快樂王子與其他故事

20世紀初一本《快樂王子與其他故事》書嘅封面

《快樂王子與其他故事》（英文：The Happy Prince and Other Tales）係由愛爾蘭作家奧斯卡·王爾德喺1888年5月出版嘅英文童話故事集。本書一共包含咗五個故仔，當中最出名嘅係《快樂王子》。

《快樂王子》個故仔大致係噉嘅：話說從前有位王子，佢生前住喺冇任何憂傷同痛苦嘅宮殿裏面，畀人嗌佢做「快樂王子」；佢死後，佢嘅形象畀人整咗做一座雕像；靈魂進入雕像嘅王子，見到宮殿外嘅世界係幾咁充滿窮困同苦難，下定決心要盡力去幫捱緊苦嘅平民；王子有隻小燕子幫手，將佢身上嘅值錢嘢—包括係佩劍上嘅紅寶石、作為佢對眼嘅藍寶石同埋身上嘅金片—送晒畀窮人；打後，小燕子掛住幫王子手，嚟唔切飛去第度過冬而凍死，快樂王子就因為冇晒寶石同金片而畀市長覺得佢有損市容；最後，小燕子同快樂王子一齊畀人掉deu6咗去垃圾堆。但天使嚟到，將快樂王子同小燕子嘅靈魂一齊帶上天堂，畀小燕子永遠喺上帝嘅花園度唱歌。

呢本書嘅中文譯本由巴金翻譯。截至2020年代初，呢本書仲未有粵文譯版。

目錄

呢本故事集包含咗五個故仔：

• The Happy Prince（快樂王子）
• The Nightingale and the Rose（夜鶯與玫瑰）
• The Selfish Giant（自私嘅巨人）
• The Devoted Friend（忠實嘅朋友）
• The Remarkable Rocket（非凡嘅煙花）

故仔大要

以下係啲故仔嘅情節大要。

快樂王子

呢幅插圖描繪快樂王子，小燕子企咗喺佢嘅膊頭上面。

「有個阿媽問佢嗰個喊緊嘅仔：『點解你唔可以好似快樂王子噉？快樂王子發夢都冇諗過會為咗任何嘢喊。』」

—擇自《快樂王子》

有一晚，一隻小燕子飛到一個城市，小燕子原本趕住飛去南方嘅埃及過冬，但係佢飛得慢同其他朋友失散咗。

城市嗰度豎立咗一座雕像。小燕子喺天空飛嘅時候，就睇見嗰座雕像。雕像上舖滿黃金葉片，雙眼係藍寶石，佩劍上有粒大大嘅紅寶石。雕像按照王子嘅形象塑造，王子生前並唔知道乜嘢係眼淚，因為佢住喺禁止憂傷嘅王宮裏面，所以宮廷都叫佢做「快樂王子」。佢死咗之後，朝臣為佢建造雕像，高高在上，令到佢可以睇見城裏面嘅所有事物。

小燕子最初打算瞓喺雕像嘅腳度休息，不過正當佢將頭收喺翼嗰陣，就有一滴、一滴嘅水珠滴喺佢身上。佢抬頭一睇，發現雕像喺度喊緊。

「我係快樂王子。」

「噉點解你喺度喊嘅？你整濕我喇。」

原來快樂王子佢見到自己城市嘅醜惡同悽慘。因此，快樂王子請求小燕子做佢嘅使者。快樂王子喺一個窗口見到一個女裁縫師，正喺絲緞禮服上繡緊西番蓮，佢個仔病咗冇錢醫病，只能夠餵個仔飲河水。快樂王子吩咐小燕子，喺佢嘅佩劍度攞粒紅寶石出嚟，送畀呢兩仔乸。

第二晚，快樂王子睇見一個閣樓度，一個劇作家正在趕住寫劇本，不過因為天氣凍令到佢寫唔到字。快樂王子吩咐小燕子，喺佢嘅眼度攞其中一粒藍寶石，畀劇作家變賣換取食物。第三晚，快樂王子睇見一個賣火柴嘅女仔，唔小心將所有火柴都跌咗落水度，唔能夠再賣，如果佢空手噉返屋企，爸爸會打佢。為咗幫佢，快樂王子吩咐小燕子，喺佢嘅眼度攞埋另一粒藍寶石，送畀嗰個女仔。由於佢將自己嘅雙眼都送咗出去，已經再睇唔到嘢，小燕子就圍住城市飛，將佢所睇見嘅都話晒畀快樂王子知。小燕子將城市內面嘅貧困情況話畀快樂王子知，快樂王子因此下定決心，將身上所有嘅黃金葉片都送畀窮人。

最後，小燕子知道佢無法熬過寒冬，就快要死，所以留喺快樂王子身邊。小燕子鍚咗快樂王子一下，就跌落王子嘅腳邊死咗。快樂王子用鉛造嘅心，亦都破裂。

朝早，市長睇見雕像已經變得灰暗難睇，認為佢已經冇用，所以將佢拆落嚟，掉入火爐度熔咗佢，但係火爐嘅火熔化唔到鉛造嘅心。個心掉deu6咗去垃圾堆度，同小燕子一齊。

上帝吩咐天使，將城裏面最寶貴嘅兩樣嘢搵出嚟。天使向上帝呈上小燕子同王子破裂嘅心。上帝對天使嘅選擇讚好，下令畀小燕子喺佢嘅花園裏面永遠噉歌唱。

夜鶯與玫瑰

有一日，一個年青學生喺樖大橡樹之下行嚟行去，佢痛苦噉自言自語，話佢幾咁需要一朵紅色嘅玫瑰花，因為有一位佢心愛嘅姑娘應承過佢，佢要能夠搵到紅色嘅玫瑰花，先至會同佢一齊跳舞。不過而家係寒冷嘅冬天，佢總係冇辦法搵到一朵紅色嘅玫瑰，因此亦唔能夠滿足姑娘嘅要求同自己嘅願望。

正當佢感到絕望嘅時候，樹上嘅夜鶯ang1聽到佢嘅哀求，以為呢個青年係一個真正嘅戀人，真正識咩係愛情，因此決定幫助呢位青年。夜鶯千辛萬苦去搵玫瑰樹借紅玫瑰，不過第一次同第二次搵到嘅係白玫瑰樹同黃玫瑰樹，第三次先至搵到學生窗外嘅紅玫瑰樹，但係紅玫瑰樹話佢知，冬天已經凍僵咗佢嘅血管，雪霜已經摧殘咗佢嘅花冧lam1，如果夜鶯想要一朵紅玫瑰花，需要成晚都歌唱先能夠造出嚟，並用佢胸中嘅鮮血嚟染紅，亦即係用自己嘅生命嚟換一朵玫瑰。

呢個代價實在係太大喇，不過夜鶯認為愛情比生命更加重要，「愛情真係一件奇妙無比嘅事情，佢比綠寶石更加珍貴，比貓眼石更加稀奇。用珍珠同石榴都換唔到，係市場上買唔到嘅，喺商人嗰度都買唔到嘅，更加唔能夠用黃金嚟比較佢嘅重量。」

因此夜鶯毅然決定犧牲自己，佢唔停噉唱咗一晚歌，並用胸膛頂住花刺，逐啲噉插入心臟，用自己嘅鮮血成就咗一朵象徵真愛嘅玫瑰，而佢就瞓係草叢之中死咗，心口仲插住嗰條刺。第二日清晨青年學生起身之後，發現咗呢朵紅玫瑰，馬上摘佢落嚟走去見姑娘，根本就冇諗過玫瑰花點解會喺呢度出現。

但係令人遺憾嘅係嗰位姑娘拒絕咗佢，話玫瑰花同姑娘嘅衫唔襯，而且宮廷大臣個仔已經送咗珍貴嘅珠寶畀佢，係人都知珠寶比花更加值錢。青年就好激氣，將玫瑰花掉喺路邊，畀啲馬車轆過朵花。佢一邊話愛情係一件幾咁愚蠢嘅事，一邊返到自己嘅屋企，拎起舖滿灰塵嘅書嚟睇。

自私嘅巨人

呢幅插圖描繪巨人抱男仔上樹。

從前有一個巨人，佢有一座好靚好大嘅花園，園裏面生滿咗柔嫩嘅青草同十二樖桃樹。有一班細路，鍾意喺每日下晝放學之後走入去巨人嘅花園度玩。有一日巨人喺外面返嚟，佢發現班細路喺花園度玩，佢大聲噉話：

「呢個係我自己嘅花園！」

班細路都嚇走晒。巨人仲喺花園嘅四圍起咗一條好高嘅圍牆，掛起一塊牌：「唔准入去，會受重罰。」

春天嚟到，到處都開滿晒小花，亦有雀仔唱歌，只有巨人嘅花園仍然係冬天。巨人坐喺窗前呆呆噉望住寒冷雪白嘅花園話：「點解今年嘅春天會嚟得咁遲嘅？」

有一朝早巨人醒咗，聽見動人嘅雀仔歌唱聲，亦聞到陣陣花香。望出去窗外面睇，原來班細路喺牆上嘅一個窿仔爬咗入嚟花園，佢哋歡樂嘅聲音令到寒冬嘅花園變得青蔥茂盛。巨人睇見窗外嘅情景，明白原來自己係有幾咁自私。而喺遠處，巨人見到一個身型好細嘅男仔，正努力想爬上樹度，但係因為身體太細上唔到去，仲喊起上嚟。巨人就上前輕輕噉抱起佢，放佢喺樹枝上面，呢樖樹即刻開花，班雀仔亦飛嚟喺樹枝上面唱歌。巨人醒覺自己嘅過錯，就決定拆咗圍牆佢。喺嗰日開始，班細路放學之後，就嚟搵巨人一齊玩。

過咗好多年之後，巨人年紀老喇。一個冬天嘅朝早，巨人忽然見到之前佢曾經幫過嗰個男仔，企喺一樖樹下面。巨人即刻走到佢身邊。望到男仔嘅手同腳都有釘痕。等佢挨近，巨人好嬲噉問：「邊個噉樣嚟傷害你？我即刻拎我把大刀去殺死佢。」

男仔回答：「唔係！呢幾笪係愛嘅傷痕呀。」

巨人問：「你係邊個？」巨人心口湧現一種講唔出嘅敬畏，令佢即刻跪低。

男仔向巨人微笑，對佢講：「你畀我喺你嘅花園度玩，今日我要帶你去我嘅樂園度，我嘅樂園就係天堂。」

嗰日下晝班細路走入花園嘅時候，見到巨人瞓喺一樖樹下面，佢已經死咗，成身俾白花冚kam2住。原來巨人接待嘅男仔，就係耶穌。

忠實嘅朋友

呢幅插圖描繪磨坊同埋破舊嘅單轆車

喺好耐好耐以前有一對朋友，佢哋一個叫漢斯（Hans）另一個叫休伊（Hugh）。漢斯係個園丁，佢冇乜錢，一個人住喺間細屋仔度，而休伊就係個好有錢嘅磨坊主人。

漢斯佢手藝好好，佢嗰座花園種滿晒好靚嘅花。漢斯佢靠賣花維生，而因為佢同休伊兩個人係好朋友，休伊每次探訪嘅時候，忠實嘅漢斯都會畀休伊攞走一大堆靚花。休伊從來都冇將自己積存嘅家畜送畀漢斯，不過因為休伊好有口才，漢斯聽咗佢講嘅友情高論，聽到好開心，完全當咗休伊係佢最好嘅朋友。

當冬天臨到嘅時候，漢斯啲花死晒，搞到佢嘅生計冇咗，而為咗熬過寒冷，漢斯將佢架單轆車同其他種花用嘅架生都賣咗，先至能夠買到麵包食。同時，休伊為咗唔想打擾身處困境嘅漢斯，亦唔想漢斯產生妒忌，所以成過冬天都冇探過漢斯，淨係喺佢嗰間又大又暖嘅屋裏面休息過冬。最後大地回春，休伊答應會將一架破舊嘅單轆車送畀漢斯，而因為漢斯為咗要報答呢個承諾，應承幫休伊做幾次苦工。

喺一個雷電交加嘅夜晚，休伊吩咐漢斯出去搵醫生嚟睇佢嗰個受咗傷嘅仔。漢斯最後搵到醫生，但係行雷閃電加上橫風橫雨，漢斯睇唔清楚條路，喺返屋企途中差錯腳跌入沼澤浸死咗。休伊參加漢斯嘅喪禮，最後就噉講：

「漢斯嘅死對我造成非常重大嘅損失。我咁好人，畀咗架舊單轆車佢，依家我都唔知點處置架單轆車好，架車用到咁破舊，賣又賣唔出，攞返屋企又唔係。做人做得太慷慨都係會蝕底。我以後都唔會再噉樣送嘢畀人喇。」

非凡嘅煙花

話說有一日，有一個王國要為佢哋嘅王子搞婚禮。王子將要娶一位公主做老婆，而喺婚禮當日，王子企喺城堡門口，喺度等候迎接公主到臨。婚禮將會搞到好盛大，宴會之後仲會舉辦舞會，新郎同新娘將要一齊跳舞。公主從來都未睇過放煙花，國王因此下令叫皇家煙花手親自出席當日婚禮，以方便施放煙花。喺宴會上，皇家火藝師將所有嘅煙花放喺適當嘅地方，噉樣佢哋就可以喺十二點嘅時候放完。

過咗一陣，啲煙花就自己傾起偈上嚟，「幾咁可愛呀，」一枝深思熟慮嘅轉輪煙花激動噉話，呢支轉輪煙花只係搖搖頭，係噉講，「浪漫已經消失咗，浪漫已經消失咗，已經消失咗。」

佢哋當中有一支煙花好自命不凡：

「我同你哋唔一樣。我係一支好非凡嘅煙花。我阿爸阿媽都成就超卓。我阿媽佢畀人攞去公開放嗰陣，喺空中轉咗成 19 次先至熄滅，而我阿爸就飛到好高，高到啲人驚佢永遠都唔會跌返落嚟。」

大家都認真噉聽住，只有可憐嘅轉輪煙花仍然搖住頭，係噉講「浪漫已經消失咗。」

最後國王宣佈：「要開始放煙花啦。」

的確係一場壯觀嘅表演—除咗嗰支非凡嘅煙花。每支煙花都獲得巨大嘅成功，發放出好靚嘅光芒。非凡嘅煙花體內嘅火藥俾淚水整濕咗，佢已經再冇用，所以甚至冇人接近佢。

非凡嘅煙花話：「我諗佢哋想將我留喺某個重要嘅場合」，毫無疑問，呢個就係佢嘅諗法。第二日工人嚟打掃清理，佢大嗌咗一聲，「嘩，咁破舊嘅一支煙花！」講完就將煙花掉到牆外嘅水坑度，喺水度青蛙、蜻蜓同鴨仔都取笑佢。

到咗最後，兩個男仔執到呢支非凡煙花，將佢放喺營火嘅柴度燒。呢支煙花終於點着咗，成功發放，但係冇任何人留意到佢所期待嘅大震撼。

睇埋

• 利他：快樂王子同小燕子廣泛噉被視為無私助人嘅象徵。
• 童話：喺廿一世紀初，《快樂王子》係一個比較出名嘅童話故事，世界好多地方嘅細路都會睇或者聽到呢個故仔。
• 擬人化：《快樂王子與其他故事》嗰五個故仔用咗大量嘅擬人化，將燕子、夜鶯同煙花等嘅事物描繪成有好似人噉嘅行為。

拎

• Literature / The Happy Prince （英文），電視橋kiu2網呢頁講《快樂王子》。
• The Happy Prince and Other Tales （英文），英文版《快樂王子與其他故事》嘅 PDF 快勞
• 【偽動畫故事】快樂王子 | The Happy Prince | 施予幸福的能力 - 粵語，用粵語講《快樂王子》，夾雜咗啲似標準官話嘅用語。