敦煌詞

出自維基百科,自由嘅百科全書
(由敦煌曲子詞跳轉過嚟)

敦煌詞粵拼deon1 wong4 ci4)係指20世紀初喺敦煌莫高窟石室發現嘅民間詞曲集,係研究詞早期發展嘅緊要資料。又叫敦煌辭敦煌曲子詞敦煌曲敦煌歌詞敦煌歌辭

[編輯]

1900年,偶然間打開咗敦煌鳴沙山千佛洞第288號藏經洞[1],發現封藏喺石室內嘅各種敦煌詞抄卷。呢啲抄卷記錄嘅詞嘅寫作時間大概從武則天末年開始,到五代爲止[2],爲唐五代詞。作者方面,大多數係無名氏,作者範圍好大,多數係出身社會下層,只有五首可以搵到作者名,當中有溫庭筠李曄(唐昭宗)、歐陽炯[2]。呢啲詞作,有啲集中喺詞集,亦有啲散見喺其他抄卷度[3]。呢啲詞作無同曲譜並錄,噉係因爲曲譜相對固定,詞係填入去嘅[1]

咁多抄卷中,最緊要嘅抄卷係《雲謠集雜曲子》,收詞30首,寫錄時間唔遲過西元911年,早過《花間集》30年(《花間集》喺西元940年編定)[2],係現存最早嘅詞集[3],呢個詞集用咗13個詞調,除咗《內家嬌》,其餘12種詞調喺《教坊記・曲名表》都有記錄,體例上有慢詞,亦有聯章體[2]

石室打開咗後,呢啲抄卷同入面收嘅其他書先後流散世界各地,之後又陸續抄寫、影相、影印返中國,再畀人輯錄成輯本出版。呢啲抄卷最主要由兩個人所得:斯坦因伯希和。斯坦因攞到嘅抄卷而家收喺倫敦英國圖書館,伯希和得到嘅抄卷而家收藏喺巴黎法國國家圖書館。另外俄國人奧里敦保攞到嘅抄卷而家喺聖彼得堡,又有少量抄卷流落喺日本等國,淨低嘅部分收藏喺北京嘅圖書館[3]

特點[編輯]

敦煌詞係早期詞作,作者主要來源民間,因此從內容、體制、語言風格都有初時形成所帶有嘅過渡性特徵。就似《雲謠集曲子詞》嘅朱祖謀寫嘅跋形容噉:「其爲詞拙樸可喜,洵倚聲椎輪大輅」。

由於詞喺草創階段,作品內容同一般嘅民歌、詩無幾大唔同,詩嘅界域好闊,同樣詞嘅內容亦幾多樣,一如王重民《敦煌曲子詞集敘錄》所講嘅「今茲所獲,有邊客遊子之呻吟,忠臣義士之壯語,隱居子之怡情悅志,少年學子之熱望與失望,以及佛子之讚頌,醫生之歌訣,莫不入調。」不過相比詩,詞更擅長寫閨情風月、男女之情,最普遍嘅題材係妓女生活,噉係因爲詞一開始係民間嘅雜曲小唱,唱呢啲詞嘅環境一般係宴飲娛樂,唱來助興用嘅,所以內容上比較淺俗,乃至有豔情化傾向,呢啲內容符合市井平民嘅口味,所以喺呢方面嘅題材敦煌詞達到嘅成就最高。亦由於佢出於民間,風格上有民歌嘅清新風味,民間嘅視角亦展現出文人寫唔到嘅方面,因此敦煌詞豐富嘅題材表現喺五代宋初文人詞中難得見到,但呢種多樣亦講明佢無同一般嘅民歌詩歌劃清界線,未入到後來詞特有嘅窄而深嘅領域。

除咗內容寬泛,喺體制上敦煌詞亦體現到草創階段嘅粗放,表明佢嘅形式未完全成熟。由於詞呢種文體嘅寫作規範未成熟,啲人無相應嘅文學觀念箍死,所以形式上比較自由,乃至字數唔定、韻腳唔拘、平仄同押、押方音、用襯字。呢啲現象講明詞格闊,對音韻唔多講究,押韻簡單。另外,敦煌詞中,詞調名一般同詞作內容相應,換言之敦煌詞未似之後嘅詞噉,詞調名專門化來表示詞調,而同詞嘅內容分離。

總體來講,敦煌詞跨越嘅時間比較耐,作者來源複雜,所以各篇詞作幾唔同,從思想內容到表現上嘅工拙、精粗、文野,差異幾大,雖然本色拙樸,但亦有作品講究辭藻,甚至文與白、纖巧與樸拙並存於一篇。因此敦煌詞作爲民間詞作,風貌好豐富。

意義[編輯]

敦煌詞係研究詞發展早期嘅緊要資料,呢筆資料證明咗詞呢種文體係發源自民間,後來畀文人接納,逐漸地位同詩相等,因此民間詞係宋詞嘅直接源頭。但喺發現敦煌詞之前,研究當中好少見到民間詞作,直到呢批抄卷出土,先補救呢方面嘅缺陷。

主要輯本[編輯]

下面係敦煌詞主要嘅輯本,由於各家收錄標準唔同,所以收嘅詞數唔同。其中任二北嘅《敦煌曲校錄》收埋俗曲佛曲,《敦煌歌辭集》擴大到但凡可以入樂嘅辭章。一般研究敦煌詞係揀合乎詞體、有調名嘅作品,所以王重民嘅輯本係主要研究對象。王重民嘅輯本係從伯希和嘅17卷、斯坦因嘅11卷、羅振玉嘅3卷、日本橋川氏嘅1卷中輯錄213首詞,去咗重複部分得出。

  • 王重民,《敦煌曲子詞集》,輯錄詞161首[1]
  • 饒宗頤,《敦煌詞》,輯錄詞318首
  • 任二北,《敦煌曲校錄》,輯錄詞545首;《敦煌歌辭集》,輯錄詞1200幾首

[編輯]

  1. 1.0 1.1 1.2 . 中國文學網. 喺2016年8月20號搵到.{{cite web}}: CS1 maint: url-status (link)
  2. 2.0 2.1 2.2 2.3 袁行霈、羅宗强. 二卷 第四編 隋唐五代文學 第十二章 詞的初創及晚唐五代詞. . 高等教育出版社.
  3. 3.0 3.1 3.2 . 中國哲學書電子化計劃. {{cite web}}: |chapter= ignored (help)