打書釘

出自維基百科,自由嘅百科全書

打書釘泛指啲人睇唔買書嘅行為,地點不限,可以係書攤,亦可以係書局。最主要係啲書蟲喺書店長時間睇書,想唔使買書就可以睇到書。

書局為咗賣書會畀人去睇書,不過啲人打書釘等於搏懵,搏書舖、作者、出版社嘅懵,所以賣書一方會喺書上包層膠紙,唔畀啲人開,其中雜誌最常見。不過啲人打書釘大多係睇啲輕鬆啲嘅書,大多揀薄嘅、多畫嘅書,比如好多人就去賣公仔書嘅地方打書釘。不過亦有啲人打書釘係想睇下本書抵唔抵買。家下網舖發達,衝擊咗實體書舖,一啲人喺書店打書釘,睇啱咗唔買反而上網買,對書舖好大損失。

不過都有啲書舖歡迎啲人打書釘,特別係內設咖啡廳茶室嘅書舖,噉一來啲人會坐喺度一邊掀書一邊買杯嘢飲,增加書舖嘅生意。亦有啲書舖大方,由得啲人打,重設埋座椅畀人,想以服務周到攬客、旺下場。亦有歡迎打書釘嘅書店係想聚人氣,借此邀請作者等文化人物開講座、喺書舖搞展覽等文化活動。