德意志帝國

德意志帝國國土（1914年）

德意志帝國（德文：Deutsches Kaiserreich），正式國號叫德意志國（德文：Deutsches Reich），係1871年到1918年嘅德國君主制政權。佢主要繼承普魯士王國，響打輸第一次世界大戰後被威瑪共和國取代，但係威瑪共和仍然用德意志國嘅國號。德意志帝國係德意志民族國家，政體係聯邦（或成員邦制）君主立憲制。

史

德意志帝國喺1871年1月1號按新訂立嘅憲法成立。1871年1月18號，普魯士國王威廉一世喺凡爾賽鏡廳稱帝，而當時帝國仍然打緊普法戰爭。德意志帝國係第一個德意志族民族國家，建國基礎係小德意志，統治層係嚟自普魯士嘅荷軒蘇蘭族。

德國行帝制期間，經過高度工業化過程，經濟同社會快速由農業社會過渡為工業社會，特別喺19世紀末期。德國社會經歷人口高增長、都市迅速發展、中產階級崛起，而手工業同農業就慢慢衰落。

帝國初期內政同外交都係由首任兼任期最長嘅俾斯麥主理，直至1890年，佢嘅治術初期比較放任，後來佢以文化鬥爭抗擊社會主義思潮，內政踏入較保守主義嘅階段，後來德國通過保護主義嘅關稅同埋社會保險政策，為社會政策轉捩點。俾斯麥以極其複雜嘅同盟制度保障德國利益，包括1879年同奧匈帝國結盟。後來1884年當帝國主義進入高峰之際，德國同其他殖民帝國因為種種殖民利益而陷入激烈衝突，尤其時為世界霸主嘅大英帝國。

1888年威廉二世繼位，喺俾斯麥辭職之後施加個人影響力，主導帝國政治，但同時個別其他官員亦左右其政策，以致有時國策畀人有矛盾同難以預測之感。德國社會運動同傳媒興起，間接促使政府採取帝國主義「世界政策」，以及針對社會民主而實行團結政策，另外實施海軍擴張政策。威廉二世嘅稱霸野心造成德國被孤立，並且增加戰爭危機。當第一次世界大戰終於喺1914年爆發，德國被迫面對多條戰線，而軍方喺內政方面亦都把持政策。隨住德國喺戰爭中遭受大量人命傷亡，以及被協約國封鎖海路，王室逐漸喪失廣泛支持。1918年，戰爭就快打完之際，德國先至實行十月改革，使首相必須獲得國會信任先可以執政，但冇幾耐發生德國革命，共和派喺威瑪成立共和政體，行代議民主制，威廉二世喺1919年11月9號被逼退位，並流亡荷蘭。

雖然之後德國又換過幾次政權，行政區亦都頗多變更，但係德意志帝國作為第一個德國政權，人口構成同今日德國始終相若。