扭橋

扭橋nau2 kiu2（英文 plot twist 嘅直譯），又叫大逆轉，廿一世紀初香港嘅網絡文化入面又叫反 cup（粵拼：faan2 kap1），係一種敘事技巧。扭橋係指段情節出現啲極度出乎意料嘅發展，通常事前個故仔會落定咗啲伏筆。

如果扭橋發生喺故仔嘅結尾部份，噉個故仔嘅結局就算係一個逆轉式結局（twist ending）。

基礎

睇埋：情節同驚訝

扭橋必然涉及情節有意想不到嘅發展，亦即係話驚訝就係扭橋最重要嘅成份。

搵個具體例子嘅話，可以想像吓好多虛構故仔都有嘅「阿 A 呢個角色，開頭嗰陣望落好好人，但原來佢係奸角」情節：假設作故仔嗰個人寫得夠好，阿 A 唔係一睇就知係奸角嘅，同時打前嘅情節嗰度又做好嗮伏筆（即係例如阿 A 的確有動機做壞事），噉阿 A 展現佢嘅真正意圖嗰一刻會令到讀者觀眾就會感受到一股巨大嘅驚訝感；而且讀者觀眾仲可能會因而對故仔嘅某啲部份有新嘅詮釋－可以想像讀者腦海出現「唔怪之得阿 A 之前有啲噉噉噉嘅古怪行為啦，佢根本係謀緊想殺咗阿 B 嘅」噉嘅諗法。

扭橋廣泛噉畀人視為一種重要嘅敘事技巧：虛構故仔唔一定要有扭橋，有大把成功嘅虛構故仔作品都冇使用扭橋；不過事實表明，做得好嘅扭橋可以令一個故仔更加難忘；專業作故仔嘅人－好似係作家、漫畫家同埋編劇呀噉－都會學扭橋嘅概念，而且佢哋仲會觀察吓唔同嘅虛構故仔點樣用扭橋，嚟到將扭橋嘅手法分門別類。

手法

睇埋：敘事技巧

• 閃回事件，可以用嚟提供一啲讀者觀眾打前唔知嘅資訊，而知咗呢件資訊會令讀者觀眾對情節有新嘅理解。
• 靠唔住嘅敘述者，展示「敘述個故仔嘅人，係靠唔住嘅」呢點，可以令讀者觀眾重新詮釋情節入面發生過嘅事。
• 天外救星（拉丁文：deus ex machina）：一般畀人覺得係極低水平嘅扭橋做法。
• 假主角：例如頭嗰兩個章節嘅主角喺第二章最尾嗰陣死咗，跟住觀點轉去真正嘅主角嗰邊。

睇埋

• 伏筆同橋段
• 麥高芬
• 劇透
• 笑點

文獻

• Beigi, M., Callahan, J., & Michaelson, C. (2019). A critical plot twist: Changing characters and foreshadowing the future of organizational storytelling. International Journal of Management Reviews, 21(4), 447-465.
• Pérez, H. J. (2020). The plot twist in TV serial narratives. Projections, 14(1), 58-74.

拎

• Plot Twist，電視橋段網嘅文 （英文） 講扭橋呢個概念。