愛內里菜
| 愛內里菜 | |
|---|---|
| 女歌手 | |
| 別名 | RIKAKO KAKIUCHI（舊藝名） 愛內里菜 坦內RIKA（舊藝名） R（舊藝名） |
| 出世 | 垣內里佳子 1980年7月31號  日本大阪府東大阪市 |
| 職業 | 歌手 生意人 作詞家 模特兒（出道早期） |
| 母校 | 帝塚山高等學校 同志社女子大學生活科學部食物營養科（中途退學） |
| 出道日期 | 1998年（模特兒） 2000年（歌手） |
| 出道作品 | 《Close To Your Heart》 |
| 代表作品 | 《戀愛是驚險、衝擊、懸疑》 《宛如橫渡七海的風》 《NAVY BLUE》 《I can't stop my love for you♥》 |
| 唱片公司 | GIZA Studio（2000 - 2010） Running Rabbit（2018 - ） |
| 經紀公司 | Ading（2000 - 2010） |
| 相關團體 | 愛內里菜&三枝夕夏 |
| R | |
|---|---|
| YouTube資料 | |
| 頻道 | |
| 訂閱 | 10萬（2020年） |
| 總點擊率 | 921萬 |
愛內里菜（日文：あいうち りな，1980年7月31號—），係日本女歌手、生意人，模特兒出身。原名垣內里佳子（日文：かきうち りかこ），2013年改藝名叫垣內RIKA，2015年以真名再次活動，2018年改藝名叫R。2021年又以「愛內里菜」之名活動。
經歷
[編輯]早年
[編輯]愛內里菜係大阪府東大阪市人，屋企有一個細妹叫垣內求實子。佢細個已經好鍾意唱歌，成日響阿媽面前表演；再大個女啲，就學埋彈琴。因為佢把聲好高音，可以唱到好有透徹力嘅高音，同時又可以唱低音；加上佢彈琴又好叻，所以佢自細已經好想做藝人[1]。
1998年，響帝塚山高等學校畢業之後，佢用真名響雜誌「Cawaii!」兼職做模特兒。1999年，當時仲係大學生嘅佢，響參加『SUPER STARLIGHT CONTEST』攞到獎後，決定做歌手，加入唱片公司GIZA studio[1]。
演藝經歷
[編輯]2000年3月23號，佢決定用「愛內里菜」做藝名，發表第一張單曲《Close To Your Heart》。同年10月25號，發表第四張單曲《戀愛是驚險、衝擊、懸疑》，係愛內第一次同《名偵探柯南》合作。其中響播漫畫個陣，主角江戶川柯南響呢首歌嘅伴奏下跳起Para Para，引起好多人熱議，令到愛內一炮而紅，呢首歌做咗佢嘅成名作[2][3]。
2001年1月發表錄音室專輯《Be Happy》。同年6月22號，佢決定由同志社女子大學生活科學部食物營養科中退[註 1]，同時都攞到營養師個牌照。10月3號，發表A面《NAVY BLUE》，係佢個人銷售量最高嘅作品。
2002年分別發表第九首單苗《I can't stop my love for you♥》同埋第二個錄音專輯《POWER OF WORDS》，其中《POWER OF WORDS》係佢出道以嚟花功夫最大嘅一套作品。
2003年，日本電視台直播棒球比賽。同年5月14號愛內出咗佢個人第十三首單曲《FULL JUMP》，同日係讀賣巨人對橫濱DeNA灣星嘅棒球比賽，日本電視台攞咗《FULL JUMP》嚟同讀買巨人撐場。但係愛內之後又話自己係阪神虎嘅Fans，惹嚟非議。同年12月31號，佢第一次參加紅白歌合戰，首歌正正就係《FULL JUMP》[4]。
2004年，發表第十六首單曲《Dream×Dream》，後嚟就做咗名偵探柯南第八部劇場版銀翼的奇術師嘅主題曲[5]。
2006年，先後發表兩首單曲《GLORIOUS/PRECIOUS PLACE》同《MIRACLE》，開始加入好多跳舞嘅元素。同年6月14號，佢宣佈同同公司藝人兼老友三枝夕夏組成愛內里菜&三枝夕夏，仲發表一首歌《100扇門》，成為名偵探柯南嘅電視版片尾曲之一。
2007年又以愛內里菜&三枝夕夏發表《宛如橫渡七海的風》，呢首歌同時係名偵探柯南第十一部劇場版紺碧之棺嘅主題曲。同年12月19號，佢第二十五首歌《不成眠的夜晚／PARTY TIME PARTY UP》響Oricon公信榜排頭十，係愛內時隔一年幾再次入返公信榜。
2008年，佢先後開咗兩次show（RINA AIUCHI "R-Live vol.5''同埋RINA AIUCHI "R-Live vol.6"），同年8月20號參加『名探偵コナン 夏祭り 〜夢の初ライブ〜』，12月27號出嘅歌《Friend／素顔のまま》再打入公信榜。2009年10月21號，佢發表個人第三十一首單曲《Magic》，又做咗名偵探柯南嘅電視版片尾曲之一。
2010年，愛內響一場同歌迷嘅聚會上，突然宣佈因為甲狀腺出事而要引退，響同年9月26號完成最後一場巡迴演出，12月31號正式引退。由2003年開始，愛內年年都會響自己嘅生日個日搞《里菜♥祭り》，呢個係佢得意同出名嘅地方之一，但2010年之後就再冇搞過。引退之後，佢開始對狗仔有興趣。2012年9月14號，佢響自己個blog上宣佈將會狗仔品牌「Bon Bon Copine」，主要係賣狗仔物品。之後佢嘅精力好多都放響呢個品牌到，但佢都成日以生意人嘅身份上節目[5][6]。
2015年9月2號，佢話自己個病已經好返，宣佈以「垣內RIKA」呢個名復出，同年又改以真名活動[7]。復出之後，佢成日都淨係開show，冇咩嘢出新歌[8]。2017年，佢突然自爆，話自己響2015年響未結婚之下生咗個仔，依家係單親家庭，令唔少fans心碎同大受打擊[4]。2018年又改藝名叫R，發表數碼單曲《WARM PRAYER》，係佢相隔8年嚟再次推出音樂作品[9]。2020年，佢發表個人第九張錄音室專輯《Ring》。2021年宣佈重新以「愛內里菜」作為藝名。
2021年3月18號，佢話響做GIZA studio旗下藝人個陣受到唱片公司監製非禮同埋性騷擾，飽受精神上嘅痛苦，但唱片公司扮睇唔到，佢最後被迫響2010年話係甲狀腺出事而要引退，依家佢入稟大阪地方裁判所向GIZA studio索償1000萬日圓（折合710萬港紙）[10]。GIZA studio否認愛內嘅指控[11]。2022年10月13號，大阪地方裁判所認為愛內嘅指控唔係事實，裁定愛內敗訴，愛內表示會上訴[12]。
個人醜聞
[編輯]自復出之後，愛內接連爆出好多醜聞，形象插水。2018年，佢畀記者爆出同某位社長有地下情，而愛內仲係知道對方有老婆嘅情況下甘願做人小三；另外，佢仲成日同社長周圍去蒲，完全唔顧個仔。愛內唔認同個位社長有婚外情，話同佢淨係老友[5]。
2020年7月15號，愛內嘅細妹、「Bon Bon Copine」董事垣內求實子以公司嘅名義賣假冒嘢，涉嫌違反商標法而畀差人拉咗；而「Bon Bon Copine」嘅總部都畀差人搜查。呢件事嚴重打擊當時業務正響到蒸蒸日上嘅「Bon Bon Copine」，愛內為咗平息事件，就炒咗細妹魷魚，並且話會深切反省[13]。
攷
[編輯]- ↑ 1.0 1.1 〈愛内里菜の新着ニュース・新曲・ライブ・チケット情報 | BARKS〉。www.barks.jp。喺2021-01-15搵到。
- ↑ 〈女星爆當情婦！放生2歲兒伴遊社長 毀單親好媽媽形象〉。《東森新聞》 (繁體中文)。喺2021-01-15搵到。
- ↑ 〈愛内里菜重新演唱《戀愛是冒險、驚喜、恐懼》主題歌，39歲的她超美聲音依舊爆炸好聽 | 宅宅新聞〉。news.gamme.com.tw。2020-04-14。喺2021-01-15搵到。
- ↑ 4.0 4.1 〈元愛内里菜の垣内りか、シングルマザーを告白 ２歳長男抱え「父としての分まで…」/デイリースポーツ online〉。《デイリースポーツ online》 (日文)。喺2021-01-15搵到。
- ↑ 5.0 5.1 5.2 〈元・愛内里菜 長男置いて不倫タイ旅行【平成ベストスクープ】 | 女性自身〉。《WEB女性自身》 (日文)。喺2021-01-15搵到。
- ↑ 〈【華麗な転身事情】歌手・愛内里菜、郷里に戻りペット産業に旋風巻き起こす 『名探偵コナン』ＯＰ曲が大ヒット〉。zakzak (日文)。喺2021-01-15搵到。
- ↑ 〈"元・愛内里菜"垣内りか、5年ぶり歌手活動再開「ファンが背中押してくれた」 | ORICON NEWS〉。web.archive.org。2017-12-02。歸檔時間2017-12-02。喺2021-01-15搵到。
{{cite web}}: CS1 maint: bot: original URL status unknown (link) - ↑ 〈愛内里菜、改名を発表 知られざる苦悩と現在の生活を語る モデルプレスインタビュー - モデルプレス〉。web.archive.org。2017-12-23。歸檔時間2017-12-23。喺2021-01-15搵到。
{{cite web}}: CS1 maint: bot: original URL status unknown (link) - ↑ 〈元・愛内里菜のＲが「鬼滅の刃」禰豆子のコスプレで「炎」を歌う動画を公開「凄いリアル」「歌も最高」〉。《スポーツ報知》 (日文)。2020-12-08。喺2021-01-15搵到。
- ↑ 〈20年前遭監製非禮 愛內里菜告前東家索700萬港元〉。《on.cc東網》。喺2022-10-17搵到。
{{cite web}}: CS1 maint: url-status (link) - ↑ 〈「愛内里菜」のセクハラ提訴、元事務所は事実否定 - 事件・事故 - 芸能 : 日刊スポーツ〉。nikkansports.com (日文)。喺2022-10-17搵到。
- ↑ INC, SANKEI DIGITAL (2022-10-13)。〈セクハラ訴訟敗訴の愛内里菜「不当な判決」 控訴の意向示す〉。《サンスポ》 (日文)。喺2022-10-17搵到。
- ↑ 〈元「愛内里菜」垣内りか、逮捕の妹社長を解任処分 - 芸能 : 日刊スポーツ〉。nikkansports.com (日文)。喺2021-01-15搵到。
註
[編輯]- ↑ 中途，即係中文嘅「中途退學」