撳鐘仔

撳鐘仔，係粵語流行地區，對於叫雞行為嘅形象化詞語。

撳鐘，原本意思就係去用手或物件去撳門鐘，畀門後面嘅人知道門外有訪客嚟咗，正等待開門招呼，但喺「撳鐘」後面加咗個仔字就變咗有特別嘅意思。

有一啲擁有自己單獨嘅房間處所用嚟賣淫用途嘅性工作者 (詳見一樓一鳯），啲嫖客上樓去幫襯，去到門口時係要撳門鐘等鳯姐開門，而啲門鐘嘅制通常都簡陋且細小，加上啲嫖客一般都會怕尷尬而輕輕咁撳鐘，撳完即刻縮手，四處張望怕怕醜，怕人見到自己尋花問柳，實則呃到自己但呃唔到隻狗，坊間用「撳鐘仔」呢個形象化嘅詞語去隱晦咁形容叫雞呢種行為，都可謂繪影繪聲。

好多時啲嫖客都唔止撳一次門鐘，話說嗰啲一樓一鳳，通常係聚集喺同一棟大廈嘅某幾個樓層開檔，有啲業主更將一個大嘅樓宇單位改建成幾個小型獨立單位，租畀每一個鳳姐，等佢哋各自有一個私人地方提供賣淫服務，咁嫖客畀錢叫雞當然要揀合眼緣，要睇過辦先決定幫唔幫襯，再者有啲鳳姐正在做緊生意亦應唔到門，所以啲鹹濕佬就需要逐個門咁撳啲鐘仔，睇吓邊個鳳姐得閒，睇吓啱唔啱心水。

網絡世界上嘅意思

喺網絡文化入面，YouTube頻道會有一個鐘嘅圖案嘅掣，撳咗後每當有更新就會收到通知，所以YouTuber會叫觀眾訂閱同「撳鐘仔」。