恩華詩站

恩華詩 Anvers 聖心／Sacré-Cœur
月台，攝於2022年
概況
地址	法國法蘭西島巴黎第9區馬基歇多何些薩大道68號 68, boulevard Marguerite-de-Rochechouart 9e arrondissement de Paris L'Île-de-France France
坐標	48°52′59″N 2°20′41″E
線路
結構	地底
月台	2個側式月台
軌道	2條
其他資訊
啟用	1902年10月7號
東主	巴黎公共交通管理局
收費區	1
服務
上一站 巴黎地鐵 下一站 碧加利 往多芬門 巴比士—何詩薩 往民族

恩華詩站jan1 waa4 si1 zaam6（法文：Anvers，法文讀音：[ɑ̃vɛʁs]），副名聖心sing3 sam1（Sacré-Cœur），係巴黎地鐵2號綫嘅一個車站，位於蒙馬特，喺第9區同第18區嘅邊界。

地點

呢個車站位於恩華詩廣場同馬基歇多何些薩大道下面。佢大約沿住東西軸綫，位於碧加利同巴比士—何詩薩站之間。如果以民族站方向為準，佢係呢條綫轉上地面之前最後一個地下車站。

歷史

呢個站喺1902年10月21號開通，作為2號綫由星形站延伸嘅一部分。直到1903年1月31號延伸到班挪利站（Bagnolet；現稱大仲馬站）之前係2號綫嘅東段總站。車站以就近嘅兩個恩華詩廣場（Place d'Anvers 同 Square d'Anvers）命名。（恩華詩即係比利時城市安特衛普嘅法文名；1832年安特衛普城堡圍城戰期間，法國軍隊打贏咗荷蘭軍隊。）

車站位於馬基歇多何些薩大道（boulevard Marguerite-de-Rochechouart）下面，條街其實係城牆（mur des Fermiers généraux；Fermier 呢度係指收稅嘅官）舊址，起嚟本來係用嚟收關税，1784至1791年期間起，但係喺19世紀拆咗，城門後來都成為重要嘅交叉路口，所以本來係起車站嘅合理位置，但係喺2號綫，恩華詩站係戴高樂—星形站同民族站之間唯一一個唔係起喺城門舊址嘅車站，反而係盡量起喺蒙馬特䌫車系統所在嘅山腳附近，不過，何些薩門嘅舊址其實就喺東面，喺何些薩大道同何些薩街嘅交界左近。蒙馬特嘅聖心聖殿亦喺附近。

20世紀50年代到21世紀初，側牆都被金屬覆蓋住，帶有藍色水平立柱同由上面照落嚟嘅金色廣告框，喺巴黎公共交通管理局「地鐵翻新」（Renouveau du métro）工程之前，車站用嘅係Joseph-André Motte設計嘅黃色座椅。月台現代化翻新工程喺2010年完成。

2016年4月1號，巴黎公共交通管理局喺13個車站開咗一日愚人節笑話，每個站換咗一半的嘅銘牌，當中喺呢個站係玩諧音嚟搞幽默，將站名（冇副標題）旋轉180度嚟反轉（「反轉」即係「envers」，同「Anvers」諧音，｢Anvers envers｣ 即係 ｢Anvers反轉｣）。

2019年，車站客量達到564萬3147人次，全系統排名第67。

設施

出入口

車站淨係有一個出入口，名為「何詩薩大道—聖心」（Boulevard de Rochechouart–Sacré-Coeur），通往呢條大道嘅中央分隔帶，位於恩華詩廣場。出入口淨係得樓梯，去到地面有道基馬設計嘅拱門，拱門喺1978年列為歷史古蹟。

車站佈局

地面
地下1樓	大堂
地下2樓 月台層	側式月台，車門右邊開
	1號月台	← 往多芬門 (碧加利)
	2號月台	→ 往民族 (巴比士—何詩薩) →
	側式月台，車門右邊開