意式番茄麵包沙律

意式番茄麵包沙律

類	沙律
起源地	意大利
地區	翁布利亞, 陀斯卡拿
主要成分	麵包, 蕃茄, 洋葱

意式番茄麵包沙律（意大利文：Panzanella），係一種源自意大利中部地區 — 陀斯卡拿（Toscana）同翁布利亞（Umbria）嘅碎沙律（chopped salad）。佢嘅主要材料有用水浸濕嘅隔夜麵包、洋葱同蕃茄，喺夏天好受歡迎。 呢款沙律通常會加青瓜，有時會加羅勒，以橄欖油同醋作為沙律醬。

意式番茄麵包沙律係意大利中部其他地區都好受歡迎。

歷史

十六世紀嘅藝術家兼詩人布龍齊諾（Bronzino）唱出讚美洋葱配油醋佐多士嘅詩歌 ，而後續提及用洋葱、馬齒莧同青瓜製成嘅沙律 。因此，經常被解讀為對意式番茄麵包沙律嘅記載 。

意式番茄麵包沙律個意大利名「panzanella」相信係個混成詞。喺意文中，「pane」解作麵包；「zanella」解作裝食物嘅深盤 。

材料

一碟意式番茄麵包沙律嘅特寫

喺二十世紀以前，意式番茄麵包沙律主要材料唔係蕃茄，而係洋葱 。

現代嘅意式番茄麵包沙律主要材料有濕水再擰乾嘅隔夜麵包、紅洋蔥、蕃茄、橄欖油、醋、鹽同胡椒。青瓜同羅勒都係常見嘅材料。

配料包括生菜、橄欖、水牛芝士、白酒、酸豆、鯷魚、芹菜、紅蘿蔔、紅酒、吞拿魚、歐芹、烚蛋、薄荷類植物、燈籠椒、檸檬汁同蒜頭。呢啲配料有時會加埋落沙律到，不過可加可唔加。而翡冷翠傳統派人士（Florentine traditionalists）就唔讚同加呢啲配料 。