第四埲牆

舞台有三埲牆，但演員飾演角色，一般要當正個舞台有四埲牆噉，唔好直接同觀眾講嘢。

第四埲牆，又叫第四面牆或者第四堵墻，係戲劇同創意寫作上嘅概念，講緊角色要唔知道讀者或觀眾存在，唔知自己身處喺一個故事入便。想像有一班演員喺度演舞台劇，舞台俾三埲牆圍住，觀眾能夠睇到舞台上嘅演員，但演員一般都要想像自己係戲入面嘅角色，扮到好似自己睇唔到觀眾噉－即係話由戲中角色嘅角度睇，個舞台就彷彿就好似有第四面牆噉，令佢哋睇唔到觀眾。

基本概念

如果考慮晒所有能夠表達故事嘅媒體，第四面牆呢個概念可以廣義化成以下呢條戲劇同虛構故事中嘅常規：

喺電影或者文學作品等嘅敘事體當中，啲角色嘅言行要表現出佢哋唔知讀者觀眾嘅存在。

而打破第四埲牆就係敘事技巧嘅一種，泛指打破第四面牆呢條常規，俾故仔嘅角色直接同讀者觀眾講嘢，簡單嘅例子有故仔其中一個角色喺故仔完之後，行出嚟問讀者觀眾對個故仔有乜睇法噉。

好似係以下嘅劇本噉：

場景：一間凌亂嘅房，阿明坐喺電腦面前，神情嚴肅噉打字。

旁白：阿明正喺度努力撰寫關於打破第四面牆嘅粵語維基條目。佢完全唔知，佢嘅生活其實亦係一段預先寫好嘅劇本。

阿明：（突然停手，望向鏡頭，即係觀眾嘅方向）其實我知㗎。

旁白：（語帶驚訝）你同邊個講緊嘢？

阿明：（指住鏡頭）我同緊班讀者講嘢囉。你哋係咪覺得呢個旁白好煩呢？佢以為我聽唔到佢講嘢。

喺呢段劇本入便，阿明係故事嘅角色，原則上應該守第四面牆嘅法則，但係喺呢度，佢突然開始同觀眾講嘢，謂之打破咗第四面牆。

作品例子

由漫畫、電影以至視像遊戲，唔少虛構故事作品都用咗打破第四面牆嘅橋段。

例如漫威嘅超級英雄角色死侍就出名在成日都打破第四面牆。

睇埋

• 敘述
• 敘事技巧

拎

• （英文）打破第四埲牆