我哋 (小說)

封面

《我哋》（Мы）係俄羅斯作家葉夫根尼扎米亞京創作嘅反烏托邦科幻小說，故事嘅背景係未來極權社會。1920-1921年發表。佢同《一九八四》、《美麗新世界》並列做「三大反烏托邦小說」。

背景

我哋嘅背景設定喺未來，小說用第一人稱自述嘅形式展開，主角叫做「D-503」（俄文：Д-503）。「D-503」住喺「聯眾國」（英文版譯做：The One State），係一個太空船工程師，係「積分號」（英文版譯做：INTEGRAL）嘅設計師。「聯眾國」係一個幾乎完全係用玻璃起嘅城市國家，呢個結構方便政府大規模監視居民嘅一切活動，所有人都用一個號碼代表自己，就好似一間大型嘅全景玻璃監獄。生活喺嗰度嘅人就生活喺泰勒（F. W. Taylor）式嘅科學管理之下（註：F. W. Taylor喺美國機械工程師兼管理學家，係The Principles of Scientific Management嘅作者，喺現代工廠管理嘅始祖），所有人步調一致，都著住制服。社會嘅運作，嚴格按照預設嘅邏輯同理性運行，所有個人行為都係基於國家設定嘅公式同方程式嘅邏輯。

作者寫《我哋》其實同佢嘅人身經歷好有關係，佢經歷過1905年同1917年嘅兩次俄國革命。佢喺英國紐卡素嘅Jesmond（紐卡素城中心嘅東北面大約2公里距離）住嘅時候，喺泰恩河嘅一間造船廠打過工（註：當年泰恩河流域、紐卡素城附近有好多造船廠）。呢啲打工經歷，令佢對泰勒式科學管理之下，大規模嘅工廠嘅分工合作相當反感。

情節

「聯眾國」征服咗整個世界之後嘅幾百年，起緊太空船 「積分號」去侵略同征服外星。太空船嘅總工程師 D-503 開始寫日記。

同「聯眾國」 嘅所有其他居民一樣，D-503 住喺一棟玻璃屋裏面，受到秘密警察同埋國安單位嘅嚴密監視。 D-503 嘅情人 O-90 俾「聯眾國」 安排喺某啲夜晚去探視佢。O-90 因為俾系統認為太矮，唔可以生BB，所以對自己嘅生活狀況深感悲痛。 O-90 嘅另一個情人 R-13， R-13 係詩人，亦都係 D-503 喺最好嘅朋友，佢喺俾獨裁政府公開處決嘅時候朗誦自己嘅詩。

喺同 O-90 進行指定嘅散步嘅時候，D-503 遇到一個叫 I-330 嘅女人。 I-330 食煙、飲酒，並且係無申請到非涉及感情嘅性探訪（sex visit）之下，無恥咁同 D-503 調情； 根據「聯眾國」 嘅法律，無預先申請嘅性活動係非法嘅。

D-503 對 I-330 嘅引誘，既排斥又著迷，佢努力咁去克服 I-330 對佢嘅吸引力。 I-330 邀請佢參觀古屋，呢間古屋係「聯眾國」 唯一嘅一間除咗窗之外，其他地方都唔透明嘅建築物。 所有喺城市周圍挖掘出嚟，有美學同歷史意義嘅嘢，都係存放喺呢度。I-330 向 D-503 講，佢同一個密謀推翻「聯眾國」嘅組織（Mephi）有關。 I-330 仲帶咗 D-503 穿過古屋裡面嘅秘密隧道，出咗環繞城邦嘅綠牆外面嘅世界。 喺嗰度，D-503 遇到咗外部世界嘅居民：佢哋係身披動物毛皮嘅人類。 Mephi 嘅目標係摧毀綠牆，等「聯眾國」嘅居民同外界可以重新團結。

雖然最近佢哋兩個之間出現咗啲感情裂痕，O-90 仍然想同 D-503 非法生BB。 D-503 開始時唔肯，不過 O-90 應承會依法將BB交俾「聯眾國」 撫養，D-503 終於答應咗。 喺懷孕期間，O-90 意識到佢無辦法忍受到同BB分離。 喺 D-503 嘅要求之下，I-330 安排 O-90 偷渡到綠牆外。

喺最後一篇日記嗰度，D-503 冷漠咁講述咗佢俾人夾硬綁喺枱上面，接受咗「大行動」。「大行動」係一個發動「聯眾國」居民嘅政治運動，目的係防止可能發生嘅騷亂，將有可能危害「聯眾國」統治嘅人做思想改造，消除想像力同情感，令佢哋變成「可靠」嘅「人形拖拉機」，為「聯眾國」服務。呢次「大行動」之後，D-503 自願咁向「聯眾國」獨裁者「恩人」（Benefactor）講咗 Mephi 嘅內部運作情況。 令D-503 表示驚訝嘅係，即使用咗酷刑， I-330 都唔肯舉報戰友。 不過最終，I-330 同其他被捕人士，依然俾「恩人」處死。

Mephi 嘅起義積聚力量； 部分嘅綠牆區域俾佢哋摧毀咗，鳥類重新喺城市裡面出現，啲人開始敢做出反叛行為。 雖然 D-503表示希望「恩人」恢復「理性」，但係小說嘅結尾係「聯眾國」受到質疑。 I-330 嘅座右銘係，就好似無最大嘅數字咁樣，無可能有最終嘅革命。