旅遊稅

旅遊稅又叫做遊客稅（英文：Tourist tax），係令遊客增加洗費嘅措施，目的係打擊過度旅遊或者管控旅遊人口，亦都係一種稅收出口（將部份租稅負擔轉去公民、居民以外嘅人）嘅方式。旅遊產業一般都反對旅遊稅。遊客買嘢有時要畀增值稅，不過嗰度嘅居民都要畀，好似呢啲遊客同居民都要畀嘅稅唔算係旅遊稅。

種類

每日稅

不丹喺2019年對每個遊客收每日美金200到250蚊嘅稅，係當時最高嘅旅遊稅。原本對嚟自印度、孟加拉同馬爾代夫嘅旅客有豁免，但係不丹喺2020年起計劃增加呢啲旅客嘅費用。

旅館稅

歐美好多國對旅館同其他臨時住宿嘅房間收稅。

美國有好多州同大城有收旅館稅，稅率最高嘅係休斯敦，佔每日住宿費嘅17%。

德國嘅城除咗徵收加值稅之外，仲徵收稱為「文化促進稅」（德文：Kulturförderabgabe）或「床稅」（德文：bettensteuer）嘅稅收。好多大城市唔會針對商務旅客徵收呢類嘅稅收。

西班牙嘅市政府會向當地旅館徵收幾歐元嘅旅館稅。希臘嘅旅館稅由2018年開始，由0.50歐元到4歐元不等。

羅馬尼亞嘅旅客除咗其他嘅旅遊稅之外，仲要繳交居房費嘅1%做稅金。

荷蘭除咗有針對住喺旅館嘅人收稅之外，亦都有向停靠遊輪上嘅旅客徵收稅金。

餐館稅

有啲國亦都將對餐館嘅課稅當係旅遊稅嘅一種。

入境稅

紐西蘭喺2019年計劃對太平洋區域以外入境旅客收35美元嘅入境稅，估計每年可以有8,000萬紐西蘭元嘅收益，每年可以減少二萬名遊客。威尼斯喺2018年開始收10歐元嘅入境稅，而巴尼奧雷焦舊城2019年收5歐元嘅入境稅。

出境稅

大部份加勒比海國喺機票費用中自動加入出境稅（2019年時，安提瓜巴布達嘅出境稅係51美元，而巴哈馬係15美元）。2019年嗰時，日本對離開日本嘅旅客徵收一千日圓「再見稅」。印尼亦都有出境稅，費用因應唔同機場而唔同。