗廣東在內嘅中國大陸地方。到晉朝對廣東嘅管治，係有返咗強烈殖民性質嘅軍事佔領，由北方嚟嘅官員帶軍駐守返主要城市，而土著同中原移民嘅大家族就管治著廣闊嘅地方社會。之後廣東呢度係俾南朝嘅各代君主國管治過。542年龍興（而家嘅越南太平省）人李賁作反，到544年係自己搞咗個「萬春」國，越南度係叫做前李朝。而第二年梁朝大將陳霸先鎮壓返萬春嘅勢力，陳霸先跟著係班師回朝篡位，建立咗陳朝。

大唐到南漢國獨立

五代十國（917年）入邊嘅南漢。

大唐喺公元621年（武德四年）征服咗嶺南嘅地域，跟著就喺呢個南部邊疆設立返殖民政權，分劃咗管治區域。大唐嘅節度使到廣東一帶設立咗都督府、都護府等軍政建制單位控制呢度，史稱係「嶺南五府」（或「嶺南五管」），另外海南島度亦有個崖州都督府嘅殖民單位去管治當地。

而呢陣南粵度嘅市場交易仲係以物品交換為主，唔係幾興用銅銀。多數嘅地方仲係森林密布，人煙罕至，江河度都係鱷魚，樹叢度就好多大笨象。潮州、惠州度啲原住民就會狩獵啲大笨象，爭著食肥美嘅象拔。鑑真和尚流落到海南三亞嘅時候，仲得知當地有人食人嘅情況。

到唐末，清海、靖海兩軍節度使劉岩喺公元917年獨立建國，定都喺廣州而改國號做大越，第二年改成漢，史稱「南漢」。南漢政權經歷咗四代君主共五十五年。

大宋到蒙元帝國

蒙元時期，由湖廣行省、江西行省所管治嘅廣東示意圖

大宋征服咗南漢之後，繼續利用返廣東沿海嘅港口發展外貿。呢陣嘅東南亞、南亞仲有西亞所產嘅香料非常之出名，佛教經廣東傳入咗大陸後，宋嘅士大夫階層就開始流行咗薰香。而經廣東度輸入大宋嘅主要係乳香，當其時係佔咗大宋整體輸入量嘅9成8咁多。單係神宗熙寧十年（1077），廣州一地嘅乳香買入量就有348,073斤。除咗供上層社會嘅奢侈消費外，仲有相當嘅部分係當藥用。而後期嶺北大量嘅移民南下，珠三角同西江沿線嘅低地就俾啲移民圍墾開咗，成為咗大宋嘅「糧倉」，所產嘅「廣米」就運上去閩南、江浙一帶。

成吉思汗依賴著強弓同迅猛嘅騎兵，一下子擊潰咗宋嘅軍隊，一舉佔領咗大江南北、廣東，甚至打到埋越南度。蒙古帝國統治嘅時候，嗰時嘅廣州同泉州都係世界聞名嘅造船重鎮。呢陣時廣東省城同四鄉間，創立咗定期往返嘅「長河渡」，開始咗水網交通嘅成型。同時間各埠頭，仲有咗過對面岸嘅「橫水渡」，呢個稱呼就開始一路用落咗。

大明

到明嘅時候，珠江三角洲嘅築堤圍墾發展得好快，同時又有唔少閩南人移民到潮汕平原搞開墾。

明弘治元年（1488年），廣東獅嶺巡檢司所在嘅橫潭村村民譚觀福、張洪祐，喺啲飽受當地豪強騎壓嘅瑤民推舉下，帶頭發動咗對官府嘅反抗，聲勢震動到增城、新豐、博羅等地。起事嘅大軍一度係直逼廣州城，收尾由廣東布政司劉大夏帶兵鎮壓，劉跟著仲提請朝廷設立返從化縣，強化官府對上番禺地區嘅統治。

過咗明中期後，華南兩廣地方都好鬼動盪，就廣東度係爆發過黃蕭養起義同瑤民、黎民起義，廣西都有爆發瑤人、僮人嘅起義。明政府為此係好多次調兵到呢啲地方殘酷咁鎮壓。另一方面廣東沿海嘅海盜活動亦多咗唔少。華南好多地方因為受到咗動盪嘅重創，啲農業活動就停滯咗落嚟。

進入到16世紀，隨著大航海時代嘅到來，歐洲商人陸續經新航路到粵經商。喺明嘉靖三十二年（1553年），葡萄牙人開始向明政府租借澳門作為長期嘅居留地。

大起城池

明代前嘅廣東，大多地方係冇起城池嘅，據計築城率得38.6％。而明廷建立嘅殖民政府為咗控管廣東，需要地方官府同軍隊衛所嘅治所去起城池。廣東就咁開始大搞城池工程，主要係由派駐嘅衛所軍士負責，唔少嘅府州縣城同衛所都喺同一座城入邊，衛所就喺營建城池度有主導地位。明代中期以後地方度對城池修築等工程，喺經費、工料同勞力方面嘅負擔比例慢慢加大咗，比例分攤轉變成「軍三民七」、「官三民七」嘅推進模式。隨著「凡縣無城者悉令築之」政策嘅出臺，築城率喺明中期後提升到100％。

潮汕風土

台州人王士性喺明萬曆二十五年（1597年）寫嘅《廣志繹》，描述咗原被中央政府當成係偏荒地方嘅潮州，喺呢陣時係唔同往日，當地係有唔少嘅富人，風氣奢侈，個個會身著豪衣騎馬落街。啲潮州嘅富豪都會有埋自己嘅戲班或樂隊，絲毫唔差過北方嘅豪族。但係明朝廷仲係當呢度做遷謫中央官員嘅地方，好似係高攀龍就試過俾貶官去揭陽。

滿清王朝

滿清入關喺1644年攻陷咗北京，而大宋嘅遺臣就喺廣東度建立咗新嘅南明政權，同清軍對抗。到1650年秋末，清軍突破咗明朝喺廣東同廣西嘅防禦。喺11月24號尚可喜攻落咗堅守成八個半月嘅廣州城，隨即喺城入邊施行咗大屠殺。而孔有德利用咗明部隊將領間嘅一次普遍分裂仲有全州嘅一次兵變，喺11月27號佔領咗桂林。喺12月2號清軍準備打入肇慶嘅時候，永曆皇帝一行倉皇逃去梧州嘅路途度仲被打劫過。

張保仔嘅巔峰年代

喺1809年至1810年期間，廣東人遭受到連場嘅自然災害，一系列嚴重嘅饑荒係持續到1810年夏季。單喺1809年嘅時候，就至少有4場颱風衝擊咗沿海各縣。接連不斷嘅災難造成咗嚴重嘅食物短缺，水稻同其他必需品係遭遇咗空前嘅損失，仲死咗唔少人。珠三角地區嘅受災嚴重，導致啲水稻價格升咗兩到三倍。 而饑荒過後，喺新會、欽州同合浦，爆發咗致命嘅瘟疫，各地士紳都打開糧倉仲有搞粥廠施賑，以救濟啲饑民。

而廣州嘅官府同英國商人間爆發咗矛盾，大清嘅對外貿易就跟著又停又開，造成咗一段時間嘅經濟蕭條同唔穩定。 喺1809年廣州度流通嘅外國銀元突然間暴跌咗，令到局勢係雪上加霜。呢一年亦係1805年至1813年間大清輸入銀元數嘅最低點，主要係美國出口大清國嘅白銀有大幅下跌，由每年300萬一下子跌至7萬。銀元嘅短缺對廣東經濟造成嘅負面衝擊一直持續到1810年。

呢陣時分別以張保仔同郭婆帶為首嘅海盜，已經被切斷咗食物同其他必需品嘅供給，喺廣東沿海嘅大規模侵擾亦達到咗頂峰。喺1809年夏季，海盜開始出沒沿岸嘅內陸水路，慢慢深入埋珠三角度以尋找食物。新履職嘅兩廣總督百齡，就以武力同誘降結合嘅手段，一步步瓦解咗張保仔等海盜勢力。到1810年嘅時候，百齡用呢個「剿撫」對策最終結束咗廣東呢場大規模嘅海盜浪潮。

睇埋

• 粵語史
• 廣州史
• 香港史
• 廣西史

參考

• 葉漢明：〈明代中后期岭南的地方社会与家族文化〉。
• 活力广东网--历史溯源
• 广东发展史
• 第一次粵北戰役與總結