德國88毫米火炮系列

出自維基百科,自由嘅百科全書
Jump to navigation Jump to search
柏林戰役期間嘅88毫米高射炮

88毫米火炮系列德文FlaK 88)係二戰期間德國最廣為人知嘅火炮系列之一。

FlaK係德文「Flugabwehr-Kanone」嘅縮寫,意思係「對空火炮」,爾個亦都係88毫米火炮嘅設計初衷。不過後來由於喺反坦克作戰當中表現出色,88毫米火炮衍生出徂其他改型,其中出名嘅包括43式反坦克炮(德文PaK 43,「PaK」係德文「Panzerabwehr-Kanone」嘅縮寫,意思係「反坦克炮」)同虎式坦克嘅主炮(德文KwK 43,「PaK」係德文「Kampfwagen-Kanone」嘅縮寫,意思係「戰車用炮」)。

背景[編輯]

一戰之後,隨著科學技術,尤其係飛機發動機技術嘅發展,軍用飛機嘅飛行速度同高度都大大提升。一戰期間係恁意改進下就可以用來打低飛機嘅火炮,霎時間全部變澌昨日黃花。有鑑於此,德國軍方決定研製一種新嘅防空炮。軍方要求爾種新防空炮嘅初速同射速都要大大提升,以確保炮彈有好大機會打中敵機。但係當時《凡爾賽條約》基本上禁止德國研製武器。為徂鑽《凡爾賽條約》嘅空子,德國指定徂克虜伯公司瑞典寶福斯公司聯合研製爾種新火炮。

最初嘅設計口徑係77毫米,後來應德軍嘅要求改成88毫米,以適應射程同射速方面嘅更高要求。

實戰紀錄[編輯]

英國倫敦帝國戰爭博物館展出嘅88毫米火炮

歐洲戰場[編輯]

西班牙內戰期間,德國秘密派去支援佛朗哥禿鷹軍團第一次喺實戰當中使用徂88毫米火炮。而德軍自己第一次使用就係德國入侵法國嘅「黃色作戰」行動。當時88毫米火炮都重係以高射炮為主。

88毫米火炮第一次令人見識到佢嘅多用途係喺敦刻爾克戰役期間。1940年5月,隆美爾指揮嘅德軍第七坦克師由比利時殺緊過去法國敦刻爾克,途中遭遇英軍重型坦克嘅反擊。面對爾班英軍坦克,當時德軍嘅37毫米口徑36式反坦克炮完全無用武之地。千鈞一髮之際,德軍嘅一個高炮連索性事急馬行田,撳低啲高射炮,對準啲英軍坦克發澌狼戾恁開炮,一連打爆徂9部英軍坦克,逼到英軍撤退[1]。後來到入侵蘇聯嘅巴巴羅薩計劃開始之後,88毫米火炮同樣擔當徂反坦克作戰嘅主角。

1941年,隆美爾帶兵殺入北非戰場。當時德軍嘅坦克無論數量同質量都無英軍坦克咁勁,但係恁反而畀徂88毫米火炮又一個大顯身手嘅好機會。1941年6月,喺第四次侯法雅隘口戰鬥當中,英軍坦克啱啱殺入德意聯軍嘅陣地,就被德軍嘅88毫米火炮打到落花流水。最後英軍損失徂成123部坦克[1],而其中英軍皇家第四坦克師C連更加係接近全軍覆沒,連連長部坦克都無埋[2]

1942年,盟軍喺北非展開「火炬作戰」,隆美爾繼續用88毫米火炮對付盟軍裝甲。由於88毫米火炮穿透力強大,因此連當時裝甲最厚嘅丘吉爾坦克瑪媞達坦克嘅正面裝甲都可以一炮打穿,至於美軍主力舍曼坦克更加唔係88毫米火炮嘅對手,1500米射程之內基本上係一炮報廢一部舍曼。如果唔係後來盟軍成功斬斷德軍條補給線嘅話,盟軍付出嘅代價可能會沉重好多。

中國戰場[編輯]

第一次中德合作期間,中華民國陸軍向德國方面訂製徂20支88毫米火炮,配埋全部觀測同通訊器材,喺松滬會戰爆發之前運到徂江陰要塞同武漢要塞,部署16支,留返4支做後備。後來爾16支火炮喺南京保衛戰期間成功壓制日軍戰艦,令日軍戰艦無爆發進入南京水域。可惜後來國軍撤退嘅時候,由於拆唔走啲大炮而被迫將佢等破壞。後來日軍通過研究未被人破壞到嘅88毫米炮,研製出自己嘅九九式八糎高射砲[3]

參考[編輯]

  1. 1.0 1.1 "巴斯托尼的88毫米火炮". (原先內容喺2015年4月19號歸檔). 喺2015年1月6號搵到. 
  2. Liddell Hart, Basil H.. The Tanks: The History of the Royal Tank Regiment and its Predecessors, Heavy Branch, Machine-Gun Corps, Tank Corps, and Royal Tank Corps, 1914-1945, pg. 84
  3. 講武堂·戎馬縱談日本陸軍九九式八糎高射砲[失咗效嘅鏈]