新華戲院

 新華戲院（粵拼：san1 waa6 hei3 jyun2） （Sun Wah Theatre），又稱新華電影院、新華寬銀幕電影院，係一間曾喺廣東省廣州市中山五路經營嘅老牌戲院。喺1932年開業，投資人係美國華僑朱蔭橋、朱家藩。第一部喺戲院上畫嘅片係香港有聲電影《桃花亂放》。戲院見證咗昔日惠愛路嘅繁盛輝煌，舊陣時市民都以到過新華睇戲為榮。

1949後，新華戲院成咗首輪片放映點，1955年畀當局公私合營，1956年畀改成廣州市第一間寬銀幕身歷聲電影院。1988年陣，戲院係廣州率先引進鐳射電影(又叫做鐳射錄影)嘅影院。

1994年年尾，由於廣州地鐵一號線牽連清拆中山路騎樓街，新華戲院、新星戲院、美華戲院等老牌影院，連同其他老字號就此消失。復建嘅五月花影城據話係延續咗新華戲院嘅回憶。